Ибрайым юсупов

 
 
ЎАҒЫЙФТАН 
Сәҳәр турып гезсем ашықлар елин,
Жуп қоса нар көрдим еки сийнеде.
Бириси қыз еди, бириси келин.
Жан қурбан әйлерем еккисине де. 
Келин булақ суўдан бет—қолын жуўар,
Бол тез, кетейик деп бийкеши турар.
Қыз—келиннен, келин—қыздан да дилбар,
Жан қурбан әйлерем еккисине де. 

---

51
Келин додағыдур Тәбриз әнары,
Елли—алтымыш түмен қыздың туўары.
Жәннетти нәйлесин булардың яры,
Жан қурбан әйлерем еккисине де. 
Келинниң жағасы полат ийнели,
Қыздын жағасыдур шапыраз түймели.
Екеўи де бир—биринен ийбели,
Жан қурбан әйлерем еккисине де. 
Ўағийф дер" гүллерге бир бостан болса,
Бири султан болса, бири хан болса,
Бул ғарип көксимде еки жан болса,
Мен қурбан әйлерем еккисини де. 
Июнь, 1989-жыл, Баку. 
 
ИЙШАНБАЙ КҮЙИ
2
 
Жас тәбият маўжырап жатқан кеште,
Сизди Кавказ таўында алдым еске.
Қыз-Жипектиң көшиндей, мың буралып,
Ақша булт өрмелер таўға әсте. 
Усындай жомарт тәбият
Ҳәсемлеп сизди жаратқан.
Ийшанбай аға, айда ат,
Қызлар ма, деймен, баратқан. 
Ақ Машуктың бурымы өрилмеген,
Бештаў оған таласып, гүрилдеген.
Аршын төсли арыўдың сийнесиндей,
Қос өркешли Эльбрус дирилдеген. 
2
Алмааталы профессор Ийшанбай Қарақуловқа жазылған бул 
ҳәзил өлең ҳаслында қазақша жазылған (И.Ю.). 

---

52
Таў бөктери бетеге,
Кеўилиңе ким жетеди?
Жаслық дәўран, беў ширкин,
Өтип ғана кетеди-аў. 
Қәйтип сүрсең дәўранды, сөйтип өтер,
Қәдириңе мен жетпей, кимлер жетер?
Сиз бенен сәўбет қурмай жүрер болсам,
Көш артында бир тайлақ босқа кетер. 
Абзал ағам, Ийшанбай,
Қарақалпақтың баласы.
Мың жигитти жыйсамда-ай,
Сиздей болмас шамасы. 
Қыпшақлардың қызлары зийрек келер,
Ийне тиксе, нарысы ийрек келер.
Қаратабан Қарақул атамыздың
Баласындай азамат сийрек келер. 
Ўа, Ийшеке, Ийшеке,
Алыстағы баўырым.
Мақтанады сиз бенен
Әмиўдеги аўылың. 
Жас минезиң кеўилди көтереди,
Сизге бес қыз тийгенде нетер еди?
Ийшекеңдей жигитлер келмегенде,
Дүнья ширкин кеўилсиз өтер еди. 
Ўа, Ийшеке, Ийшеке,
Жигитлердиң султаны
Узақ болғай илайым
Өмириңниң урқаны. 

---

53
Беў, сулыў қыз, биз бенен хабарласқыл,
Дәўран өтсе, шолпыңды тағалмассаң.
Бал бармақлы қолыңнан қуй кымызды,
Ийшанбайдай жигитти таба алмассаң. 
Ой, Ийшеке, Ийшеке,
Қылшылдаган боз бала.
Қызлар кетип барады,
Айда атты тез ғана.