Координатор: Г. Ахмедова. Тузувчи муаллифлар

Қум ўйинларини ташкиллаштириш ва тайёргарлик кўриш бўйича умумий тавсиялар
Қумда ўйналадиган ўйинлар кичик гуруҳларда ўтказилади. Бунда тарбиячи айниқса, янги келган болага алоҳида эътибор қаратиши шарт. Болаларда тенгдошларига тақлид қилиш хусусияти кучли бўлганлиги сабабли, мазкур кичик гуруҳларда мактабгача таълим ташкилотига кўниккан болаларнинг бўлиши муҳим аҳамиятга эга.
Биринчи машғулотларни ташкил этишда унинг муддатини чегаралаш ва аниқ қоидаларга риоя этилишини талаб қилиш шарт эмас.
Катталар боланинг қум билан ўйнаш жараёнини диққат билан кузатиб бориши, болада қумга нисбатан салбий муносабат ёки чарчаш ҳолати кузатилганда, ўйинни эҳтиёткорлик билан тўхтатиши тавсия этилади.
Тарбичи болага даставвал қум билан ўйнаш бўйича йўл-йўриқ кўрсатади. Сўнгра бола бу ҳаракатларга тақлид қилади ва мустақил ўйнай бошлайди. Ўйин жараёнида қатъий тартибқоидаларга буйсуниш талаб қилинмайди, аксинча, катталар даставвал боланинг хоҳиш-истакларига мослашишлари мақсадга мувофиқ.
Қум билан ўйнаш жараёнининг бошланиши ва якунида саломлашиш ва хайрлашиш анъанаси ўзаро келишиб олинади (бирорта мусиқа, товуш ёки қум соатдан фойдаланиш ва ҳ.к.).
Биринчи ва иккинчи машғулот давомида болаларга ҳамма ўйинчоқлар кўрсатилмайди, дастлаб бола қўллари ва белкурак, энли мўйқалам ёрдамида содда ҳаракатларни етарлича эгаллиб олиши керак.
Бола боғчага ўзининг севган ўйинчоқларидан бирини олиб келиши мақсадга мувофиқ. Бу ўйинчоқ 10-15 см баландликда бўлиши, санитар ишлов бериш талабларига мос бўлиши керак. Боланинг хоҳишига кўра гуруҳдаги бошқа ўйинчоқдан ҳам фойдаланиш мумкин. Мазкур ўйинчоқ боланинг қумда ўйнаш жараёнида ҳамроҳ бўлади.