Loyihalash texnologiyasi

Ijodiy xarakterdagi loyihalar. Mazkur loyihani hal etishda qatnashchilardan ijodiy 
yondashish talab etiladi. Ijodiy loyihalarning tadqiqot xarakteridagi loyihalardan asosiy 
farqi, ularning mantiqiy strukturasi avvaldan belgilanmaydi, balki loyihaning yechimi 
davomida shakllantiriladi. Ijodiy loyihada qatnashchilarning qiziqishi, motivi, ehtiyojiga 
koʻra loyihaning yoʻnalishi, olinajak natija belgilanadi. Lekin loyihada koʻzda tutilgan 
natijani rasmiylashtirish va jihozlashda qat’iy talab qoʻyiladi. Biologiya oʻqituvchisi ushbu 
loyihalar turidan darslarda foydalanishi mumkin.
Odam va uning salomatligi oʻquv kursida “Odamning sutkalik ovqat ratsionida oqsil, 
yogʻ, uglevodlar miqdori va ulardan ajralib chiqadigan energiya miqdorini aniqlash” 
laboratoriya mashgʻulotini kichik guruhlarda tashkil etib, ularga quyidagi topshiriqlar 
tavsiya etiladi:
1-guruh topshirigʻi. Oʻrta yoshli, aqliy va yengil jismoniy mehnat bilan 
shugʻullanuvchilar uchun bir kecha-kunduzda sarf qilinadigan energiya miqdoriga muvofiq 
holda ularning ovqat ratsionini tuzing.
2-guruh topshirigʻi. Oʻrta yoshli, ogʻir jismoniy mehnat bilan shugʻullanuvchilar 
uchun bir kecha-kunduzda sarf qilinadigan energiya miqdoriga muvofiq holda ularning 
ovqat ratsionini tuzing.
3-guruh topshirigʻi. Boshlangʻich sinf oʻquvchilari uchun bir kecha-kunduzda sarf 
qilinadigan energiya miqdoriga muvofiq holda ularning ovqat ratsionini tuzing.
4-guruh topshirigʻi. Oʻsmir yoshdagi oʻquvchilar uchun bir kecha-kunduzda sarf 
qilinadigan energiya miqdoriga muvofiq holda ularning ovqat ratsionini tuzing.
Rolli oʻyin loyihalari. Ushbu loyihalarda struktura aniqlanmaydi va ish tugagunga 
qadar ochiq boʻladi. Loyiha qatnashchilari muayyan rollarni bajaradilar. Rollarga muvofiq 
holda ularning vazifalari aniqlanadi. Oʻyin syujetiga muvofiq ular rollarni bajarishi, tegishli 
hollarda “mansabdor shaxs” sifatida muloqotga kirishishi, bunda mavjud qobiliyat va 
iste’dodlari, oʻzlashtirgan bilim, koʻnikma va malakalarini safarbar etishlari lozim. Loyihani 
hal etish jarayonida koʻzlangan natijaga erishishlari uchun juda koʻp mehnat qilishlari, 
izlanishlari, mustaqil va ijodiy fikr yuritishlari, mustaqillik va onglilik talab etiladi. Bu yerda 
ijodiy izlanish mavjud, lekin oʻquvchilar ma’lum rollarni bajarish orqali loyiha hal 
etilganligi sababli rolli oʻyin loyihalar sanaladi.

---