Kitapxanalar tipologiyasi

2. Ózbekstan málimleme-kitapxana mákemeleriniń tiykarǵı tipleri hám túrleri.
Málimleme-kitapxana sisteması birden-bir shólkemlestirilgen hám metodikalıq támiynat tiykarında iskerlik kórsetiwshi málimleme-kitapxana mákemeleri kompleksi bolıp tabıladı. Málimleme-kitapxana mákemesi ózbetinshe shólkem yamasa shólkemniń strukturalıq bólimi bolıwı múmkin. Málimleme-kitapxana mákemelerine tómendegiler kiredi:
Ózbekstan Milliy kitapxanası;
málimleme-kitapxana orayları;
málimleme-resurs orayları;
mámleketlik hákimiyat hám basqarıwı shólkemleriniń kitapxanaları;
- basqa kitapxanalar (puqaralar ózin ózi basqarıw shólkemleriniń, mámleketlik emes kommerciyalıq emes shólkemleriniń, sawda shólkemleriniń kitapxanaları).
Málimleme-kitapxana mákemeleri málimleme-kitapxana fondlarınıń mazmunı hám belgilengen máqseti boyınsha universal hámde arnawlı málimleme-kitapxana mákemelerine bólinedi. Universal málimleme-kitapxana mákemeleri málimleme-kitapxana fondların bilimniń hár qıylı tarawları boyınsha qáliplestiredi hám hár qıylı kategoriyadaǵı paydalanıwshılardıń málimlemege bolǵan talapların qánaatlantıradı.
Arnawlı málimleme-kitapxana mákemeleri málimleme-kitapxana fondların bilimniń bir yamasa bir neshe turdegi tarawları boyınsha qáliplestiredi hám ayırım kategoriyadaǵı paydalanıwshılardıń málimlemege bolǵan talapların qánaatlantıradı. Ózbekstan Milliy kitapxanası Ózbekstan Milliy kitapxanası milliy hám jáhán mádeniyatın, páni hám tálimin rawajlandırıwdıń máplerin gózlegen halda Ózbekstan Respublikasında málimleme-kitapxana iskerligin quraytuǵın hámde ámelge asırıwshı ulıwma mámleketlik universal málimleme-kitapxana shólkemi bolıp tabıladı.
Ózbekstan Milliy kitapxanası:
Málimleme-kitapxana iskerligi tarawındaǵı mámleketlik dástúrin islep shıǵıw hám ámelge asırıwda qatnasadı;
- málimleme-kitapxana fondın qáliplestiredi, onıń pútin saqlanıwın támiyinleydi hámde paydalanıwshılarǵa milliy hám shet el baspalardıń eń tolıq kompleksin usınıs etedi;
- Ózbekstan Respublikasında shiǵarıladıǵan baspalardıń májburiy nusqasını, sonıń menen birge dissertaciyalardıń kóshirme nusqasını aladı;
- Ózbekstan Respublikasında shiǵarıladıǵan baspalardıń mámleketlik bibliografiyalıq esabın júrgizedi;
- elektron kitapxana hám elektron katalogdı qáliplestiredi;
- kitapxanatanıwshılıq, bibliografiyatanıwshılıq hám kitaptanıwshılıq tarawında ilimiy-izertlew hámde ilimiy-metodikalıq iskerlikti ámelge asıradı hám muwapıqlastıradı;
- kem ushraytuǵın hám ayrıqsha qımbatlı málimleme-kitapxana resursların pútin saqlaw, konservaciyalaw hám restavraciya etiw boyınsha jumıslardı ámelge asıradı;
- jıynama elektron katalogdı qáliplestiredi hám júrgizedi;
- málimleme-kitapxana resurslarınan óz-ara paydalanıw ushın shárt-shárayatlar jaratadı;
- basqa málimleme-kitapxana mákemeleri menen birge islesiwti ámelge asıradı. Ózbekstan Milliy kitapxanası nızam hújjetlerine muwapıq basqa kepilliklerdi de ámelge asırıwı múmkin. Ózbekstan Milliy kitapxanasınıń málimleme-kitapxana fondı mámleketlik múlki bolıp tabıladı. Ózbekstan Milliy kitapxanası tuwrısındaǵı qaǵıyda Ózbekstan Respublikası Ministrler Kabineti tárepinen tastıyıqlanadı.