Laboratoriyalıq jumıs № Beloklar. Beloklar hám aminokislotalarǵa tiyisli reńli reakciyalar. Beloklardı dializlew

Beloklardı dializ qılıw
Beloklar dializ usılında hár túrli duzlar hám kishi molekulalı birikpelerden tazalanadı. Bul usıl duzlar arnawlı dializ qılıwshı qaltashalarǵa salınıp, aǵar suwǵa uzaq waqıt batırıp qoyıladı. Dializ qılıwshı qaltashalar arnawlı materiallardan tayarlanadı. Bul materiallar kishi molekulalı birikpelardi hám ionlardı jaqsı ótkizetuǵın bolıwı kerek. Yarım ótkizgish membranalar sıpatında sellofan hám haywanlardıń sidik qaltasınan paydalanıw múmkin. Dializ ushın kóbinshe sellofan qaltashalar isletiledi. Eger beloklar hár túrli duzlar járdeminde ajıratıp alınǵan bolsa, olar quramındaǵı duz dializ jolı menen tazalanadı.
Jumıs tártibi:
Uzınlıǵı 10-12 sm, diametri 0,7 sm bolǵan shiyshe naydıń bir tárepin sellofan menen jawıladı. Shiyshe nayshaǵa 5-6 tamshı belok eritpesinen hám 2-3 tamshı asduzı eritpesinen quyıladı. Keyin shiyshe naysha 2-3 ml suwı bolǵan probirkaǵa túsiriledi. 10-15 minut ótkennen keyin, shiyshe naysha alınadı hám distillengen suwda xloridler hám belok bar yamasa joq ekenligi tekseriledi.
Xloridlerdi anıqlaw ushın distillengen suwdan 0,5 ml probirkaǵa salıp, ústine gúmis nitrattıń 1% li eritpesinen 0,2 ml qosıladı. Bunda gúmis xlorid shókpege túsedi.
Beloklardı anıqlaw ushın biyuret reakciyasınan paydalanıladı. Bunıń ushın distillengen suwdan 0,5 ml alıp, onıń ústine natriy gidriksidtiń 20% li eritpesinen 0,5 ml hám mis sulfattıń 2% li eritpesinen 5-10 tamshı qosıladı. Fiolet reń belok bolmaǵanlıǵı belok joq ekenliginen derek beredi.
Reaktivler: soya belogınıń eritpesi, asduzınıń toyınǵan eritpesi, gúmis nitrattıń 1 % li eritpesi, natriy gidriksidtiń 20% li eritpesi, mis sulfattıń 2% li eritpesi.