18-mavzu. Farmatsevtika xizmatini nazorat-ruxsatnoma tizimi

Dori vositalari sifatini nazorat qilish laboratoriyasi ishini tashkil qilish

Dori vositalari sifatini nazorat qilish bo‘yicha laboratoriya yoki markazlar O‘zbekiston Respublikasi dori vositalari va tibbiy texnika sifatini ta’minlovchi nazorat-ruxsatnoma tizimining tarkibiy qismi hisoblanadi.
Dori vositalari sifatini nazorat qilish bo‘yicha vakolatli laboratoriyalarni asosiy qismi Sog‘liqni saqlash muassasasi hisoblanib, ishlab chiqarish faoliyati bo‘yicha O‘zbekiston Respublikasi Sog‘liqni saqlash vazirligi “Dori vositalari, tibbiy buyumlar va tibbiy texnika ekspertizasi va standartizatsiyasi davlat markazi” davlat unitar korxonasi, moliyaviy ishlar bo‘yicha hududiy davlat organlariga buysunadi.
Laboratoriya o‘z faoliyatida O‘zbekiston Respublikasi qonunlari, qarorlari, Sog‘likni saqlash vazirligi buyruqlari, yo‘riqnomalari va boshqa me’yoriy hujjatlarga amal qiladi. Laboratoriyaning tashkiliy tuzilishi va xodimlar shtati asosiy vazifalariga, bajariladigan ish hajmiga va amaldagi mehnat qonunchiligiga muvofiq ravishda aniqlanadi.
Asosiy vazifasi. Laboratoriya dori vositalari va tibbiy texnika sifati bo‘yicha davlat nazoratini ro‘yxatga olingandan keyingi va davomli nazoratni o‘tkazadi.
Asosiy faoliyatiga muvofiq ravishda laboratoriya quyidagi vazifalarni bajaradi:
– tasdiqlangan me’yoriy hujjatlarga muvofiq dori vositalarini sertifikatsiyalashtirish va tanlab nazorat qilishni amalga oshiradi;
- dorixona muassasalari va tashkilotlarida tarkibida yurak glikozidlari saqlovchi dori vositalari va dorivor o‘simlik xomashyolarining biologik sifat nazoratini amalga oshiradi;
- agar laboratoriyaning mikrobiologik xizmati mavjud bo‘lsa, dorixonalarda tayyorlangan steril dori vositalari, tozalangan suv, hamda idish va qadoqlash vositalaridan olingan yuvindilarni mikrobiologik tekshiruvini o‘tkazadi;
- sifatsiz dori vositalari aniqlangan hollarda tezlikda bu dori vositalarining sotilishini to‘xtatib turish kerakligi hakidagi xulosani “Dori vositalari, tibbiy buyumlar va tibbiy texnika ekspertizasi va standartizatsiyasi davlat markazi” davlat unitar korxonasiga taqdim etadi;
- shartnoma asosida belgilangan tartibda farmatsevtika faoliyati yuritish uchun litsenziyaga ega yuridik shaxslardan kelgan dori vositalari sifatini tekshiradi va sertifikatlar beradi;
- zarur holatlarda dorixonalari va korxonalarga farmatsevtika faoliyati uchun litsenziya berish yoki litsenziya berishni asoslangan holda rad etish haqida xulosa chiqarish uchun litsenzion hay’atida ishtirok etadi.