Ибрайым юсупов өмир, саған ашықпан…

ХОШАДƏС 
Т.Генжебай бақсыға 
Ала мойнағыңды алып қолларға,
Пəрлерин титиретип ушыр «Тарланды». 
Асырымы бəлент йошлы жолларға
Сүр мəрдана ҳағлап «Қара жорғаңды». 

---

181 
Қулақтан тер алып, көсиле түсер,
Гə ҳəўижге минип, пəсине түсер. 
Қайта бастан гөне дəртим қозғалып,
Ессиз балалығым есиме түсер. 
Есимде аўылға бақсы келгени,
«Шасəнем-Ғəрипти» айтып бергени,
Бақсыны дəстанға салар алдында
«Қəне, баллар, барып уйықлаң» дегени. 
Геўиш арасында, есик артында,
«Шықпайман» деп жылар ақыр соңында
Бир бахытлы бала уйқыдан қалып,
Таң атқанша бақсы тыңлаған сонда ... 
Мардыйған жигитлер, туяна қызлар,
Аяқ уйыса да, өтсе де ызғар,
Отырысын бузбай сəҳəрге дейин,
Бақсы тыңлар еди уйып, енағар. 
Ҳəўижге мингенде сүйген намасы,
Қыйқыўын жеткизер жигит ағасы.
«Бəрəкалла» деп ғаррылар ырғалып,
Жаслығын еслейди-аў билсем шамасы. 
Бул күнде бақсының қайтқан дəўлети,
Эстрада, магнитофон нəўбети. 
Үйден шықпай сайрап турар жер жəҳəн,
Ҳəр заманның өз сазы, өз сəўбети. 
Дəртли кеўил бийдəрт пенен ойнамас,
Таза бағда «гөне бүлбил» сайрамас.
Атларды қыйнамас узақ айдаўға,
Журт жыйылып енди бақсы тыңламас. 
Оннан көре ойнап-күлгени абзал,
Кеште телевизор көргени абзал.
Мал көбейтип, таўық сақлап, пул таўып,
Барыс-келис пенен жүргени абзал. 
Журтқа таңсық емес бул күнде бақсы,
Дүнья қуўыў болды кеўилдиң нақшы.
Той берип, пул жыйып жақын-жуўықтан,
Улына «Жигули» алғаны жақсы. 
Басқа қуслар сайрар бағларда бизиң,
«Саналы гелдиң» нен оянбас сезим.
Ғəрип сегбир тартпас Əлепшырўаннан,
Сəнемлер көшкиден тасламас өзин ... 
Ала мойнағыңды алып қолларға,
Пəрлерин титиретип ушыр «Тарланды».

---

182 
Машина жүрмеген аўлақ жолларда
Сүрип-сүрип алғыл «Қара жорғаңды». 
Кимселер хош көрмес, кимге жағарсаң,
Беглигиңди бузба, ынжылма ҳəргиз,
Бəлким сен ең соңғы бақсы шығарсаң,
Биз ҳəм соңғы тыңлаўшыңыз болармыз ... 
Сентябръ, 1986-жыл.