4. ilmiy tadqiqot jarayonini tashkil qilish

Ilmiy muloqot tadqiqotni omma tomonidan e’tirof etilishining sharti sifatida

Tadqiqot natijalarining omma tomonidan e’tirof etilishida targ‘ibot roli, ya’ni tadqiqotchining ilmiy konferensiya va seminarlarda qiladigan og‘zaki shakldagi ma’ruzasi katta o‘rin tutadi. Ilmiy tadqiqot natijalarini targ‘ib qilishning yozma (publikatsiyalar) va og‘zaki (konferensiyalar) shakllari parallel olib borilishi lozim. Tajribadan ma’lumki, konferensiya va simpoziumlardagi og‘zaki ma’ruzalar ilmiy omma keng e’tiborini jalb qilib, qiziqtiradi va mavjud publikatsiyalar bilan tanishib chiqishga undaydi. Og‘zaki ilmiy muloqotga oid yana bir holatni qayd etib o‘tish lozim. Har bir konferensiyaning faoliyat dasturi mavjud bo‘lib, oldindan rejalashtirilgan ma’ruzalar o‘qiladi, reglament bo‘yicha tadbirlar o‘tkaziladi, asosiy yutuqqa olim bu reglamentli tadbirlarda emas, balki tanaffuslar, kofe-breyk davomida hamkasblar bilan norasmiy muloqot natijasida ega bo‘ladi. Ijtimoiy baholarga ko‘ra, olim 30% ma’lumotni konferensiya jarayonida, uning qolgan qismi – 70% ni esa norasmiy muloqot davomida oladi.