Sabaqtın’ maqseti: oqıwshılardı tekst bo’limlerin o’z-ara baylanıstırıwg’a u’yretiw.
Sabaqtın’ barısı:
I. Su’wret penen islew.
Oqıtıwshı oqıwshılarg’a bayan jazıwda jazıw taxtasına jazılg’an u’zindiler tiykarında gu’rrin’ du’ziwi kerekligin aytadı. Gu’rrin’ du’ziwde su’wretlerden paydalanıwdı tu’sindiredi.
Oqıtıwshı na’wbet penen su’wretlerdi ko’rinetug’ın jerge ildiredi (Usı orında 2-klass ushın «Ana tili» sabaqılıg’ınan paydalanıw da mu’mkin). Balalar su’wretti ko’redi ha’m onın’ mazmunına qarap sorawlarg’a juwap beredi.
1-su’wret. Mazmunı: (Ana tawıq sho’jelerin da’nletip ju’rgen edi. Qırg’ıydı ko’rip tınıshsızlandı). Ana tawıq ne qılıp atırg’an edi? Ol ne ushın tınıshsızlandı?
2-su’wret. (Qırg’ıy terekke qondı. Ana tawıq sho’jelerin qanatları astına jasırdı). Qırg’ıy nege qondı? Tawıq sho’jelerin ne qıldı?
3-su’wret. (Qırg’ıy sho’jelerdi taba almay ushıp ketti. Ana tawıq sho’jelerin alıp u’yine qayttı). Qırg’ıy ne ushın ushıp ketti? Ana tawıq ne qıldı? Gu’rrin’di qalay atasaq boladı? Gu’rrin’di «Ana tawıq» dep atasaq boladı.
II. U’zindilerden du’zilgen gu’rrin’di (jazıw taxtasına jazılg’anlardı) analiz qılıw.
Gu’rrin’nin’ bo’limleri ta’rtibi buzılg’an halda jazıw taxtasına tsifrsız jazılg’an boladı. Balalar ha’r bir bo’limdi dawıs shıg’arıp oqıydı. Sonnan son’, bo’limlerdin’ qaysı su’wretke tiyisli ekenligin oylawg’a waqıt beriledi. Endi oqıtıwshı oqıwshılardın’ su’wret qaysı bo’limge tiyisli ekenligi, bo’limlerdi qanday jaylastırsa mazmunlı gu’rrin’ payda bolıwı haqqındag’ı pikirlerin esitedi. Sonnan keyin bir oqıwshı jazıw taxtasına su’wretler ta’rtibine sa’ykeslep, bo’limlerge tsifr qoyadı. Tsifrlar jazıw taxtasındag’ı teksttin’ izbe-izligin buzbag’an halda oqıwg’a ja’rdem beredi.
Oqıwshılar payda bolg’an gu’rrin’di da’slep ishinde, son’ tu’sinikli tu’rde dawıs shıg’arıp oqıydı.
Oqıtıwshı oqıwshılardın’ gu’rrin’ haqqındag’ı tu’siniklerin to’mendegi sorawlar arqalı tekseredi: «Ana tawıq ne ushın tınıshsızlandı? Ol sho’jelerin nege jasırdı? Ana tawıq ne qıldı?»
Do'stlaringiz bilan baham: |
