3- mavzu. Marketing faoliyatini axborot bilan ta’minlash

---

3- MAVZU. MARKETING FAOLIYaTINI AXBOROT BILAN 
TA’MINLASH 
1. Marketingda axborotni o’rni. Axborot tizimi. 
2. Axborot turlari va ularni turkumlash. 
3. Axborotni to’plash uslublari. 
4. To’plangan axborotlarni tahlil qilish va qayta ishlash. 
3.1. Marketingda axborotni o’rni. Axborot tizimi. 
Marketing faoliyatiga xos bo’lgan barcha axborotlar, ma’lumotlar tadqiqotlar 
uchun muhim qurol sifatida shakllanadi. Ularni tashkil etish, muayyan tartibga 
solish va uzluksizligini ta’minlash zarur bo’ladi. Marketing axboroti yaxlit tizim 
sifatida namoyon bo’ladi va rivojlanib boradi. 
Marketing axborot tizimi - insonlar, texnik vositalar va amalga oshirish 
uslublaridan tashkil topib, muhim va to’g’ri axborotni to’plash, tartibga solish, tahlil 
qilish, kuzatish natijasida marketing sohasida qaror qabul qiluvchiga samarali 
yordam ko’rsatish vazifasini bajaradi. Marketing axboroti tizimi o’zaro mushtarak 
bog’langan elementlar va munosabatlar majmuini tashkil etadi. 
Marketingni axborot manbalari quyidagilardan iborat: yillik statistik 
ma’lumotlar; korxona (firma) hisobotlari; tadbirkorlar uyushmasi axborotlari; 
tarmoqlar axborotlari; birja axborotlari; bank axborotlari; ma’lumotlar to’plamlari; 
sud qarorlari; korxonangizning ish korrespondentsiyalari; partiyalar tashviqotlari; 
ye’lonlar, prospektlar, kataloglar; tanlov natijalari; aktsiya kurslari jadvallari; 
korxona rahbariyati majlislari bayonnomalari; axborot-analitik byulletenlari; radio 
hamda televidenie yangiliklari; voqealar sharhlari; iqtisodiyot yangiliklari; maxsus 
kitob va jurnallar; lug’atlar, yentsiklopediyalar; kundalik gazetalar va hokazolar. 
Axborotni to’plash va undan foydalanish jihatlariga ko’ra axborot tizimini 
to’rtta quyi tizimga ajratish mumkin. Bular jumlasiga 1)tashkilot ichki hisobot 
tizimi, 2) marketing tashqi xabarnoma - axborot tizimi, 3) qaror qabul qilishni 
quvvatlovchi tizim, 4) marketing tadqiqoti tizimi kiradi. Ushbu quyi tizimlarning 
shakllanishida axborotga bo’lgan ehtiyoj, zaruriy shakldagi va talabdagi axborotni 
taqdim etish tartibi va muddati muhim ahamiyat kasb etadi.