Jalil rahmat

03.10.2006.
Qizg`ondim

Ming bir azob ichra azizim sizni,

Ko`klarga ishonmay, yerdan qizg`ondim.
Yonoqlari yonib turgan gul yuzni,
Sekin silab, o`pgan yeldan qizg`ondim.

Tola sochingizga toleim boylab,

Muattar bo`yini guldan qizg`ondim.
Jonim jolasiga joningiz joylab,
Yashirdim, bir yetim dildan qizg`ondim.

Osmonga talpindim, oftob, nur deya,

Bulutga ishonmay, seldan qizg`ondim.
Shoirlar maqtabdi mohtob, hur deya,
Men sizni o`sha so`z, she’rdan qizg`ondim.

Sizni kutib

Sizni kutib yashardim,

Kun o`tardi osuda.
Suratingiz yashirdim,
Kipriklarim ostida.

Sizni kutib yashardim,

Telbalarcha ba’zida.
Ishqingizni asradim,
Bir tomchi jon mag`zida.

Sizni kutib yashardim,

Yashnardi ko`zga olam.
Ko`hi Qofdan oshardim,
Sizni quchib xayolan.

Sizni kutib yashardim,

Gohi kulib, goh kuyib.
Yurakka dard qo`shardim,
Qoq o`rtasidan o`yib.

Sizni kutib yashadim,

Kim bilmadi, kim bildi.
Devonaga o`xshadim,
Bu ne balo kun bo`ldi.

Sizni kutib yashadim,

Yasholmadim kutmasdan.
Vido ayta boshladim,
Kelmaysiz, men ketmasdan.

Kam qilmasa bas

Esar Bog`i Eram nasimi,

Dilda ishqning iliq mavsumi,
Chehralarda gul tabassumi,
Xudo shundan kam qilmasa bas.

Xush yoqadi visol shukuhi,

Yayrasin chin oshiqlar ruhi,
Muhabbatning mungi, anduhi,
Kipriklarni nam qilmasa bas.

Ko`ngling to`q tut, to`q bo`lsin ko`zing,

Mayli, uchrab tursa kam ko`sting.
O`zing suyib, suyangan do`sting,
Mag`rur boshing xam qilmasa bas.

Mehr tilab, nur tilab yasha,

Diydor tilab, dur tilab yasha,
Ko`ngil tilab, gul tilab yasha,
Xudo shundan kam qilmasa bas.