Geografiyada toponimika

Gamburg (Hamburg)-Germaniyadagi shahar. 810-yili baliqchilar qishlog'i o'rnida barpo etilgan. Nemischa ham-«qo'ltiq (ko'rfaz)», «qo'ltiqcha», burg-“shahar”, “qal'a”, ya'ni “qo'ltiqcha (ko'rfaz) sohilidagi qal'a, shahar” ma'nosini beradi.

Gang-Osiyodagi, asosan Hindiston hududidan oqib o'tuvchi sersuv daryolardan biri, hindlarning muqaddas daryosi. Himolay tog'laridan boshlanib Bengaliya qo'ltig'iga quyiladi. Qadimgi hind tilida «ganga»-daryo demakdir.
Gayana-davlat, Janubiy Amerikaning shimoliy-sharqiy qismida joylashgan. Mahalliy indeyeslar tilida Gayana-«suvli o'lka», degan ma'noni bildiradi.
Gibraltar-O'rta dengizdan Atlantika okeaniga o'tgan bo'g'oz. 711 yilda shu bo'g'ozdan o'tib Ispaniyani bosib olgan sarkarda Ibn Toriq ismi bilan Jabal al-Toriq deb atalgan. Yevropa tillarida Gibraltar bo'lib ketgan.
Glazgo-Buyuk Britaniyadagi shahar. VI asrda asos solingan. Kelt tilida «yashil o'rmon» degan ma'noni bildiradi.
Gobi-Osiyoning markaziy qismidagi cho'l. Mongolcha gobi so'zi «cho'l» degan ma'noni anglatadi.
Golfstrim-Atlantika okeanidagi iliq oqim. Inglizcha guls-«qo'ltiq», stream-«oqim» so'zlaridan olingan bo'lib, «qo'ltiqdan chiquvchi oqim» ma'nosidadir. Ushbu nomni 1772-yili amerikalik olim B.Franklin taklif etgan.
Gorn burni-Janubiy Amerikaning eng janubiy chekka nuqtasi, Olovli Yer orolida joylashgan. 1616-yilda golland sayyohlari V.Sxouten va YA.Lemprlar kashf etgan. V.Sxoutenning ona shahri Gorn (Gollandiyada) nomiga shunday atalgan.
Gudzon ko'rfazi (qo'ltig'i)-Shimoliy Muz okeanida-Kanada qirg'oqlaridagi ko'rfaz. Ingliz dengizchisi Genri Gudzon tomonidan 1610 yilda kashf etilgan va uning nomiga shunday atalgan.
Guron-ko'l, Shimoliy Amerikadagi Buyuk ko'llardan biri. Ko'l sohilida yashovchi qabila nomidan olingan.
Himolay-dunyodagi eng baland tog' tizmalaridan biri. Sanskritcha xima-«mangu qor», alayya-«makon», «uy», ya'ni «mangu qorlar makoni» degani. Tog' tepasi doimiy qor va muzliklar bilan qoplanib yotishidan shunday atalgan.
Hind-Xitoy, Hindiston va Pokiston hududidan oqib o'tuvchi daryo. Qadimgi hind tilidagi sindxu so'zidan olingan bo'lib, «daryo» degan manoni bildiradi.
Hindiston-Janubiy Osiyodagi yarim orol va davlat. Sharq manbalarida Hind deb tilgan olinadi. Bu nom sindhu-«daryo» so'zidan kelib chiqqan, chunki Hind daryosi Sindhu deb atalgan. Mahalliy xalq tilida s tovushi h tovushi bilan yaqinligi sababli sindhu so'zi hinduga aylangan. Keyinchalik bu yerning aholisi hindular deb ataladigan bo'ldi. Hindular o'z mamlakatini Bxarat (qadimgi qabilalar nomi) deb atashadi.