Дуал таълим принципларини жорий этиш модули бўйича ЎҚув-услубий мажмуа

4-боб. Дуал таълимни ташкил этишда корхона (ташкилот), таълим муассасаси ва ўқувчиларнинг асосий вазифалари
26. Корхона (ташкилот) қуйидаги вазифаларни бажаради:
Таълим муассасаси билан биргаликда дуал таълим бўйича ўқувчиларни ўқишга қабул қилиш бошланишидан камида бир ой олдин тегишли шартномаларни расмийлаштиради;
Таълим муассасаси билан ҳамкорликда дуал таълим таълим дастурини амалга ошириш бўйича чора-тадбирлар режаси ишлаб чиқади ва амалга оширади;
Дуал таълимда ўқитиш муддатлари ҳамда корхона (ташкилот)га юборилаётган ўқувчилар таркиби бўйича таълим муассасаси билан келишади;
Ўқувчиларни дуал таълим дастурининг назарий, ўқув-амалий қисмини Таълим муассасасида олиб боришлари учун шарт-шароит яратади;
Дуал таълим олиш бўйича ўқувчилар билан шартномалар тузади ва Таълим муассасаси билан келишилган муддатларда ўқувчиларни қабул қилади;
Дуал таълим жараёни даврида ўқувчини меҳнат қонунчилиги асосида ишга қабул қилади;
Ўқувчини корхона (ташкилот)да ишлаб чиқариш билан боғлиқ амалий қисми мобайнида белгиланган тартибда аниқ иш жойи, яъни ишлаш учун зарур жиҳозлар билан таъминлайди;
Ўқувчиларни корхона (ташкилот) устави, ички тартиб қоидалар, тиббий (санитар), ёнғин хавфсизлиги қоидалари ва бошқа умуммажбурий стандарт ва қоидалар ҳамда корхона (ташкилот)га ишга жойлашиш имкониятлари билан таништиради;
Ҳар бир ўқувчи(лар)га дуал таълим дастурининг ишлаб чиқариш билан боғлиқ амалий қисмини ўргатиш учун юқори малакали мутахассис уста бириктиради;
Корхона (ташкилот)да дуал таълим дастурининг ишлаб чиқариш билан боғлиқ амалий қисмини амалга оширилишини таъминлайди ва етарли шарт-шароитлар яратади;
Дуал таълимнинг мақсад ва вазифаларига асосланган ҳолда ўқувчиларга ўз уставига мувофиқ амалий жараёнларда қатнашишга рухсат беришни таъминлайди;
Корхона (ташкилот)да ўқувчиларга тиббий-санитария қоидалари, меҳнатни муҳофаза қилиш, ҳаёт фаолияти хавфсизлиги ва ёнғин хавфсизлиги талабларига жавоб берувчи хавфсизлик чораларни таъминлайди;
Ўқувчиларнинг корхона (ташкилот)да ташкил этилган тиббий хизматлардан фойдаланишини таъминлайди;
Бириктирилган уста томонидан дуал таълим дастури, лавозим йўриқномалари ва мажбуриятларни бажарилишини таъминлайди;
Таълим муассасаси билан ҳамкорликда ишлаб чиқилган дуал таълим дастурларига мувофиқ ўқувчи томонидан ўзлаштирилган ўқув модуллари асосида касб (мутахассислик) бўйича ўқитиш натижалари (компетенциялар)ни баҳолаш жараёнини ташкил этади;
Ўқувчилар кундалиги юритилишини таъминлайди;
Ўқувчининг касб (мутахассислик)лари бўйича якуний давлат аттестациясини ташкил этишда қатнашади;
Таълим муассасаси билан биргаликда дуал таълимни амалга оширилганлиги бўйича ҳисоботларни тайёрлайди.
Таълим муассасаси ва ўқувчилар билан тузилган шартномаларга мувофиқ бошқа вазифаларни ҳам бажариши мумкин.
27. Таълим муассасаси қуйидаги вазифаларни бажаради:
Корхона (ташкилот) билан дуал таълимни жорий этиш бўйича камида бир ой олдин тегишли шартномани ишлаб чиқади ва имзолайди;
Корхона (ташкилот) билан бирга касб (мутахассислик)лар бўйича Олий ва ўрта махсус таълим вазирлиги томонидан тасдиқланган таълим дастурлари асосида дуал таълим бўйича ўқув меъёрий ҳужжатларни ишлаб чиқади ва тасдиқлайди;
Корхона (ташкилот) билан дуал таълим бериш бўйича ўқитиш муддатлари ҳамда таълим олувчи ўқувчиларнинг рўйхатини тасдиқлайди.
Ўқувчи ва корхона (ташкилот) ўртасида дуал таълим бўйича тузилган шартномаларни рўйхатга олади;
Қонун ҳужжатларига мувофиқ шартномаси мавжуд ўқувчиларни дуал таълим бўйича гуруҳларга қабул қилишни ташкил этади;
Дуал таълимни ташкил этиш, ўқувчиларни корхона (ташкилот)га юбориш, ҳар бир ўқувчилар гуруҳига ишлаб чиқариш таълими устаси ёки ўқитувчини бириктириш бўйича буйруқни расмийлаштиради;
Дуал таълим дастурини амалга оширишни таъминлайди;
Ўқитувчилар ва ишлаб чиқариш таълими усталарининг фаолиятини назорат қилади ва улар томонидан белгиланган тартибда таълим жараёни ташкил этилишини таъминлайди;
Ўқувчи кундалиги юритилишини назоратини олиб боради;
Корхона (ташкилот) билан ҳамкорликда ўқувчиларнинг баҳолаш жараёнини ва якуний давлат аттестациясини белгиланган тартибда ташкил этади;
Корхона (ташкилот) билан келишилган ҳолда дуал таълим натижалари юзасидан ҳисоботларни тайёрлайди ва Қорақалпоғистон Республикаси, вилоятлар ва Тошкент шаҳар Касбий таълимни ривожлантириш ва мувофиқлаштириш ҳудудий бошқармаларига тақдим этади;
Дуал таълим бўйича Ўзбекистон Республикаси Олий ва ўрта махсус таълим вазирлигининг буйруқлари ва кўрсатмаларини ўз вақтида бажаради;
Корхона (ташкилот) билан тузилган шартномага мувофиқ бошқа вазифаларни ҳам бажариши мумкин.
28. Ўқувчилар қуйидаги вазифаларни бажаради:
Корхона (ташкилот) ва таълим муассасасида белгиланган тартиб қоидаларига риоя қилади;
Корхона (ташкилот)нинг уставига мувофиқ иш жараёнларига белгиланган тартиб асосида қатнашади;
Дуал таълимнинг назарий ва ўқув-амалий қисми бўйича машғулотларига қатнашади;
Ўқув модул (фан дастур)ларини тўлиқ ўзлаштиради;
Амалий машғулотларда берилган вазифаларни ўз вақтида бажаради;
Дуал таълим жараёни вақтида таълим муассасаси ва корхона (ташкилот)лардан бириктирилган усталар билан доимий алоқада бўлади;
Ўқувчи кундалигини ўз вақтида юритиб боради ва ҳисоботларни топширади;
Якуний давлат аттестациясига пухта тайёргарлик кўради ва аттестация жараёнларига ўз вақтида иштирок этади;
Таълим муассасаси ва корхона (ташкилот) томонидан белгиланган тегишли вазифаларни бажаради;
Корхона (ташкилот) билан тузилган шартномага мувофиқ бошқа вазифаларни ҳам бажариши мумкин.