Ибрайым юсупов өмир, саған ашықпан…

САҚЛАҢ ҒАМЗАТОВТЫ! 
Расул Ғамзатовтың 60 жыллық мерекесинде русшасы 
оқылған қосық. Махашқала, 8-сентябрь 1983-жыл. 
Сақлаң Ғамзатовты! 
Ким айтқан өзи,- 
Шайыр халқы бизде көп деп оғада? 
Қосық қардай қапласа да жер жүзин, 
Бундай шайыр келе бермес дүньяға. 
Халық шайырсыз термес өмирдиң гүлин,
Олсыз жан руўҳың тутанбас ҳасла.
Жерде-ашық, көкте-жулдыздың тилин
Кимлер түсиндирер шайырдан басқа? 
Сақлаң оны гүреслерде шаршаўдан,
Күншиллер көзинен, асқынлаўлардан. 
Даңқ-атақтың бийигинде музлаўдан,
Пəсликтиң қапырық, қабызлаўынан. 
Бирақ, Ғамзатовты сақламаң ҳəргиз:
Бүркит пəрўазында мəртлик ушыўдан.
Заман тəшўишинде ақшам уйқысыз
Қабырғасын сөтип қосық жазыўдан. 
Балалық пəкликтен, даналық ақылдан,
Сақламаң ышқыдан, күйип-жансын ол.
Олла математик шықпайды оннан,
Мейли, «патиматик» болып қалсын ол
23
. 
23
Мен «математик» емеспен, «патиматик» пен дейди шайыр ҳаялы 
Патиматқа ҳəзиллесип. 

---

195 
Инсан қайғысының ғам қанжарынан
Жығылса ол Дағыстанның шөлинде,
Хақнус киби қайта турып орнынан,
Қосықлар жаңласын шийрин тилинде. 
Махашқала, 1983-жыл. 
ТАЎ ЖОЛЫНДА 
Жалғыз жолға шықсаң, жолларың өнбес,
Жолдас ерткен буның мəнисин билмес.
Ҳəй сен, жас жолаўшы, еглен азырақ!
Жол жүрейик бир-биреўге болып ес. 
Қара, қандай сулыў думанлы таўлар!
Алтын липас кийген гүзги тоғайлар.
Жалғыз арқар жар шетинде мөңирер,
Бəлким, өз жолдасын шақырып турар. 
Жаслықтың желиги бастан өтсе де,
Бел байладым усы жолдан өтпеге.
Билдим, сен де биздей қумар екенсең, 
Бул таўлар дүньясын сайран етпеге. 
Журт асығып бири-биринен бетер,
Машиналар зуўлап жоллардан өтер.
Асықса асықсын, ҳақ жол оларға,
Мейли, бизден көре ертерек жетер. 
Кеш қалсак, паналап таўдың ығына,
От жағып, нан қыздырармыз шоғына,
Билдим, сен де биздей ашық екенсең,
Бул қысқа өмирдиң гөззаллығына. 
Кийик соқпақ, жарқабақлы шетлерден
Мен бундай жолларды талай өткенмен.
Жазғы жамғырларда жаўрап таўларда,
Шопан қосларында қалып кеткенмен. 
Жуп қылып жаратқан қуслар қанатын,
Жолдас таўып шықсаң, шаршамас атың.
Мениң тəжирийбем, сениң жаслығың
Мүмкин, жеңиллетер жол машақатын... 
Бунда сайлар бир жыраға қуйылар,
Бунда адамлар асқар таўға сыйынар,
Бизге қəўип жоқ өтсек Қойсуў дəрьясын,
Аржағында Ғамзатовтың үйи бар... 
Цада, 1983-жыл. 

---

196