Darslik ташкент Mualliflar jamoasi

Uy sharoitida qilinadigan ingalyatsiyalarning eng ko’p tarqalgan usullari
Kartoshka po’sti bilan suvda pishiriladi, suvning bir qismi to’kib tashlanadi, ozgina ukrop solinadi, 2 osh qoshiq o’simlik moyi va 1 choy qoshiq ichimlik sodasi qo’shib, olovda isitiladi. Bemor qulay o’tkaziladi, uning boshiga paxmoq adyol yoki katta issiq ro’mol (katta kapyushon ko’rinishida) yopiladi, issiq kartoshkali idish ustida boshi engashtiriladi. Undan chiqayotgan bug’dan bemor 10—15 daqiqa mobaynida nafas oladi. Shundan so’ng bemor issiq o’ralib, 1—2 soat o’rnida yotishi lozim.
Kartoshkaning po’chogini yaxshilab yuvib, oz miqdordagi suvda kartoshka hidi chiqquncha pishiriladi. 2 ta validol tabletkasini qo’shish ham mumkin. Bemor boshi yopiladi, po’choqli idish ustiga engashtirib, burun va og’iz bilan 10-15 daqiqa mobaynida chuqur nafas olinadi, shundan so’ng o’ringa yotiladi.
Bir choy qoshiq evkalipt bargi maydalanadi, 3 stakan qaynok suv quyiladi, 5 daqiqa damlanadi, isitilib, 20 daqiqa nafas olinadi.
Choynakda qaynab turgan suvga 1 osh qoshiq skipidar qo’shilib, bug’idan nafas olinadi.
Sirlangan idishga 10 g qarag’ay kurtagi va tozalangan qalampir solinadi, 1 stakan qaynoq suv qo’shiladi, 20 daqiqa damlanib, siqib olinadi, suzgichdan o’tkaziladi, ingalyatsiya qilinadigan idishga solinadi va bug’idan nafas olinadi.
70 ml issiq suvga 30 g asal qo’shiladi, bu suyuqlik kastryulka yoki choynakka quyiladi, isitilib, kuniga 2—3 mahal 10—15 daqiqa nafas olinadi.
Qaynoq suvli choynakka 1 choy qoshiq ichimlik sodasi qo’shiladi va bug’idan nafas olinadi.
1 osh qoshiq qizilpoycha o’tiga 1 stakan qaynoq suv quyiladi, 30 daqiqa damlanadi, siqib olinadi, qaynoq suvli choynakka qo’shilib, ingalyatsiya qilinadi.
1 osh qoshiq kalendula, moychechaq mavrak qaynoq suvga qo’shiladi, 3—5 daqiqa damlanadi, suzgichdan o’tkaziladi kastryul yoki choynakdagi qaynoq suvga qo’shilib, bug’dan 20 daqiqa nafas olinadi.
Qora andizning maydalangan ildiz va ildizpoyalari (20 g — to’la bir oshqoshiq) sirli idishga solinadi, 1 stakan qaynoq suv quyiladi, qopqog’i yopiladi va bug’da isitiladi, 30 daqiqa tez-tez kavlab turiladi, shundan so’ng suzgichdan o’tkaziladi, issiq suvli choynakka qo’shilib, 10 daqiqa nafas olinadi.
20 g moychechakka 1 stakan qaynoq suv qo’shiladi, 4 soat damlanadi, suzgichdan o’tkaziladi; damlama isitilib, iliq holda burun ingalyatsiyasi qilinadi. Bu usul tumovda yaxshi yordam beradi.