Электр қурилмаларини эксплуатация қилишда хавфсизлик техникаси қоидаларини тасдиқлаш тўҒрисида

7-боб. Генераторлар
194. Ушбу боб ва IX бобнинг талаблари синхрон компенсаторларга ҳам тегишлидир.
195. Қўзғатилмаган ва майдонни автоматик сўндириш (кейинги ўринларда — МАС) қурилмаси ўчирилган ҳолда айланаётган генератор кучланиш остида (вал айлантирувчи қурилма орқали айлантирилганидан ташқари) деб ҳисобланиши керак.
196. Генераторни синашда унинг схемасидаги участкаларга ёки блок схемасига махсус қисқа туташтиргичлар ўрнатилиши ва олинишига, улар ерга улагандан сўнг қўзғатиши олинган ва МАС қурилмаси ўчирилган генератор ишчи частотада айланаётганда ижозат берилади.
197. Тўхтатилган блокли генераторнинг схемасида ишлар бажарилганида, агар кучайтирувчи трансформатор юқори кучланиш томонидан, ўз эҳтиёжлар трансформаторлари эса шохобчаланишда паст кучланиш томонидан ерга уланган бўлса, унинг чиқармаларини ерга улаш талаб қилинмайди.
198. Қўзғатилмаган, МАС қурилмаси ўчирилган, айланаётган генераторнинг статор занжирларидаги қолдиқ кучланишни ўлчаш, фазаларнинг алмашиш тартибини аниқлаш ва бошқа ишларни бажаришга ижозат берилади.
Ушбу ишларни махсус хизматлар, лабораториялар, созлаш корхоналарининг ходимлари навбатчи ходимлар кузатуви остида ёки наряд бўйича электр ҳимоя воситаларини қўллаб бажаришлари шарт.
199. Ишлаб турган генератор валидаги кучланишни ва роторининг изоляция қаршилигини навбатчи ходимлардан бўлган хизматчи бир ўзи ёки фармойиш бўйича махсус бўлинма ходимларидан IV ва III гуруҳга мансуб икки хизматчи ўлчашига рухсат этилади.
200. Роторнинг контакт ҳалқаларини чархлаш ва силлиқлашни, қўзғатгич коллекторини силлиқлашни фармойиш бўйича электротехник бўлмаган ходимлардан бўлган хизматчи бир ўзи бажариши мумкин. Ишлаётганда ҳимоя кўзойнакларидан фойдаланиш керак.
201. Ишлаб турган генераторнинг чётка аппаратига хизмат кўрсатишни навбатчи ёки ушбу мақсад учун белгиланган III гуруҳга мансуб ходимга бир ўзи бажаришга ижозат берилади. Бунда қуйидаги эҳтиёт чораларига риоя этилиши зарур:
бош кийимда бўлиш ва машинанинг айланаётган қисмларига илашиб, тортиб кетишнинг олдини олиш учун тугмалари тақилган махсус кийимларда ишлаш;
диэлектрик қўлқопларни ишлатмасдан, диэлектрик калишлардан ёки резинали диэлектрик гиламчалардан фойдаланиш;
бир вақтнинг ўзида иккита қутбнинг ток ўтказувчи қисмларига ёки ток ўтказувчи ва ерга уланган қисмларга қўл текизмаслик керак.