Kitapxana- málimleme mákemelerin basqarıw sistemasi Reje

Kitapxana - málimleme mákemeleri tarmaqları;

Kitapxana-málimleme mákemeleri fondların komplektlew;

Kitapxana - málimleme xızmetin shólkemlestiriw;

Kadrlar tayarlaw hám qayta tayarlaw, mamanlıǵın asırıw.

Ilimiy izertlew jumısların shólkemlestiriw;

Ilimiy- metodikalıq jumıslar bolıp tabıladı.

Kitapxana-málimleme iskerligin búgingi jaǵdayı usı strukturalıq bólimlerdiń házirgi jaǵdayına, rawajlanǵanlıǵına tikkeley baylanıslı. Joqarıdaǵı strukturalıq bólimlerdiń qandayda biriniń basqalardan orqada qalıp ketiwi, kitapxana-málimleme iskerligin ulıwma rawajlanıwına tikkeley tásir kórsetedi. Kitapxana-málimleme iskerliginde kitapxana hám málimleme mákemeleri tarmaqları sisteması tiykarǵı sistemalardan biri bolıp tabıladı. Respublikamizda ǵana emes , bálki kóplegen rawajlanǵan mámleketlerde de kitapxanalar bir qansha tarmaqlarǵa bólınǵen bolıp, bul olardı hár qıylı mákeme hám shólkemlerge qaraslı ekenliginen dárek beredi. Bizde kitapxanalardıń bir qansha tarmaqları bolıp, olardı basqarıw jumısları da sol tarmaqlardıń joqarı basqarıw shólkemleri arqalı ámelge asırıladı.

Ózbekstan Respublikası Mádeniyat hám sport isleri boyınsha ministrligi kitapxanaların Joqarı hám orta arnawlı bilimlendiriw ministirligi, JOABMnıń orta arnawlı kásip-óner tálimi orayı, xalıq tálimi ministrligi qaramaǵına ótkeriw jolı menen joqarı hám orta arnawlı bilimlendiriw mákemeleri hám ulıwma bilim beriw mektepleri janında málimleme-resurs orayları tuzildi. Wálayatlar ilimiy-universal kitapxanaları negizinde mákeme tárepten Ózbekstan Baylanıs hám málimlemelestiriw agentligine qaraslı málimleme-kitapxana orayları shólkemlestirildi. Bunnan tısqarı derlik hár bir tarawdıń óz kitapxana tarmaqları bolıp: Den sawlıqtı saqlaw ministrligi, Awıl hám suw xojalıǵı ministrligi, Áskeriy hám taǵı basqa.

Bul mákeme hám shólkemlerdiń kitapxanalar tarmaǵınıń rawajlanǵanlıǵı hár qıylı dárejede bolıp, kitapxanalardıń wazıypası sol mákeme hám shólkemlerdi tiykarǵı wazıypalarınan kelip shıqqan halda qaraladı. Usı boyınsha barlıq kitapxana tarmaqları bir tárepden jámiyet aǵzalarınıń materiallıq hám kásip-ónerine tiyisli málimlemege bolǵan talapların, bos waqıtların ónimli ótkeriw bolsa, ekinshi tárepden usı kitapxana qaysı mákeme hám shólkemge qaraslı bolsa sol shólkemniń aldına qoyılǵan tiykarǵı wazıypaların orınlawǵa xızmet etedi. Usıdan kórinip turıptı, hár qanday kitapxananıń iskerligi jámiyet aǵzaların ol yamasa bul túrdegi málimlemege bolǵan talapların qanaatlandırıwǵa qaratılǵan, lekin olar óz wazıypalarına ózleri boysınatuǵın mákeme hám shólkemlerdiń wazıypalarınan kelip shıqqan halda islep shıǵadı. Usınıń menen birge kitapxanalardı aktiv iskerlik kórsetiwi sol aymaqda jasawshı puqaralardıń kitapxana xızmetine hám málimlemege bolǵan talap hám qızıǵıwshılıqlarına da kóbirek baylanıslı.