I-bap. Dara tuwındılı differentsiallıq teńlemeler. Klassifikatsiyası hám kanonikalıq túrleri

SÓZ BASI

Oqıw quralı matematikalıq fizika kursı boyınsha máselelerdi sheshiw usıllarına arnalǵan. Kitaptıń maqseti studentlerge olardıń matematikalıq pikirlewlerin, dara tuwındılı differentsiallıq teńlemelerdi sheshiwdiń ámeliy kónlikpelerin qáliplestiriwde járdem beriwden ibarat.

Oqıwlıq qollanbada dara tuwındılı differentsiallıq teńlemelerden ibarat matematikalıq fizikanıń tiykarǵı teńlemelerin úyreniw máseleleri qarastırılǵan. Qollanba altı bap kóleminde jazılǵan bolıp, birinshi babında dara tuwındılı differentsiallıq teńlemeler haqqında tiykarǵı túsinikler, olardıń klassifikatsiyası, kanonikalıq túrleri hám sheshimi haqqında maǵlıwmatlar keltirilgen.
Oqıwlıq qollanbanıń ekinshi, úshinshi hám tórtinshi baplarında matematikalıq fizikanıń teńlemelerin óz ishine qamtıytuǵın sáykes giperbolalıq, parabolalıq hám elliptikalıq tiptegi teńlemeler hám bul teńlemeler tiykarındaǵı mısal hám máseleler berilgen.
Qollanbanıń besinshi babında elliptikalıq tiptegi teńlemeler ushın shegaralıq máselelerdi sheshiwdiń potentsiallar hám Grin funktsiyası usılları, al altınshı babında dara tuwındılı differentsiallıq teńlemelerdi sheshiwdiń integrallıq túrlendiriwler usılı keltirilgen.
Qollanba matematikalıq fizikanıń teńlemelerine arnalǵan mısallar hám máseleler jıynaǵınan turadı hám ol universitetlerdiń matematika, ámeliy matematika hám informatika sonday-aq fizika tálim baǵdarları studentleri ushın «Matematikalıq fizika teńlemeleri» pánin úyreniwde úlken járdem beredi.
Qollanbanıń mazmunı matematikalıq fizika teńlemeleri kursı boyınsha oqıw baǵdarlamasına tolıq sáykes keledi.
Qollanbanıń qol jazbasın oqıp, ózleriniń pikirlerin bildirgen fizika matematika ilimleri kandidatları O. Nurjanov, J. Allanazarov, Q. Elgondiev hám R. Mustafaevalarǵa avtorlar óz minnetdarshılıǵın bildiredi.
I-BAP.Dara tuwındılı differentsiallıq teńlemeler.
Klassifikatsiyası hám kanonikalıq túrleri
Tayanısh sózler: dara tuwındılı differentsiallıq teńlemeler, dara tuwındılı differentsiallıq teńlemelerdiń tártibi, dara tuwındılı differentsiallıq teńlemelerdiń sheshimi, sızıqlı dara tuwındılı differentsiallıq teńlemeler, kvazisızıqlı dara tuwındılı differentsiallıq teńlemeler, ekinshi tártipli eki ǵárezsiz ózgeriwshili sızıqlı dara tuwındılı differentsiallıq teńlemelerdiń tipleri hám kanonikalıq kórinisleri, ekinshi tártipli kóp ǵárezsiz ózgeriwshili sızıqlı dara tuwındılı differentsiallıq teńlemelerdiń tipleri hám kanonikalıq kórinisleri, xarakteristikalıq teńlemeler.