Ájiniyaz atındaǵı Nókis mámleketlik pedagogika institutı T. Т.Ótebaev, U. Q. Seytjanova, Т. A. Esemuratova

Bul maqset, bolajaq oqıtıwshılardıń tómendegi waziypalardı úziliksiz orınlap barıwı arqalı ámelge asırıladı:

1. 
   Bolajaq oqıtıwshılar pedagogikalıq sheberliktiń teoriyalıq hám metodologiyalıq tiykarları menen qurallandırıladı.
   
2. 
   Pedagogikalıq sheberlik pániniń pedagogikalıq texnika, pedagogikalıq sáwbet, pedagogikalıq qábilet, tárbiyashılıq sheberlik, tálim procesin basqarıw, sóylew mádeniyatı, tárbiya texnologiyası, pedagogikalıq dóretiwshilik, reflekciya sıyaqlı quramı haqqındaǵı bilimler sistemasın iyeleydi.
   
3. 
   Bolajaq oqıtıwshılar milliy úrp-ádet hám dástúrlerimizde hám Orta Aziya oyshıllarınıń bay dóretiwshilik miyraslarında óz kórinisin tapqan pedagogikalıq sheberlik sırların erkin iyelewge ózlerinde talap hám qızıǵıwdı rawajlandırıp baradı.
   
4. 
   İyelengen pedagogikalıq-psixologiyalıq hám metodikalıq bilimler, kónlikpe hám tájiriybeler haqqındaǵı maǵlıwmatlar tiykarinda hár bir bolajaq oqıtıwshı óziniń jeke pedagogikalıq sheberligin qáliplestiredi.
   
5. 
   Oqıw-tárbiyalıq procesti jáhán úlgilerine tán sońǵı zamanagóy metod hám formalar tiykarında shólkemlestiriw hám basqarıwdı ámelge asırıwdıń teoriyalıq hám ámeliy tiykarların turaqlı ózlestiredi.
   
6. 
   Oqıtıwshılar óz kásiplik sheberliklerin rawajlandırıwı ushın jeke-dóretiwshilik tájiriybe asırıwdıń forma, usıl hám quralların iyeleydi.
   
7. 
   Oqıtıwshılar tárbiyashı sheberliginiń áhmiyeti, funkciyası, dúzilisi haqqındaǵı maǵlıwmatlardı úziliksiz úyrenip baradı.
   
8. 
   Joqarı zamanagóy xabar texnologiyaları hám portal sistemasınan erkin paydalanıw tiykarında óz kásiplik sheberligin qáliplestiredi.
   

Bul maqset hám wazıypalardıń orınlanıwı oqıtıwshılar hám tárbiyashılardı zaman menen bir bolıwǵa, jaslardı tárbiyalaw dárti menen jasaw hám keleshekti anıq kóre alıwǵa úyretedi. Hár bir oqıtıwshı shaxsında mámleketimizdiń áhmiyetli mashqalaların, maqset hám wazıypaların hújdanı menen orınlap, anıq ámelge asırıp barıw ushın bar kúshi menen óz imkaniyatı, bilimi, tájiriybelerin iske salıwǵa úyretedi hám de pedagogikalıq iskerlikke dóretiwshi jantasıw tájiriybelerine iye bolıwdı tárbiyalaydı.
Al, pedagogikalıq sheberliktiń ózi ne? Oǵan házirgi zaman páni kóz qarasınan tómendegishe tárip beriledi:
Pedagogikalıq sheberlik – Oqıtıwshılardıń jeke (balajanlıǵı, ǵamxorlıǵı, insansúyiwshiligi, mehribanlıgı hám t.b.) hám kásiplik (bilimdanlıǵı, tapqırlıǵı, pidayılıǵı, dóretiwshiligi, qábileti hám t.b.) pazıyletlerin belgilewshi qásiyet bolıp, oqıtıwshılardıń tálim-tárbiyalıq iskerliginde joqarı dárejege erisiwdi, kásiplik sheberlikti úziliksiz rawajlandırıp barıw imkaniyatin támiyinlewshi iskerlik esaplanadı. Ol óz pánin tolıq bilgen, pedagogikalıq-psixologiyalıq hám metodikalıq tayarlıqqa iye bolǵan, oqıwshılardı oqıtıw, tárbiyalaw hám rawajlandırıwdıń optimal jolların izlep tabıw ushın, ámeliy iskerlik alıp baratuǵın hár bir oqıtıwshınıń kásiplik iskerliginde belgili boladı.