Мактабдаги ўртоқларимга бошимдан ўтган воқеалар ҳақидаги гапириб берсам, ишонқирамасдан қарашди

Аҳрор Шариф таржимаси

Эртага ўлдигани бораман 53-қисм (бу аслида 52-қисм – П.Ф.)

23,5 бурчак остидаFebruary 16, 2021

У ерга йиқилиб тушганидан сўнг бошидан вишиллаб қон оқа бошлади. Биз Корпоралнинг ҳеч нарсадан тап тортмасидан завқланиб,олдимиздан ўтиб кетаётган пайтида шараф билан унга тикилдик. Тўсатдан Лансана исмли шеригимизнинг боши ва кўкрагига ўқ тегди. Яхшилаб қарасак бу дарахтлар ортига бекиниб олган исёнчи томонидан амалга оширилган экан. Отган одамни топиш илинжида қишлоқни зир айланиб чиқдик. Ёш ва мушаклари бақувват исёнчи қўлга олинганида, лейтенант битта ўқ билан бўйнини тешиб юборди. Душман жангариси ерга йиқилиб, ҳаракатдан тўхташидан олдин онгсиз равишда у ердан бу ерга юрди. Ҳаммамиз завқ ҳиссини туйиб, қуролларимизни баланд кўтарганча бақирдик ҳамда осмонга ўқ уздик.

- Кимда ким ножўя ҳаракат қилса, дарҳол отиб ташлансин.
Лейтенант шундай деганча асирларга назар ташлади. Похолли томларни ёқиб бўлганимиздан сўнг, асирларни олиб йўлимизда давом этдик. Сомоншувоқ томлардаги аланга кундузги шабада билан қоришиб, чунонам ёнар, томлар ўлим талавасаси олдидан нидо қилаётгандек эди.
- Биз, — лейтенант бизга ишора қилиб, — сизларни ҳимоя қилиш учун бу ерда ҳозир бўлганмиз.
Лейтенантнинг фуқароларга қилган мурожаати янада жонлироқ чиқди:
- Бининг ишимиз жуда қалтис, шунга қарамасдан биз ўз она-ерини ҳимоя қила оладиган энг қобилиятли аскарларни ўзимизда жамлаганмиз. Биз қўзғолончилар сингари бесабаб одам ўлдирадиган махлуқ эмасмиз. Биз мамлакатдаги вазият яхшиланиши учунгина одам ўлдирамиз. Шу боисдан инсонларни хурмат қилинг.
Шундан сўнг лейтенант яна биз томон юзланди:
- Ўз хизматларингни қайишмасдан бажаришга ҳаракат қилинг.
Лейтенант ўз нутқида давом этди. Унинг нутқидан тинч ахолига биз тўғри йўлда эканлигимизни уқтириш ҳамда бизга ўхшаган аскарларинг руҳиятини кўтариш мақсади кўриниб турарди. Бу ерда қуролимни ушлаганча, жиддий қабул қилинаётган нарсанинг бир қисми эканлигимдан ҳамда энди ҳеч кимдан қочмаслигимдан суюндим. Энди менинг ўз қуролим мавжуд эди. Корпорал доимо таъкидлаганидек «Бу қурол доимий қувват манбаим» бўлар эди. У мени ҳимоя қилар, агар уни тўғри ишлата олсам, менга керак бўлган ҳамма нарса билан таъминлай оларди.
Лейтенантнинг бу гапларни айтишига нима ундаганини эслай олмайман. Ўша пайтлардаги кўпчилик ишлар ҳеч қандай сабаб ва ҳеч қандай тушунтиришларсиз амалга ошириларди. Баъзида кино кўриб ўтирганимизда жанг майдонига тезда етиб боришимиз кераклиги тўғрисида хабар келарди. Кўпгина одамларни ўлдириб, ортга қайтганимиздан сўнг соатлаб вақт ўтганини сезардик. Худди дам олишдан келгандек кинони келган жойидан кўришни давом этардик. Гоҳида уруш киноларини кўрсак, гоҳида марихуананинг лаззатидан баҳраманд бўлардик. Ёлғиз қолиб ўй суриш фурсати ҳеч насиб қилмасди. Шерикларим билан ниманидир муҳокама қилсак ҳам, мавзу фақатгина уруш кинолари ҳамда лейтенант, корпорал ёки бошқа кишиларнинг душманларни қиришга ундаётгани ҳақида бўларди. Дунёда ушбу воқеа-ҳодисотлардан бўлак ҳеч нарса содир бўлмаётгандек эди.
Лейтенант нутқидан бир кун ўтиб эрта тонгдан асирларни лейтенант сингари ўлдиришни бошлаб юбордик. Умумий ҳисобда 5 нафар асир қолганди. Шу сабабли cорпорал бир нечтамизни танлаб олди. У мен, Канеи ва яна учта бошқа болани ўлим саҳнасини ижро этиш учун саралаб олди. 5 нафар киши қўллари боғланган ҳолатда ёнимизга тизиб қўйилди. Корпорал буйруқ бериши биланоқ уларнинг томоқларидан тешик очиб қўйишимиз керак эди. Бир зумдаёқ бир одамни нариги дунёга равона қилган бола бахсда ғалаба қозонди. Биз ҳам бир ўқ билан тил тортмай ўлаётган душманларнинг юзига назар ташладик. Мен чеким тушган душман аскарига зимдан назар солдим.