32- §. Qoqan xanlıǵınıń dúziliwi

Awıl xojalıǵı, ónermentshilik hám sawda

Qoqan xanlıǵında da Xiywa xanlıǵı hám Buxara ámirliginde bolǵanı sıyaqlı jasalma suwǵarıw sheberligi tolıq iyelengen hám suw- dan aqılǵa muwapıq paydalanılǵan. Tiykarǵı

awıl xojalıǵı egini biyday hám paxta edi. Sonday-aq, miywe, palız eginleriniń derlik barlıq túrleri jetistirilgen. Sharwashılıqta mákke hám jońıshqa jetekshi orında turǵan.

Ferǵana oypatlıǵında paxtashılıq jıldan-jılǵa rawajlandı. Rossiyanıń ózbek mámleketlerinen, sonıń ishinde, Qoqannan paxta satıp ala bas- lawı bul egin maydanlarınıń jáne de keńeyiwine sebep boldı. Paxta sawdasına hátte bajı da biykar etildi.

Qoqanda ónermentshiliktiń mıskerlik, zergerlik, oyma naǵıslıq, gú- lalshılıq, qaǵaz islep shıǵarıwshı, toqımashı, taqıya tigiwshi, kesteshilik, temirshilik, nanbayshı, arba soǵıwshı, maqpalshı, boyawshı, sıbawshı, dári islewshi, paqsa óriwshi, qazan quyıwshı, kórkem naǵısshı, aǵash ustası, mıltıq soǵıwshı, nayza soǵıwshı, tor toqıwshı, pillekesh, postın tigiwshi, taǵashı, top quyıwshı, párenje toqıwshı, shatır soǵıwshı, sheber, shıt hám gilemshi sıyaqlı túrleri júdá rawajlanǵan.

Qoqan xanlıǵınıń ekonomikalıq turmısında Buxara ámirligi, Xiywa xanlıǵı, Qashǵar, Hindstan, Awǵanstan, Iran, Qıtay Rossiya menen alıp barılǵan sawda baylanısları úlken orındı iyelegen. 1832-jılı qol qoyılǵan Qoqan — Qıtay shártnamasına muwapıq, Qoqan xanı Qashqarda saw- dagerlerden bajı jıynaw huqıqın alǵan.