Бухгалтерия баланси 1-сонли шакл

2-§. БУХГАЛТЕРИЯ БАЛАНСИ (1-СОН ШАКЛ)
16. Бухгалтерия баланси (кейинги ўринларда — баланс) тузилгунига қадар ҳисобот даври охиридаги аналитик ҳисоблар бўйича айланмалар ва қолдиқлар Бош китобдаги синтетик ҳисоблар бўйича айланмалар ва қолдиқлар билан албатта солиштирилиши керак.
17. 3-устунда ҳисобот даври бошига маълумотлар, яъни олдинги ҳисобот даври учун баланснинг 4-устуни маълумотлари кўрсатилади.
18. Асосий воситалар балансда «Бошланғич (қайта тиклаш) қиймати» (010-сатр) моддаси бўйича ўз асосий воситалари (ишлаб турган ҳамда консервацияда бўлган) ва молиявий ижара шартномаси бўйича олинган асосий воситалар бошланғич (қайта тиклаш) қиймати бўйича кўрсатилади ва уларнинг ҳисоби асосий воситаларни ҳисобга олувчи ҳисобларда (0100) ва 0310 «Молиявий ижара шартномаси бўйича олинган асосий воситалар» ҳисобида амалга оширилади.
Алоҳида «Эскириш суммаси» (011-сатр) моддаси бўйича ташкилот томонидан асосий воситаларни ҳисобга олувчи ҳисобларда (0100) ва 0310 «Молиявий ижара шартномаси бўйича олинган асосий воситалар»ҳисобида ҳисобга олинган асосий воситалар бўйича ҳисобланган эскириш суммаси келтирилади ва уларнинг ҳисоби асосий воситаларнинг эскиришини ҳисобга олувчи ҳисобларда(0200) амалга оширилади.
«Қолдиқ (баланс) қиймати» (012-сатр) моддаси бўйича 010 «Бошланғич (қайта тиклаш) қиймати» ва 011 «Эскириш суммаси» сатрлари фарқи акс эттирилади.
19. Номоддий активлар балансда «Бошланғич қиймати» (020-сатр) моддаси бўйича табиий ресурслардан, ер майдонларидан фойдаланиш ҳуқуқи, патентлар, лицензиялар, савдо белгилари, товар белгилари, саноат намуналарига бўлган ҳуқуқлар, муаллифлик ҳуқуқлари ва бошқалар сифатида номоддий активларнинг бошланғич (қайта тиклаш) қиймати бўйича кўрсатилади ва уларнинг ҳисоби номоддий активларни ҳисобга олувчи ҳисобларда (0400)амалга оширилади.
Бу модда бўйича ҳисобот даври учун амалга оширилган ҳисобдан чиқаришларни чегирган ҳолдаги гудвилл (фирма нархи) суммаси ҳам акс эттирилади. Бухгалтерия ҳисобида гудвилл (фирма нархи) номоддий активининг суммасини ҳисобдан чиқариш алоҳида ҳисобда амортизация суммаси сифатида жамланмасдан, бевосита 0480 «Гудвилл»ҳисоби сальдосини камайтиришга олиб борилади.
Алоҳида «Амортизация суммаси» (021-сатр) моддаси бўйича номоддий активлар бўйича ҳисобланган амортизация суммаси келтирилади ва уларнинг ҳисоби номоддий активлар амортизациясини ҳисобга олувчи ҳисобларда (0500) юритилади.
«Қолдиқ (баланс) қиймати» (022-сатр) моддаси бўйича 020 «Бошланғич қиймати» ва 021 «Амортизация суммаси» сатрлари фарқи акс эттирилади.
20. «Узоқ муддатли инвестициялар, жами» (030-сатр)моддаси бўйича 040, 050, 060, 070, 080-сатрларда кўрсатилган қимматли қоғозларга, шўъба ва қарам хўжалик жамиятларига, чет-эл капитали мавжуд бўлган корхоналарга ва бошқа узоқ муддатли инвестицияларга қўйилган маблағлар суммаси кўрсатилади.
Инвестор дивидендлар олиш ҳуқуқига эга бўлган ва ушбу қўйилмалар бўйича тўлиқ масъулиятни зиммасига олган ҳолларда қимматли қоғозлар баланс активида уларнинг тўла харид қийматида кўрсатилади, улар бўйича қопланмаган сумма баланс пассивида кредиторлар моддасига тааллуқли бўлади. Қолган ҳолларда харид қилинадиган қимматли қоғозлар ҳисобига киритилган суммалар баланс активида дебиторлар моддаси бўйича кўрсатилади.
21. «Қимматли қоғозлар» (040-сатр) моддаси бўйича 0610 «Қимматли қоғозлар» ҳисобида ҳисобга олинадиган облигациялар, акциялар ва бошқа қимматли қоғозларга киритилган сумма кўрсатилади, шўъба ва қарам жамиятларининг қимматли қоғозлари бундан мустасно.
22. «Шўъба хўжалик жамиятларига инвестициялар» (050-сатр) моддаси бўйича 0620 «Шўъба хўжалик жамиятларига инвестициялар» ҳисобида ҳисобга олинадиган шўъба хўжалик жамиятларининг акциялари, облигациялари ва бошқа инвестицияларига киритилган маблағлар суммаси кўрсатилади.
23. «Қарам хўжалик жамиятларига инвестициялар» (060-сатр) моддаси бўйича 0630 «Қарам хўжалик жамиятларига инвестициялар»ҳисобида ҳисобга олинадиган қарам хўжалик жамиятларининг акциялари, облигациялари ва бошқа инвестицияларига киритилган маблағлар суммаси акс эттирилади.
24. «Чет эл капитали мавжуд бўлган корхоналарга инвестициялар» (070-сатр) моддаси бўйича 0640 «Чет-эл капитали мавжуд бўлган корхоналарга инвестициялар»ҳисобида ҳисобга олинадиган чет эл капитали мавжуд бўлган корхоналарнинг акциялари, облигациялари, устав капиталига улушлари ва бошқа инвестицияларига киритилган маблағлар суммаси кўрсатилади.
25. «Бошқа узоқ муддатли инвестициялар» (080-сатр) моддаси бўйича юқорида саналган моддаларда ҳисобга олинмаган ва 0690 «Бошқа узоқ муддатли инвестициялар»ҳисобида ҳисобга олинадиган узоқ муддатли инвестицияларга киритилган маблағлар суммаси кўрсатилади.
26. «Ўрнатиладиган асбоб-ускуналар» (090-сатр) моддаси бўйича ҳисоби 0710 «Ўрнатиладиган асбоб-ускуналар — маҳаллий» ва 0720 «Ўрнатиладиган асбоб-ускуналар — хорижий» ҳисобларида юритиладиган ўрнатиладиган асбоб-ускуналар ҳақиқий қиймати бўйича кўрсатилади.
27. «Капитал қўйилмалар» (100-сатр) моддаси бўйича ҳисоби капитал қўйилмаларни ҳисобга олувчи ҳисобларида (0800) юритиладиган хўжалик ва пудрат усулида амалга ошириладиган тугалланмаган қурилиш қиймати, фойдаланишга топширилмаган харид қилинган асосий воситалар ва номоддий активлар қиймати, асосий подани шакллантириш харажатлари, шунингдек ерни, молиявий ижара шартномаси бўйича олинган асосий воситаларни ободонлаштиришга ва бошқа воситаларга қўйилмалар суммалари кўрсатилади.
28. «Узоқ муддатли дебиторлик қарзлари» (110-сатр) моддаси бўйича ҳисоби 0910 «Олинган векселлар», 0920 «Молиявий ижара бўйича олинадиган тўловлар», 0930 «Ходимларнинг узоқ муддатли қарзлари», 0940 «Бошқа узоқ муддатли дебитор қарзлар» ҳисобларида юритиладиган олинган векселларнинг узоқ муддатли қисми, молиявий ижара шартномаси бўйича берилган асосий воситалар учун олинадиган тўловлар қолдиғи, ходимларнинг узоқ муддатли қарзи ва бошқа узоқ муддатли дебиторлик қарзлари кўрсатилади.
29. «Узоқ муддатли кечиктирилган харажатлар» (120-сатр) моддаси бўйича ҳисоби 0950 «Вақтинчалик фарқлар бўйича кечиктирилган фойда солиғи», 0960 «Дисконт (чегирма)лар бўйича узоқ муддатли кечиктирилган харажатлар», 0990 «Бошқа узоқ муддатли кечиктирилган харажатлар» ҳисобларида юритиладиган вақтинчалик фарқлар бўйича кечиктирилган фойда солиғи, дисконт (чегирма)лар бўйича узоқ муддатли кечиктирилган харажатлар ва бошқа узоқ муддатли кечиктирилган харажатлар кўрсатилади.
30. «I бўлим бўйича жами» (130-сатр) моддаси бўйича 012, 022, 030, 090, 100, 110, 120-сатрлар бўйича сумма кўрсатилади.
31. «Товар-моддий захиралари, жами» (140-сатр) моддаси бўйича 150, 160, 170, 180-сатрларда кўрсатилган ишлаб чиқариш захираларининг қолдиқлари, тугалланмаган ишлаб чиқариш, тайёр маҳсулот ва товарлар суммаси кўрсатилади.
32. «Ишлаб чиқариш захиралари» (150-сатр)моддаси бўйича материалларни ҳисобга олувчи ҳисобларда (1000) ҳисобга олинадиган хом-ашё захиралари, сотиболинган ярим тайёр маҳсулотлар ва бутловчи буюмлар, ёқилғилар, эҳтиёт қисмлар, қурилиш материаллари, идиш ва идишбоб материаллари, инвентар ва хўжалик жиҳозлари, қайтариладиган чиқиндилар ва бошқа моддий қийматликларнинг ҳақиқий таннархи кўрсатилади.
Ушбу модда бўйича, шунингдек, ўстиришдаги ва боқувдаги ҳайвонларни ҳисобга олувчи ҳисобларда (1100) ҳисобга олинадиган ёш ҳайвонлар; бўрдоқига яйловда боқилаётган катта ёшдаги ҳайвонлар; паррандалар; ёввойи ҳайвонлар; қуёнлар; асалари оиласи; сотиш учун асосий подадан чиқарилган (бўрдоқига боқиш учун қўйилмаган) катта ёшдаги чорва моллар; аҳолидан сотиш учун қабул қилинган чорва молларнинг ҳақиқий таннархи акс эттирилади.
Материалларни тайёрлаш ва харид қилишни ҳисобга олувчи ҳисоблар (1500) ва материаллар қийматидаги фарқларни ҳисобга олувчи ҳисоблардан (1600) фойдаланилганда ушбу ҳисобларда кўрсатилган қимматликлар «Ишлаб чиқариш захиралари» моддаси бўйича акс эттирилади.
33. «Тугалланмаган ишлаб чиқариш» (160-сатр) моддаси бўйича ҳисоби асосий ишлаб чиқаришни ҳисобга олувчи ҳисоблар (2000), ўзида ишлаб чиқарилган ярим тайёр маҳсулотларни ҳисобга олувчи ҳисоблар (2100), ёрдамчи ишлаб чиқаришни ҳисобга олувчи ҳисоблар (2300), хизмат кўрсатувчи хўжаликларни ҳисобга олувчи ҳисобларда (2700) амалга ошириладиган тугалланмаган ишлаб чиқариш ва тугалланмаган ишлар (хизматлар) бўйича харажатлар кўрсатилади.
34. «Тайёр маҳсулот» (170-сатр) моддаси бўйича ишлаб чиқариши тугалланган, синов ва қабул қилишдан ўтган, буюртмачилар билан шартнома шартларига кўра барча қисмлар билан бутланган ва техник шартлар ҳамда стандартларга мувофиқ бўлган буюмлар қолдиғи, кўргазмада бўлган ва бошқа корхоналарга комиссияга (консигнацияга) берилган, тайёр маҳсулотларни ҳисобга олувчи ҳисобларда (2800) ҳисобга олинадиган тайёр маҳсулотнинг ҳақиқий ишлаб чиқариш таннархи кўрсатилади. Кўрсатилган талабларга жавоб бермайдиган маҳсулотлар ва топширилмаган ишлар тугалланмаган деб ҳисобланади ва тугалланмаган ишлаб чиқариш таркибида кўрсатилади.
35. «Товарлар» (180-сатр) моддаси бўйича омборлардаги товарлар қолдиқлари қиймати, чакана савдодаги товарлар қиймати, кўргазмада бўлган ва бошқа корхоналарга комиссияга (консигнацияга) берилган товарлар қиймати, прокатдаги буюмлари, товар билан банд бўлган ва бўш идишлар қиймати, йўлдаги товарлар, савдо устамасини чегирган ҳолда савдо ёки умумий овқатланишда ўз фаолиятини амалга оширадиган корхоналар харид қилган ҳисобга олинадиган бошқа товарлар қиймати кўрсатилади ва уларнинг ҳисоби товарларни ҳисобга олувчи ҳисобларида (2900) юритилади.
ж/36. «Келгуси давр харажатлари» (190-сатр)моддаси бўйича келгуси давр харажатларини ҳисобга олувчи ҳисобларда (3100) акс эттирилган, ҳисобот даврида амалга оширилган, лекин у тааллуқли бўлган муддат давомида кейинги ҳисобот даврларида молиявий-хўжалик фаолияти харажатларига киритиладиган харажатлар суммаси кўрсатилади. Бундай харажатларга оммавий ахборот воситалари нашрига обуна бўйича харажатлар, олдиндан тўланган ижара ҳақи ва бошқалар киради.
ж/37. «Кечиктирилган харажатлар» (200-сатр) моддаси бўйича кечиктирилган харажатларни ҳисобга олувчи ҳисобларда (3200) ҳисобга олинган вақтинчалик фарқлар бўйича кечиктирилган фойда солиғининг жорий қисми, дисконт (чегирма)лар бўйича кечиктирилган харажатлар ва бошқа кечиктирилган харажатлар кўрсатилади.
38. «Дебиторлар, жами» (210-сатр) моддаси бўйича 220, 240, 250, 260, 270, 280, 290, 300, 310-сатрларда кўрсатилган харидорлар ва буюртмачилар қарзлари, шўъба ва қарам хўжалик жамиятларининг қарзи, мол етказиб берувчилар, пудратчилар, ходимларга берилган бўнаклар; бюджетга, давлат мақсадли жамғармаларига ва суғурта бўйича бўнак тўловлари; таъсисчиларнинг устав капиталига улушлар бўйича қарзи ва турли дебиторларнинг қарзлари суммасининг умуми сифатида жами дебиторлик қарзи кўрсатилади.
211-сатрда маълумот учун дебиторлик қарзининг муддати ўтказиб юборилган қисми кўрсатилади.
39. «Харидорлар ва буюртмачиларнинг қарзи» (220-сатр) моддаси бўйича шубҳали қарзлар бўйича резерв чегирилган холда буюртмачилар (харидорлар)га сотилган маҳсулот, товарлар, топширилган ишлар ва кўрсатилган хизматлар учун қарзлар кўрсатилади.
ж/40. «Ажратилган бўлинмаларнинг қарзи» моддаси бўйича (230-сатр) ҳисоби 4110 «Ажратилган бўлинмалардан олинадиган ҳисоблар»да юритиладиган ажратилган бўлинмалар (филиаллар, ваколатхоналар)нинг жорий қарзи акс эттирилади. Мазкур модда бўйича ахборотлар маълумот учун келтирилади.
41. «Шўъба ва қарам хўжалик жамиятларининг қарзи» (240-сатр) моддаси бўйича ҳисоби 4120 «Шўъба ва қарам хўжалик жамиятларидан олинадиган ҳисоблар»да юритиладиган шўъба ва қарам хўжалик жамиятларининг жорий қарзлари (ички идоравий ҳисоб-китоблари) акс эттирилади. Шўъба ва (ёки) қарам хўжалик жамиятларига инвестициялар ҳисоби Ўзбекистон Республикаси Молия вазирлиги томонидан 1998 йил 14 октябрда 50-сон билан тасдиқланган Бухгалтерия ҳисобининг миллий стандарти (8-сонли БҲМС) «Консолидациялашган молиявий ҳисоботлар ва шўъба хўжалик жамиятларига инвестициялар ҳисоби»га (рўйхат рақами 580, 1998 йил 28 декабрь) мувофиқ бош жамиятнинг молиявий ҳисоботида консолидацияланиши лозим.
42. «Ходимларга берилган бўнаклар» (250-сатр) моддаси бўйича ходимларга меҳнат ҳақи бўйича, хизмат сафарларига, умумхўжалик харажатларига ва бошқа келгуси ҳисоб-китоблар бўйича берилган бўнаклар суммаси кўрсатилади. Ходимларга берилган бўнаклар ҳисоби ходимларга берилган бўнакларни ҳисобга олувчи ҳисобларда (4200) юритилади.
43. «Мол етказиб берувчилар ва пудратчиларга берилган бўнаклар» (260-сатр) моддаси бўйича қонун ҳужжатларига мувофиқ, муддати бир йилдан кам бўлган келгуси ҳисоб-китоблар учун бошқа корхоналарга тўланган бўнаклар суммаси кўрсатилади. Мол етказиб берувчилар ва пудратчиларга берилган бўнаклар ҳисоби мол етказиб берувчилар ва пудратчиларга берилган бўнакларни ҳисобга олувчи ҳисобларда (4300) юритилади.
44. «Бюджетга солиқлар ва бошқа мажбурий тўловлар бўйича бўнак тўловлари» (270-сатр) моддаси бўйича бюджетга солиқлар ва бошқа мажбурий тўловлар бўйича бўнак тўловлари ҳамда ортиқча тўловлар кўрсатилади. Бюджетга солиқлар ва бошқа мажбурий тўловлар бўйича бўнак тўловлари ҳисоби 4410 «Бюджетга солиқлар ва бошқа мажбурий тўловлар бўйича бўнак тўловлари(турлари бўйича)»ҳисобида юритилади.
45. «Давлат мақсадли жамғармалари ва суғурталар бўйича бўнак тўловлари» (280-сатр) моддаси бўйича ҳисоби давлат мақсадли жамғармаларига ва суғурталар бўйича бўнак тўловларини ҳисобга олувчи счётларда (4500) юритиладиган давлат мақсадли жамғармаларига ва суғурталар бўйича бўнак тўловлари ва ортиқча тўловлар кўрсатилади.
46. «Таъсисчиларнинг устав капиталига улушлар бўйича қарзи» (290-сатр) моддаси бўйича 4610 «Устав капиталига таъсисчиларнинг улушлари бўйича қарзи»ҳисобида ҳисобга олинадиган таъсисчиларнинг устав капиталига улушлар бўйича қарзи кўрсатилади.
47. «Ходимларнинг бошқа операциялар бўйича қарзи» (300-сатр) моддаси бўйича корхона ходимларининг кредитга сотилган товарлар бўйича, ходимларга берилган қарзлар (займлар) бўйича, корхонага етказилган моддий зарарни қоплаш бўйича қарзи ва ходимларнинг бошқа қарзлари кўрсатилади. Ходимларнинг бошқа операциялар бўйича қарзлари ҳисоби ходимларнинг бошқа операциялар бўйича қарзини ҳисобга олувчи ҳисобларда (4700) юритилади.
48. «Бошқа дебиторлик қарзлари» (310-сатр) моддаси бўйича ҳисоби турли дебиторлар қарзларини ҳисобга олувчи ҳисобларида (4800) амалга ошириладиган турли дебиторларнинг юқорида кўрсатилган дебиторлар билан ҳисоб-китоблар моддаларида акс эттирилмаган қарзлари кўрсатилади, хусусан, олинадиган фоиз ва дивидендлар, молиявий ижара бўйича жорий тўловлар, оператив ижара бўйича тўловлар; роялти бўйича олинадиган ҳисоблар, қарздорларлиги тан олинган ёки улар бўйича суд ёки бошқа идоранинг уларни ундириш тўғрисида қарори олинган, молия-хўжалик фаолияти натижаларига олиб борилган жарималар, пеня ва неустойкалар ҳамда бошқа шахсларнинг қарзи кўрсатилади.
49. «Пул маблағлари, жами» (320-сатр) моддаси бўйича 330, 340, 350, 360-сатрларда кўрсатилган кассадаги, ҳисоб-китоб ва валюта ҳисобларидаги пул маблағлари суммаси, шунингдек бошқа пул маблағлари кўрсатилади. Баланснинг ушбу моддаларида акс эттирилган суммалар банк кўчирмаларига ва касса ҳисоботи бўйича пул маблағлари қолдиқларига мос келиши керак.
50. «Кассадаги пул маблағлари» (330-сатр) моддаси бўйича ҳисобот даврининг охирги санасига корхона кассаларидаги, миллий валюта ва чет эл валютасидаги пул маблағлари қолдиғи кўрсатилади. Кассадаги пул маблағлари ҳисоби кассадаги пул маблағларини ҳисобга олувчи ҳисобларда (5000) амалга оширилади.
51. «Ҳисоб-китоб ҳисобидаги пул маблағлари» (340-сатр) моддаси бўйича ҳисобот даврининг охирги санасига банклардаги ҳисоб-китоб ҳисобларида мавжуд бўлган, миллий валютада пул маблағлари қолдиғи кўрсатилади. Ҳисоб-китоб ҳисобида миллий валютадаги пул маблағларининг ҳисоби 5110 «Ҳисоб-китоб ҳисоби»ҳисобида юритилади.
52. «Чет эл валютасидаги пул маблағлари» (350-сатр) моддаси бўйича корхонанинг банклардаги валюта ҳисобларида мавжуд бўлган, ҳисобот даврининг охирги санасидаги Ўзбекистон Республикаси Марказий банкининг курси бўйича миллий валютада баҳоланган валюта маблағларининг қолдиғи кўрсатади. Чет эл валютасидаги пул маблағларининг ҳисоби чет эл валютасидаги пул маблағларини ҳисобга олувчи ҳисобларда (5200) юритилади.
53. «Бошқа пул маблағлари ва эквивалентлари» (360-сатр) моддаси бўйича банкдаги махсус ҳисоблардаги пул маблағларини ҳисобга олувчи ҳисоблар (5500), пул эквивалентларини ҳисобга олувчи ҳисоблар (5600), йўлдаги пул маблағларини (ўтказмаларини)ҳисобга олувчи ҳисобларида (5700)ҳисобга олинадиган корхонанинг пул маблағлари қолдиғи кўрсатилади.
54. «Қисқа муддатли инвестициялар» (370-сатр) моддаси бўйича ҳисоби қисқа муддатли инвестицияларни ҳисобга олувчи ҳисобларида (5800) амалга ошириладиган корхонанинг бошқа корхоналар қимматли қоғозларига, давлат облигациялари ва маҳаллий қарз (заём) ҳамда шу сингариларга қисқа муддатли (12 ойдан ошмайдиган муддатга) инвестициялар, шунингдек бошқа корхоналарга берилган қарзлар ва бошқа жорий инвестициялар кўрсатилади.
55. «Бошқа жорий активлар» (380-сатр)моддаси бўйича ҳисоби 5910 «Камомадлар ва қийматликларнинг бузилишидан йўқотишлар» ва 5920 «Бошқа жорий активлар» ҳисобларида юритиладиган мазкур ҳисобот даврида инвентаризацияда аниқланган ва улар бўйича айбдор шахслар бузилишидан камомадлар, ўғирликлар ва қийматликларни шикастлашдан йўқотишлар суммаси ҳамда юқорида келтирилган бўлим моддаларида назарда тутилмаган, бироқ корхона мулки ҳисобланган бошқа жорий активлар кўрсатилади.
56. «II бўлим бўйича жами» (390-сатр)моддаси бўйича 140, 190, 200, 210, 320, 370, 380-сатрлар бўйича сумма кўрсатилади.
57. «Баланс активи бўйича жами» (400-сатр)моддаси бўйича сатрларни қўшиш йўли билан олинган активларнинг жами суммаси кўрсатилади 130-сатр + 390-сатр.
58. «Устав капитали» (410-сатр) моддаси бўйича таъсис ҳужжатларида корхона таъсисчилари улушларининг (ҳиссалари, номинал қиймат бўйича акциялари, пай бадалларининг) йиғиндиси сифатида рўйхатга олинган устав капитали миқдори кўрсатилади. Устав капиталининг ҳисоби устав капиталини ҳисобга олувчи ҳисобларда (8300) юритилади.
59. «Қўшилган капитал» (420-сатр) моддаси бўйича ҳисоби қўшилган капитални ҳисобга олувчи ҳисобларда (8400) юритиладиган акцияларни номинал қийматдан юқори нархларда бирламчи сотишда олинган эмиссион даромад суммаси, корхонанинг устав капиталини шакллантиришда таъсис ҳужжатларини рўйхатга олиш санаси билан маблағларни устав капиталига ҳақиқатда киритиш санасидаги Ўзбекистон Республикаси Марказий банкининг курслари ўртасида юзага келадиган курслардаги фарқ суммаси кўрсатилади.
60. «Резерв капитали» (430-сатр) моддаси бўйича ҳисоби резерв капиталини ҳисобга олувчи ҳисобларда (8500) юритиладиган узоқ муддатли активларни қайта баҳолашда ҳосил бўладиган инфляция резервлари, қонунчилик ва таъсис ҳужжатларида назарда тутилган миқдорларда соф фойдадан ажратмалар ҳисобига ташкил этилган резерв фонди, шунингдек текинга олинган мол-мулк қиймати кўрсатилади,.
Мазкур модда бўйича солиқ солишдан озод қилиш натижасида бўшайдиган маблағларни қонунчиликда ўрнатилган тартибда мақсадли вазифаларни бажаришга йўналтириш шарти билан божхона тўловларини, бюджетга солиқлар ва мажбурий тўловларни тўлаш бўйича солиқ имтиёзлари суммалари ҳам акс эттирилади.
61. «Сотиб олинган хусусий акциялар» (440-сатр) моддаси бўйича корхонада бўлган, уларни кейинчалик тарқатиш ёки йўқ қилиш (бекор қилиш) учун сотиб олинган хусусий акциялари, ҳиссалари ва пайларининг қиймати кўрсатилади. Сотиб олинган хусусий акциялари, ҳиссалари ва пайлари сотиб олинган хусусий акцияларини ҳисобга олувчи ҳисобларида (8600) ҳисобга олинади.
62. «Тақсимланмаган фойда (қопланмаган зарар)» (450-сатр) моддаси бўйича ҳисоби тақсимланмаган фойда (қопланмаган зарар)ни ҳисобга олувчи ҳисобларида (8700) юритиладиган ҳисобот йилининг соф фойдаси (зарари) ва ўтган йилларнинг жамғарилган фойдаси (зарари) акс эттирилади.
Агар корхона зарар олган бўлса, ҳисобот даврининг охирида ушбу зарар ушбу модда бўйича «минус» белгиси билан кўрсатилади.
63. «Мақсадли тушумлар» (460-сатр) моддаси бўйича мақсадли тушумларни ҳисобга олувчи ҳисобларида (8800) ҳисобга олинган, олинган грантлар, субсидиялар, аъзолик бадаллари, мақсадли фойдаланиладиган солиқ имтиёзлари суммалари ва мақсадли тадбирларни амалга ошириш учун бошқа мақсадли тушумлар кўрсатилади.
64. «Келгуси давр харажатлари ва тўловлари учун захиралар» (470-сатр) моддаси бўйича корхона томонидан келгуси харажатлар ва тўловлар учун харажатларда бир текисда тақсимлаш мақсадида захира қилинган маблағлар кўрсатилади.
65. «I бўлим бўйича жами» (480-сатр) моддаси бўйича қуйидагиларни натижаси кўрсатилади: 410-сатр+420-сатр+430-сатр-440-сатр+450-сатр+460-сатр+470-сатр.
66. «Узоқ муддатли мажбуриятлар, жами» (490-сатр) моддаси бўйича 500, 520, 530, 540, 550, 560, 570, 580, 590-сатрларда кўрсатилган корхонанинг узоқ муддатли (қоплаш муддати бир йилдан ортиқ бўлган) мажбуриятлари кўрсатилади.
491-сатрда маълумот учун 500, 520, 540, 560, 590-сатрларда кўрсатилган корхонанинг узоқ муддатли кредиторлик қарзлари суммаси кўрсатилади.
67. «Мол етказиб берувчилар ва пудратчиларга узоқ муддатли қарз» (500-сатр) моддаси бўйича ҳисоби 7010 «Мол етказиб берувчилар ва пудратчиларга тўланадиган ҳисоблар» ва 7020 «Берилган векселлар» ҳисобларида юритиладиган, олинган мол-мулк, бажарилган ишлар ва кўрсатилган хизматлар учун мол етказиб берувчилар ва пудратчиларга узоқ муддатли мажбуриятлар суммаси кўрсатилади.
68. «Ажратилган бўлинмаларга узоқ муддатли қарз» (510-сатр) моддаси бўйича ҳисоби 7110 «Ажратилган бўлинмаларга бўлган узоқ муддатли қарз»ҳисобида юритиладиган ажратилган бўлинмалар (филиаллар, ваколатхоналар)га узоқ муддатли мажбуриятлар акс эттирилади. Мазкур модда бўйича ахборотлар маълумот учун келтирилади.
69. «Шўъба ва қарам хўжалик жамиятларига узоқ муддатли қарз» (520-сатр) моддаси бўйича ҳисоби 7120 «Шўъба ва қарам хўжалик жамиятларига бўлган узоқ муддатли қарз»ҳисобида юритиладиган шўъба ва қарам хўжалик жамиятларига бўлган узоқ муддатли қарзлар (ички идора ҳисоб-китоблари) акс эттирилади.
70. «Узоқ муддатли кечиктирилган даромадлар» (530-сатр) моддаси бўйича ҳисоби 7210 «Дисконт (чегирма) кўринишидаги узоқ муддатли кечиктирилган даромадлар», 7220 «Мукофот (устама)лар кўринишидаги узоқ муддатли кечиктирилган муддатли даромадлар», 7230 «Бошқа узоқ муддатли кечиктирилган даромадлар» ҳисобларида амалга ошириладиган корхонанинг узоқ муддатли кечиктирилган мажбуриятлари суммаси кўрсатилади.
71. «Солиқлар ва бошқа мажбурий тўловлар бўйича узоқ муддатли кечиктирилган мажбуриятлар» (540-сатр) моддаси бўйича ҳисоби 7240 «Солиқлар ва бошқа мажбурий тўловлар бўйича узоқ муддатли кечиктирилган мажбуриятлар» ҳисобида амалга ошириладиган ташкилотларнинг солиқлар ва бошқа мажбурий тўловлар бўйича узоқ муддатли мажбуриятлари суммаси кўрсатилади.
72. «Бошқа узоқ муддатли кечиктирилган мажбуриятлар» (550-сатр) моддаси бўйича ҳисоби 7250 «Вақтинчалик фарқ бўйича кечиктирилган фойда солиғи бўйича узоқ муддатли мажбуриятлар», 7290 «Бошқа узоқ муддатли кечиктирилган мажбуриятлар»ҳисобларида юритиладиган, корхоналарнинг молия-хўжалик фаолияти билан боғлиқ, бошқа узоқ муддатли кечиктирилган мажбуриятлари суммаси кўрсатилади.
73. «Харидорлар ва буюртмачилардан олинган бўнаклар» (560-сатр) моддаси бўйича 7310 «Харидорлар ва буюртмачилардан олинган бўнаклар»ҳисобида ҳисобга олинган, келгуси ҳисоб-китоблар бўйича бўнаклар кўринишида бошқа ташкилотлардан олинган узоқ муддатли қарзлар суммаси кўрсатилади.
74. «Узоқ муддатли банк кредитлари» (570-сатр) моддаси бўйича 7810 «Узоқ муддатли банк кредитлари»ҳисобида ҳисобга олинган, олинган узоқ муддатли кредитлар бўйича банклардан қарз суммалари кўрсатилади.
75. «Узоқ муддатли қарзлар» (580-сатр) моддаси бўйича 7820 «Узоқ муддатли қарзлар», 7830 «Тўланадиган облигациялар», 7840 «Тўланадиган векселлар» ҳисобларида ҳисобга олинган, бошқа корхоналар ва муассасалардан узоқ муддатли қарзлар бўйича қарз суммалари кўрсатилади.
76. «Бошқа узоқ муддатли кредиторлик қарзлар» (590-сатр) моддаси бўйича турли кредиторларга бўлган узоқ муддатли қарзларни ҳисобга олувчи ҳисобларида (7900) ҳисобга олинган, корхонанинг ижарага берувчи (лизинг берувчи), ходимлар, турли жисмоний ва юридик шахслар олдида турли хил нотижорий операциялар бўйича узоқ муддатли мажбуриятлари суммалари, суд органларининг ижро ҳужжатлари ёки қарорлари асосида турли ташкилотлар ва айрим шахслар фойдасига корхона ходимларининг иш ҳақидан ушланган суммалар кўрсатилади.
77. «Жорий мажбуриятлар, жами» (600-сатр)моддаси бўйича 610, 630, 640, 650, 660, 670, 680, 690, 700, 710, 720, 730, 740, 750, 760-сатрларда кўрсатилган корхонани жорий мажбуриятларининг (бир йилдан кам бўлган муддатли) суммаси акс эттирилади.
601-сатрда 610, 630, 650, 670, 680, 690, 700, 710, 720, 760-сатрда кўрсатилган корхонани жорий кредиторлик қарзларининг суммаси маълумот учун кўрсатилади.
602-сатрда корхонани жорий кредиторлик қарзларининг муддати ўтган қисми маълумот учун кўрсатилади.
78. «Мол етказиб берувчилар ва пудратчиларга қарз» (610-сатр) моддаси бўйича ҳисоби 6010 «Мол етказиб берувчилар ва пудратчиларга тўланадиган ҳисоблар» ва 6020 «Берилган векселлар» ҳисобларида юритиладиган олинган мол-мулк, бажарилган ишлар ва кўрсатилган хизматлар учун мол етказиб берувчилар ҳамда пудратчилар олдидаги жорий мажбуриятлар суммаси кўрсатилади.
79. «Ажратилган бўлинмаларга қарз» (620-сатр) моддаси бўйича ҳисоби 6110 «Ажратилган бўлинмаларга тўланадиган ҳисоблар»ҳисобида юритиладиган, ажратилган бўлинмалар (филиаллар, ваколатхоналар)га жорий мажбуриятлар акс эттирилади. Мазкур модда бўйича ахборотлар маълумот учун келтирилади.
80. «Шўъба ва қарам хўжалик жамиятларига қарз» моддаси бўйича (630-сатр) ҳисоби 6120 «Шўъба ва қарам хўжалик жамиятларига тўланадиган ҳисоблар»ҳисобида юритиладиган, шўъба ва қарам хўжалик жамиятларига жорий қарзлар (ички идора ҳисоб-китоблари) акс эттирилади.
81. «Кечиктирилган даромадлар» (640-сатр) моддаси бўйича ҳисоби 6210 «Дисконт (чегирма)лар кўринишидаги кечиктирилган даромадлар», 6220 «Мукофот (устама)лар кўринишидаги кечиктирилган даромадлар», 6230 «Бошқа кечиктирилган даромадлар» ҳисобларида юритиладиган, кечиктирилган даромад бўйича корхоналар мажбуриятларининг суммаси кўрсатилади.
82. «Солиқлар ва бошқа мажбурий тўловлар бўйича кечиктирилган мажбуриятлар» (650-сатр) моддаси бўйича ҳисоби 6240 «Солиқлар ва бошқа мажбурий тўловлар бўйича кечиктирилган мажбуриятлар»ҳисобида амалга ошириладиган, ташкилотларнинг солиқлар ва бошқа мажбурий тўловлар бўйича узоқ муддатли мажбуриятлари суммасининг жорий қисми кўрсатилади.
83. «Бошқа кечиктирилган мажбуриятлар» (660-сатр) моддаси бўйича ҳисоби 6250 «Вақтинчалик фарқлар бўйича кечиктирилган фойда солиғи бўйича мажбуриятлар», 6290 «Бошқа кечиктирилган мажбуриятлар» ҳисобларида юритиладиган, корхонанинг молия-хўжалик фаолияти билан боғлиқ, бошқа кечиктирилган мажбуриятлар суммаси кўрсатилади.
84. «Олинган бўнаклар» (670-сатр) моддаси бўйича олинган бўнакларни ҳисобга олувчи ҳисобларида (6300) ҳисобга олинган бошқа ташкилотлардан келгуси ҳисоб-китоблар бўйича бўнаклар кўринишида олинган қарз суммаси кўрсатилади.
85. «Бюджетга тўловлар бўйича қарз» (680-сатр) моддаси бўйича 6410 «Бюджетга тўловлар бўйича (турлар бўйича) қарз»ҳисобида ҳисобга олинадиган, бюджетга тўловларнинг барча турлари, жумладан жисмоний шахслар даромад солиғи суммаси бўйича корхонанинг қарзи кўрсатилади.
86. «Суғурталар бўйича қарз» (690-сатр) моддаси бўйича корхона суғурталанувчи ҳисобланган ва ҳисоби 6510 «Суғурта бўйича тўловлар» ҳисобларида юритиладиган суғурта бўйича тўловларга доир қарз кўрсатилади.
87. «Мақсадли давлат жамғармаларига тўловлар бўйича қарз» (700-сатр) моддаси бўйича ҳисоби 6520 «Мақсадли давлат жамғармаларига тўловлар» ва 6530 «Шахсий жамғариб бориладиган ҳисобларга тўловлар» ҳисобларда юритиладиган, корхонанинг мақсадли давлат жамғармаларига қарзи кўрсатилади.
88. «Таъсисчиларга бўлган қарзлар» (710-сатр)моддаси бўйича ҳисоби 6610 «Тўланадиган дивидендлар», 6620 «Чиқиб кетаётган таъсисчиларга улушлари бўйича қарз»ва 6630 «Таъсисчиларнинг устав капиталини ошириш бўйича улушлари» ҳисобларида амалга ошириладиган, корхонанинг таъсисчилар олдида дивидендлар ва чиқиб кетаётган таъсисчиларга улушлари бўйича мажбуриятлари суммаси кўрсатилади.
89. «Меҳнатга ҳақ тўлаш бўйича қарз» (720-сатр) моддаси бўйича 6710 «Меҳнат ҳақи бўйича ходим билан ҳисоблашишлар», 6720 «Депонентланган иш ҳақи» ҳисобларида ҳисобга олинган, ҳисобланган, лекин ҳали тўланмаган меҳнатга ҳақ тўлаш суммалари, мукофотлар, нафақалар ва ҳоказолар кўрсатилади.
90. «Қисқа муддатли банк кредитлари» (730-сатр) моддаси бўйича ҳисоби 6810 «Қисқа муддатли банк кредитлари»ҳисобида амалга ошириладиган қисқа муддатли кредитлар бўйича банклар олдидаги қарз суммалари кўрсатилади.
91. «Қисқа муддатли қарзлар» (740-сатр)моддаси бўйича ҳисоби 6820 «Қисқа муддатли қарзлар», 6830 «Тўланадиган облигациялар», 6840 «Тўланадиган векселлар» ҳисобларида амалга ошириладиган бошқа корхоналар ва шахслардан олинган қарзлар (заёмлар) бўйича қарз суммалари кўрсатилади.
92 «Узоқ муддатли мажбуриятларнинг жорий қисми» (750-сатр) моддаси бўйича ҳисоби 6950 «Узоқ муддатли мажбуриятлар — жорий қисми»ҳисобида амалга ошириладиган корхонани узоқ муддатли мажбуриятларининг жорий қисми суммалари кўрсатилади.
93. «Бошқа кредиторлик қарзлар» (760-сатр) моддаси бўйича ҳисоби 6910 «Тўланадиган оператив ижара», 6920 «Ҳисобланган фоизлар», 6930 «Роялти бўйича қарз», 6940 «Кафолатлар бўйича қарз», 6960 «Даъволар бўйича тўланадиган ҳисоблар», 6970 «Ҳисобдор шахсларга бўлган қарз» ва 6990 «Бошқа мажбуриятлар» ҳисобларида амалга ошириладиган корхонанинг турли кредиторлари билан операциялар бўйича қарз суммалари кўрсатилади.
94. «II бўлим бўйича жами» (770-сатр) моддаси бўйича 490 ва 600-сатрлар бўйича сумма кўрсатилади.
95. «Баланс пассиви бўйича жами» (780-сатр) моддаси бўйича 480 ва 770-сатрлар бўйича суммалар натижаси сифатида олинган пассивнинг жами суммаси кўрсатилади.
96. «Балансдан ташқари ҳисобларда ҳисобга олинадиган қийматликларнинг мавжудлиги тўғрисида маълумотнома» 790-940-сатрларда корхонага тегишли бўлмаган, лекин вақтинча унинг фойдаланишида ёки тасарруфида бўлган қийматликлар (оператив ижара шартномаси бўйича олинган асосий воситалар, масъул сақлашдаги, қайта ишланаётган ва ҳоказо моддий қийматликлар), шартли ҳуқуқлар ва мажбуриятлар мавжудлиги тўғрисидаги, шунингдек корхонанинг балансдан ташқари ҳисобларида ҳисобга олинадиган айрим хўжалик операцияларини назорат қилиш учун ахборот кўрсатилади.