Jalil rahmat

21.08.2006
Kafting tutib

Ushlab qo`ling kaftini,

Tuydim ishqning taftini,
Berarmikan Xudoyo,
Bir kun vasling baxtini.

Kafting tutib qoldim jim,

Yurakda og`riq sim-sim,
Tortib olma qo`lingni,
Og`riqlar bir oz tinsin.

Boshing qo`yib yelkamga,

Bir dam aylan erkamga,
Qonib zulfing atriga,
Umid boylay ertamga.

Yordan mehr tilab

Yordan mehr tilab yolvoradirman,

Kuygan ko’ksim tig’lab dil yoradirman,
Oy ortidan yillab ovoradirman,
Vujudim boshqa yon, ko`nglim boshqadir.

Hijronning dog`iga qorildi dilim,

Yolg`onning yog`iga qovrildi dilim,
Somonday sarg`ayib sovrildi dilim,
Poyoni noayon yo’lim boshqadir.

Jalil Rahmat, yoqam yirtmoq istadim,

Ko`ksimda toza bir irmoq istadim,
Yor zulfin bo`ynima sirtmoq istadim,
Shul zulfdan begumon o`lim boshdadir.
Qizim
Yerda, gul husnidan olib andoza,
Ko`kda, kumush kokil oy bo`lgin qizim.
Oqqan irmoqlari naqadar toza,
Sohillari sermavj soy bo`lgin qizim.

Qizim, men bog` edim, mevamni to’kdim,

Sen ham chorbog’ bo’lib, mevangni to’kgin.
Qizim, men tog’ edim, keksayib cho’kdim,
Sen ham xo’b keksayib, asoga cho’kgin.

Bosh egib kirdingmi, ostonadan sen,

Bosh egib chiqmagin, o’sha xonadan.
Sabru shukronalik saodatga teng,
Xirmon ham yuksalar dona-donadan.

Yerda, gul husnidan olib andoza,

Ko’kda, kumush kokil oy bo’lgin qizim.
05.08.2007.
Dilim og`rir
Dilim og`rir, og`rigan sayin,
Gulim, sizni sog`ingan sayin,
Jarga tushgan bir jayrondayin,
Intiq jonim jovdirar endi.

Labim titrar, faryodim unsiz,

Farishtasiz, go`zal husnsiz,
Ishq yo`lida izsiz, ismsiz,
Umidsiz dil dovdirar endi.

Zorim boru zulm, zo`rim yo`q,

Orim boru oltin, zarim yo`q,
Siz ko`ksimga tashlab qo`ygan cho`g`,
O`z yog`imga qovurar endi.

Adashganim adoqsiz adr,

Qidirganim qatracha qadr,
Bir yon sabr, bir yonda qabr,
Vujud kuyib qovjirar endi.

Tokay boshga bu boloi ishq,

Qay oshiqqa bor davoi ishq,
Jalil Rahmat der savdoi ishq,
Gul umrimni sovurar endi.

* * *
Ilohiy ishq savobi senga,

Har gunoh ish javobi menga.

Ro`shno tilak ro`yobi senga,

Nozik yurak noyobi menda.

Shirinning shahd, sharobi senga,

Xisravning zax, zardobi menga.

Sayru safo rubobi senga,

Junun sahro sarobi menga.

Olamning nur, oftobi senga,

Alamning pur kitobi menga.

Olovli ishq odobi senga,

Azaliy, xush azobi menga.

Gulu g`uncha gulobi senga,

G`amu g`ussa girdobi menga.

Xor ko`ngilning xitobi senga,

Xushro`y gulning xunobi menga.

Sevgi sehri, selobi senda,

Tengsiz mehri, merobi menda.

Sof muhabbat mohtobi senga,

Har misra, bayt hisobi menda.