Bolalarda, Chanoq umurtqa pog‘onasi va oyoq shikastlarining xususiyatlari chanoq suyaklarining sinishI

3. Chanoq suyaklarining oldingi va orqa yarim halqalarining sinishi. Bunday jarohat 
qattiq ta’sir etuvchi kuch bevosita chanoq suyaklariga ta’sir qilganda aniqlanadi. Bemorlar 
holsizlangan holatda bo‘ladilar. Dastlabki soatlardayoq bemorlarda teri ostiga qon quyiladi, buni 
yorg‘oq va oraliq sohasida ham ko‘rish mumkin. Yonbosh suyagi qirralarining xanjarsimon 
o‘simtagacha bo‘lgan masofasi ikki xil bo‘ladi. Singan joyni paypaslaganda va bosib ko‘rganda 
og‘riq kuchayadi. Shu bilan bir qatorda bosib ko‘rganda chanoq suyaklarining bir-biriga nisbatan 
ikkala yarmining harakatlanishini ko‘rish mumkin. Bemor singan tarafdagi oyog‘ini 
harakatlantira olmaydi. 
Davosi. Dastlab karaxtlikka qarshi kurash olib boriladi. Keyin esa og‘riqsizlantirish 
muolajalari o‘tkaziladi. Agar suyaklar siljigan bo‘lsa, bemorning oyoqlari Beller shinasiga 
qo‘yilgan holatda tortib qo‘yiladi, undan keyin bemorni gamakka yotqiziladi. Davolash muddati 
6 haftadan kam bo‘lmaydi. 

---

Chanoq suyaklarining quymich kosachasi sohasida sinishi. Bu turdagi sinishlar ikki 
xil bo‘ladi: 
1) quymich kosachasining sinishi; 
2) quymich kosachasining sinishi bilan son suyagining chiqishi. 
Bu jarohatlanish ham ancha og‘ir kechadi. Bular ta’sir qiluvchi kuchlarning katta ko‘st 
sohasiga yon tomondan ta’sir qilganda yoki kuch son suyagining o‘qi bo‘ylab ta’sir qilganda 
uchraydi. Klinik belgilarda asosiy o‘rinni quymich kosachasi sohasidagi og‘riq egallaydi. Agar 
sinish bilan birga son suyagi chiqqan bo‘lsa, bemor oyog‘ini umuman harakatlantira olmaydi. 
Katta ko‘st Rozer—Nelaton chizig‘idan yuqorida bo‘ladi. Agar quymich kosachasining o‘zi 
singan bo‘lsa va oyoq o‘qi bo‘yicha og‘irlik berilsa, og‘riq kuchayadi. Rentgen tasvirda singan 
yerni ko‘rish mumkin. Agar sinish chizig‘i U-simon tog‘aydan o‘tgan bo‘lsa, ikki quymich 
kosachasini solishtirish ko‘proq ma’lumot beradi. 
Davosi. Albatta bunday bemorlarda Shkolnikov uslubi bo‘yicha 1% li novokain bilan 
og‘riqsizlantirish o‘tkaziladi. Agar quymich kosachasi sinib, suyaklar siljimagan bo‘lsa, bu 
bemorlarning oyog‘ini Beller shinasiga tortib, tosh osiladi. Agar suyaklar siljigan bo‘lsa, 
ko‘pincha qo‘shimcha ravishda katta ko‘stdan ham tortib qo‘yiladi. Bu holatda bemorlar 5 hafta 
yotadilar. Agar konservativ muolajalar yordam bermasa, operatsiya o‘tkaziladi. 6-haftadan 
boshlab bemorlar qo‘ltiqtayokda yuradilar. Qo‘ltiqtayoqsiz yurishga 3—6 oydan keyin ruxsat 
beriladi.