Педагогик атамалар луғати

Симпозиум-дарс – иштирокчиларнинг ўз нуқтаи-назарларини баён этувчи маълумотлар билан чиқишига асосланган расмий муҳокама типидаги дарс.
Синергетика – 1) грекча “сенергос” сўзидан олинган бўлиб, “ҳамдўстлик”, “ҳамкорлик” каби тушунчаларнинг илмий тилдаги ифодаси. 2) мажмуалар назарияси.
Синквейн – француз тилида «беш қатор» маъносини билдирувчи педагогик стратегия.
Синквейн тузиш – мураккаб ғоя, сезги ва ҳиссиётларни бир нечагина сўзлар билан ифодалаш малакаси.
Синтез – 1) нарса-ҳодисани унинг қисмлари билан ўзаро алоқадорликда ўрганиш, унинг яхлитлиги, бирлигини ифодаловчи тушунча; 2) синтез олинган натижаларни умумлаштиришдан иборат педагогик илмий тадқиқот методи.
Синов – Ўзбекистонда олий ўқув юрти талабалари ва касб-ҳунар коллежи, академик лицей ўқувчиларининг лаборатория ишлари, курс лойиҳаларини бажаришларини, шунингдек, амалий ва семинар машғулотларида, ўқув ҳамда и.ч.амалётлари жараёнида олган билим ва малакаларини аниқлаш ҳамда баҳолаш усули.
Синов дарси – педагогик амалиётни ўташ даврида педагогика олий ўқув юрти талабалари томонидан ўтиладиган дарс.
Синов дафтарчаси – олий ўқув юрти талабалари, касб-ҳунар коллежлари ва академик лицей ўқувчиларининг муайян таълим муассасасига тегишли эканлигини тасдиқловчи академик хужжат.
Синф, ўқув синфи – 1) ўқув йили давомида ягона ўқув дастури бўйича шуғулланувчи ўқувчилар жамоаси; 2) бадиий ўқув юртларида ўқувчиларнинг бирор ўқув предмети бўйича ихтисослаштирилган гуруҳи (масалан, композиция синфи); 3) мактабда ўқувчилар шуғулланадиган хона; 4) махсус жиҳозланган, муайян санитария-гигиена талабларига (ёритилиши, майдони ва бошқаларга кўра) жавоб берадиган ўқув хонаси.
Синф журнали – ўқувчиларнинг ўқув йили давомидаги ўзлаштириши, дарсга қатнашиши ва ўрганган мавзулари ифодаланган асосий ҳужжат.
Синф раҳбари – муайян синфга бириктирилиб, мазкур синф ўқувчилари жамоаси билан таълим-тарбиявий ишлар олиб борадиган ўқитувчи.
Синф сардори – умумий ўрта таълим мактабларида синф интизоми, мактаб тартиб-қоидаларига риоя этиш, тадбирларда, фанлардан ўзлаштиришни назорат қилишда синф раҳбарига яқиндан кўмаклашувчи ўқувчи.