5 – Leksiya. Absorbciya prosessinin’ teoriyaliq tiykarlari ha’m texnologiуаliq esaрlari

Plastinkalı suwıtqıshlar (41-súwret) bir túrdegi beti keńeytilgen gofrirlengen plastinalar toplamınan 1 turadı, hám qálegen jıllılıq almastırıw betine iye bir paketke jıynaladı. Bul plastinalar perimetri boylap rezina prokladkalar 5 menen tıǵızlanǵan hám plastinkalardıń arasında zárúrli quwıslıqtı támiynleydi. Usı quwıslıq boylap qarama-qarsı aǵımda suwıtılıwshı eritpe hám suwıtıwshı suw júredi. Hár bir plastina joqarǵı bóliminde ıssı eritpeni kirgiziw hám suwıtıwshı suwdı shıǵarıw ushın sańlaqlarǵa iye, al tómengi tárepinde – suwıtıwshı suwdı kirgiziw hám suwıtılǵan eritpeni shıǵarıw sańlaqları bar. Plastinkadaǵı sańlaqlar suwıtılıwshı eritpeniń hám suwıtıwshı suwdıń kiriwshi hám shıǵıwshı tárepinen rezina prokladkalar menen tıǵızlanbaǵan, sonlıqtan eritpe hám suw plastinkalar arasındaǵı quwıslıqtan erkin ótedi. Plastinkalardıń qarama-qarsı tárepinen bul sańlaqlar tıǵızlanǵan, bul eritpeniń hám suwıtıwshı suwdıń plastinkalardıń arasındaǵı qońsılas aralıqta aralasıp ketiw múmkinshiligin saplastıradı.

41-Súwret. Plastinalı suwıtqısh:
1 – plastinalar, 2 – suwıtılǵan sherebe shıǵıwı ushın shtucer, 3 – suwıtıwshı suwdıń kiriwi ushın shtucer, 4 – qozǵalmaytuǵın plita, 5 – rezina prokladkalar, 6 – ıssı eritpeniń kiriwi ushın shtucer, 7 – suwıtıwshı suwdıń shıǵıwı ushın shtucer, 8 - qozǵalıwshı plita.
Demek, suwıtılıwshı eritpe suwıtqıshqa shtucer arqalı kirip, plastinkalardıń bir tárepin juwıp ótedi hám suwıtqıshtan shtucer 2 arqalı shıǵıp ketedi; suwıtıwshı suw 3-shtucer arqalı kiredi hám plastinkalardıń arasınan olardıń ekinshi tárepinen ótip, 7-shtucer arqalı shıǵadı. Plastinkalar paketi qozǵalatuǵın plitalar 8 qozǵalmaytuǵın plitalarǵa 4 filtr-presske uqsas túrde qısılǵan. Suwıtqıshtıń dúzilisi suwıtıwdıń hár qıylı sxemaların: parallel, izbe-iz hám aralas túrlerin ámelge asırıwǵa imkaniyat jaratadı. Ol jıllılıq almastırıw betlerin tazalaw hám tekseriw ushın oǵada qolaylı. Házirgi waqıtta soda zavodları jıllılıq almastırıw betleri 80 m² bolǵan suwıtqıshlardı qollanbaqta.
Absorbciya bóliminde joqarıda keltirilgen úskenelerden tısqarı qosımsha qurılmalar – rezervuarlar, separatorlar h.t.b. bar.