Jalil rahmat

03.06.2006.
Bizsiz yig`lar muhabbat

Hijron degan o`lkada, hushsiz yig`lar muhabbat,

O`rtanib shu o`rtada, hissiz yig`lar muhabbat,
Essiz, endi ertaga bizsiz yig`lar muhabbat,
Bugunimiz qolar ko`z ilg`amas soyalarda.

Bosh oqqan tomondamiz, atrof sayhon, yalanglik,

Goh olis osmondamiz, quzg`unlarga talandik,
Bir-birdan gumondamiz, aldab turib aldandik,
Kim ishondi yolg`on so`z, mag`zi puch g`oyalarga.

Yurakka muz, suv urib yo`lamadim ko`changga,

Mening jonim sug`urib, uzatdilar o`shanga,
G`amxonada men g`arib, sen sanamga go`shanga,
Bo`g`zimdan otilgan bo`z urildi qoyalarga.

Qalqib ketib qoyalar, tik qomati bukildi,

Parchalanib soyalar, siyohdayin to`kildi,
Ko`zda qatra jolalar, jon og`rib, dil o`kindi,
Yolg`iz Xudo sodiq do`st, turar himoyalarda.
Yo`lamayman ko`changga endi

Ey muhabbat, manglaying sho`rdir,

Ko`zlaring ham so`qirdir, ko`rdir,
Mayli o`ldir yo kamim to`ldir,
Yo`lamayman ko`changga endi.

Salom berib yurdim soyangga,

Boshim urib turdim qoyangga,
Ishonibman har puch g`oyangga,
Yo`lamayman ko`changga endi.

Darding tugib darba-dar chopdim,

Sabrim tugab sarbasar chopdim,
O`tda tutab bir kaft kul topdim,
Yo`lamayman ko`changga endi.

Ko`z-ko`z qilib visol ko`shkini,

So`ng boshlading to`fon, ko`chkini,
Kimdan olding kimning o`chini,
Yo`lamayman ko`changga endi.

Tatib ko`rdim qancha oshingni,

Bilolmadim aniq yoshingni,
Teravergin o`zing toshingni,
Yo`lamayman ko`changga endi.

Gul umrimni kuzlarga berdim

Gul umrimni kuzlarga berdim,

Dil-bag`rimni muzlarga berdim,
Birdan olib yuzlarga berdim,
Yuz bir bo`lak yurak bo`ldim men.

Bor ishqimni solib bozorga,

Ko`z-ko`z qildim qay xaridorga,
Yutqizib bu qaltis qimorga,
Muhabbatga ermak bo`ldim men.

Yot yerda ham yodga olinmas,

O`z elda ham yodga olinmas,
Yuz yilda ham yodga olinmas,
Unitilgan ertak bo`ldim men.

Aro yo`lda aldanib qoldim,

Tavakkal deb talanib qoldim,
Bir giyohga tayanib qoldim,
Ham giyohga tirgak bo`ldim men.

Shomda shoshib, chopib o`tgan kim,

Qorong`ida qopib o`tgan kim,
Tepamdan bir tepib o`tgan kim,
Dumalagan kesak bo`ldim men.

Kesak tanam tuproqqa qorib,

Yaratganga ming-ming yolvorib,
Bir parcha yer ko`ksini yorib,
Jilmaygan gulchechak bo`ldim men.

Gulchechakni sabolar o`pdi,

Tiz cho`kib shoh, gadolar o`pdi,
Jalil Rahmat qadri ko`p o`tdi,
Kimlargadir kerak bo`ldim men.
Umr uyg`oq kechar
(oilam Gulsaraga)

Gulim boshqalarga o`xshamaymiz biz,

Sevib sevilishdan to`xtamaymiz biz,
Umr uyg`oq kechar uxlamaymiz biz,
Sertashvish dunyoda sergak ikkimiz.

Lahza ko`rishmasak biram sog`inib,

Eng ko`rkam xayollar bilan ovunib,
Sezdirmay yuramiz gohi og`rinib,
Ikki vujudda bir yurak ikkimiz.

Armon nima o`zi baxt nima o`zi,

U – bitta uzun ip, bir igna ko`zi,
Rayhon islariga qonib kunduzi,
Tunda oy qoshida ertak ikkimiz.

Asl o`g`il bo`lsa – ikki tog` ular,

Qizda ibo bo`lsa bitta bog` bo`lar,
Maysa kipriklarga shudring yog`ilar,
Faqat ikkimizga kerak, ikkimiz.
* * *

Begim, bekor ekan, biz bilgan olam,

Ne qilay, har lahza sizni sog`insam.
Mayli tushlarimda va yo xayolan,
Bag`ringizga sho`ng`ib, oz-oz ovunsam.

Shu tobda unutib dard, iztirobim,

Ruhimda sezaman ajib bir rohat.
Vaslingiz umidi shirin azobim,
Sabrimni sovurib, qilgan betoqat.

Jon bersam bearmon bo`yningiz quchib,

Umrimiz g`arq bo`lsin tubsiz ummonga.
Bas, endi ketaylik yerlarda ko`chib,
Bir juft oqqush bo`lib olis osmonga.

Dunyo sinov uchun bir kam yaralgan

Yaxshiyam, bu dunyo bir kam yaralgan,

Bandaga noayon, mubham yaralgan,
Yarmi xurram, yarmi sitam yaralgan,
Gulning tanasida tikan yaralgan,
Yaxshiyam, bu dunyo bir kam yaralgan.

Poyiga o’ralib o’rgimchak to’ri,

Oqibat, odamzod qurirdi sho’ri,
Zaminni zabt etib zamona zo’ri,
Ko’kka ko’char edi faqirlar go’ri,
Yaxshiyam, bu dunyo bir kam yaralgan.

Yiqilganni tepib o’tardi har kim,

Ko’ziga qum sepib o’tardi har kim,
G`arbdan chiqib sharqqa botar edi kun,
Haqni tanib, haqqa yetar edi kim?,
Yaxshiyam, bu dunyo bir kam yaralgan.

Kimdir dardga, kimdir zarga o’ralgan,

Iymonli dil kumush parga o’ralgan,
Davlat berib, undan xayr so’ralgan,
Notavon, nochordan sabr so’ralgan,
Dunyo sinov uchun bir kam yaralgan.