Ma’ruza matnlari mavzu. Kirish. Qishloq xo‘jalik ekinlari yangi navlarini yaratishning axamiyati, xolati va istiqbollari. Reja

2. Nav bilan liniyalararo yoki liniya bilan navaro duragaylar. Bukovinskiy 3 va Dneprovskiy 247 nav bilan liniyalararo duragayi, Dneprovskiy 56 esa liniya bilan navaro duragayi. Bu duragaylar keng tarqalib ekilib kelingan.
3. Navlararo duragaylar. Ular navlarga nisbatan odatda 10-15 foiz ko’p hosil beradi va ekish qimmatga tushmaydi. Ammo qo’shimcha hosil kam bo’lganligi uchun bunday duragaylar ishlab chiqarishga joriy etilmagan.
4. Duragay populyasiyalar yoki sintetik navlar. Bir-biriga mos keladigan bir necha liniya, nav yoki duragaylarning o’zaro erkin changlanishi natijasida olinadigan duragaylar duragay populyasiya yoki sintetik navlar deb ataladi. Bunday duragaylar bir necha yil ekilganda ham hosildorligi pasaymaydi. Duragay populyasiyalar hosili oddiy navlarga nisbatan yuqori bo’lsa ham, eng yaxshi liniyalararo duragaylarga nisbatan pastroqdir. Bu liniyalarning afzalligi shundan iboratki, ularni urug’ini yetishtirish ancha oson, oddiy va arzon. Bir marta xo’jaliklarga bergan duragay urug’ini bir necha yillar davomida ekib foydalanish mumkin. Bu xususiyat bo’yicha duragay populyasiyalar navlarga o’xshaydi, shuning uchun ular sintetik navlar deb ataladi.
Akademik M.I.Xadjinov Krasnodarskaya-1/49 duragay populyasiyasini yaratishda 4 liniyalararo duragaylaridan foydalangan. (VIR-37, VIR-114, VIR-57, Krasnodarskiy-3). Bu to’rt liniyalararo duragaylar urug’i bir joyda ekilib o’sadi, o’zaro erkin changlanib ko’payadi. Shuning uchun – to’rt duragaylar avlodining aralashmasi – populyasiyasi bo’lib, ishlab chiqarishda odatdagi navlar singari erkin changlanadi va navlarga nisbatan har gektaridan 7-8 sentnerdan ortiq don hosili beradi. Bunday duragay – populyasiyalarning geterozisi bir yil emas balki bir necha yil davom etadi. Krasnodarskaya-1/49 duragayi O’zbekistonda ko’p yillar davomida ekilib yaxshi natijalar ko’rsatmoqda.
Makkajo’xorining geterozisli duragaylarini yaratish uchun avvalo eng yaxshi nav yoki duragaylar tanlab olinib, ular kamida 5-6 yil davomida majburiy o’zidan changlatilib, insuxt-liniyalar hosil qilinadi. Keyin shu liniyalarning yuqori geterozisli xususiyatli chatishish (kombinasion) qobiliyatlari aniqlanadi.
Har qanday ota-ona liniyalarning chatishish (imkoniyati) qobiliyati ularning umumiy va maxsus kombinasion (chatishish) qobiliyatlari bilan belgilanadi. (Obshaya kombinasionnaya sposobnost-OKS, spesificheskaya kombinasionnaya sposobnost-SKS).
Amalda geterozisli duragaylar yaratish uchun foydalanilayotgan liniya va navlarning umumiy chatishish qobiliyati TOPKROSS usuli bilan tester navlar yordamida, maxsus chatishish qobiliyati esa diallel chatishtirish yo’li bilan aniqlanadi. Bir-biri bilan chatishtirilganda eng yuqori geterozisli bo’lgan liniyalardan keyinchalik duragay urug’ hosil qilish uchun foydalaniladi.
Geterozisli duragaylar yaratishda seleksionerlar yuzlab, minglab liniya va navlar ustida ishlaydilar. Hozirgi vaqtda o’rganilayotgan liniyalar va navlarning umumiy chatishish qobiliyatini baholash uchun Devis ishlab chiqqan topkross usuli keng qo’llaniladi. Bu usulga ko’ra seleksioner aniqlagich vazifasini bajaraoladigan navni topish lozim. O’rganilayotgan har qanday liniyani shu nav bilan chatishtirib olingan duragay asosida har bir liniyaning umumiy chatishish qobiliyati aniqlanadi. Bunday navlar tester (aniqlagich navlar) deb ataladi.
Tester asosidagi topkross usulining iqtisodiy afzalligi quyidagicha:
Agar diallel chatishtirishda 100 ta liniyaning chatishish qobiliyatini aniqlash uchun 4950 juft chatishtirish o’tkazish kerak bo’lsa, topkross usulida atigi 100 juft chatishtirish talab qilinadi, xolos (odatda 500-1000 nav yoki duragay tanlash pitomnikiga ekilib, kamida 250 tadan kam bo’lmagani o’zidan changlatiladi). Liniyalarni umumiy chatishish qobiliyatini aniqlash uchun keng irsiy asosga ega bo’lgan testerdan foydalanish kerak. Shuning uchun gomozigotali liniya emas, balki populyasiya shunday tester bo’laolishi mumkin. Chetdan changlanuvchi o’simliklarda tester sifatida erkin changlanadigan navdan foydalaniladi. Qo’sh duragay yoki sintetik nav ham tester bo’lishi mumkin.
Geterozisli duragaylar hosil qilish uchun foydalaniladigan liniyalar va navlarning chatishish qobiliyati yuqori bo’lishi bilan birga, ular kasallik va zararkunandalarga chidamli, seleksiya ishi olib borilayotgan muayyan sharoitga moslashgan, sifatli mahsulot beradigan va boshqa muhim belgi va xususiyatlarga ega bo’lishi kerak.
Birinchi bo’g’in (G’₁) duragaylarining urug’lari duragaylash dalalarida maxsus ota-ona shakllarini chatishtirish natijasida hosil qilinadi. Buning uchun ikki ota-ona shakllari, alohida joyda (masofiy izolyasiya sharoitida) yonma-yon joylashgan qatorlarda ekiladi. Bunda ona shakllari (liniyalari, navlari)ning so’tasidagi gullar ota-sifatida ekilgan shakllar ruvagidagi gullarining chang donachalari bilan changlanadi, urug’lanadi va so’talarda duragay urug’lar hosil bo’ladi. Bu so’talar yig’ib olinadi, yanchiladi, urug’i ajratib olinadi – bu urug’lik duragayning birinchi bo’g’ini (G’₁) bo’lib hisoblanadi. Ota shakli sifatida ekilgan o’simliklarning urug’i yig’ib olinib, ozuqa-yemish uchun ishlatiladi.
Duragaylash dalasida duragay urug’ini yetishtirish ona sifatida ekilgan shakllari o’simliklarining ro’vagini kesib olish bilan (bichish) bog’liq bo’lgan ancha qo’l mehnati va mablag’ xarajatlarini talab qiladi. Makkajo’xori ro’vaklarini kesib olish og’ir va mashaqqatli ish bo’lib, gullash vaqtida odamlarning dala ichida yurishi ham ancha qiyinchiliklar tug’diradi. Bundan tashqari ro’vaklar bir kunda paydo bo’lmaydi, bu jarayon bir necha kun davom etadi, demak dala ichida har kun yurib bichish o’tkazish lozim. Bu ishni to’liq va toza (hamma ro’vaklarni vaqtida yulish) o’tkazilishi hamma vaqt ham ta’minlanmaydi. Natijada duragaylash to’liq va sifatli bajarilmaydi va duragay urug’larining sifati pasayadi.
Makkajo’xori ro’vaklarini kesib olish (yulish) ya’ni bichish o’tkazishda odamlarni qo’l mehnatidan ozod qilish muhim masala bo’lib qolgan edi. Bu muammoni seleksion-tajriba muassasalari makkajo’xorining sitoplazmatik erkak pushtsizlik (sterillik) qobiliyatli shakllaridan foydalanish bilan hal etmoqdalar.
Bunday shakllardan (SEP) ona-o’simligi sifatida duragaylash shaxobchalarida foydalanish natijasida ro’vagini kesish (uzish) ishlarini o’tkazishdan ozod qiladi va natijada duragaylash sifatli o’tib, duragaylar urug’ining yuqori hosilli sifatlari yaxshilanadi va ishlab chiqarish arzonlashadi.
Keyingi yillarda ko’pchilik ekinlarning geterozisli duragay urug’lari qo’l mehnatisiz, sitoplazmatik erkak sterilligi asosida yetishtirilmoqda. Makkajo’xorining ro’vagini yulmasdan sterillik (pushtsizlik) asosida duragay urug’lar yetishtirish mumkinligi to’g’risida fikrni akademik M.I.Xadjinov aytgan edi.
Erkak sterilligi (pushtsizligi) yoki chang donachalarining irsiy pushtsizligi bir qator o’simliklarda borligi aniqlangan: moyli zig’irda (1921 y. Betson va Gaydner) piyozda (1924 y. Djons). Makkajo’xorida sitoplazmatik erkak sterilligi (SMS) birinchi bo’lib 1931 yilda amerikalik olim M.Rods tomonidan va 1932 yilda M.I.Xadjinov tomonidan Ozarboyjon makkajo’xorisida topilib ta’riflangan. Lekin amalda sitoplazmatik erkak pusht-sizlikdan foydalanish mumkinligi to’g’risida birinchi bo’lib M.I.Xadjinov taklif kiritgan.
1953-1954 yillarda G.S.Galeyev bu xususiyatni Moldaviya va Shimoliy Osetiya makkajo’xori namunalarida borligini aniqlaydi. Hozirgi kunda sitoplazmatik erkak pushtsizligi aksariyat makkajo’xori namunalarida topilgan.
Amalda sitoplazmatik erkak pushtsizligidan 1943 yil X.Djons va A.Klark piyoz seleksiyasida foydalanadilar. 1940 yillarda lavlagida (SMS) SEP borligi F.Ouyen aniqlagandan keyin, lavlagida bu usuldan foydalanish usullari ishlab chiqiladi. 1944 yil D.Rodjers makkajo’xori SEPning yangi manba’ini topadi va bu SEP-texass tipidagi deb ataladi va 1950 yillardan boshlab bu pushtsizlik amerikalik seleksionerlar tomonidan makkajo’xorining duragay urug’larini ishlab chiqarishda qo’llanadi.
Bu ishlar Moldov tipidagi SEP 1953 yilda G.S.Galeyev tomonidan va 1954 yilda M.I.Xadjinov tomonidan aniqlangandan keyin boshlanib ketadi.
Jo’xorida ham bunday pushtsizlik 1954 yilda D.Stefans va R.Gollandler tomonidan ajratib olingan. Bu ekinning ham keng miqyosda duragay urug’lari SEP asosida hosil qilinmoqda.
Hozirgi vaqtda SEP juda ko’p madaniy o’simliklarning tur va xillarida aniqlangan bo’lib, duragay urug’ yetishtirishda keng foydalanilmoqda.
Makkajo’xorida SEP ikki xili (tipi) aniqlangan bo’lib (Texass –Ttip va Moldovan Mtip), ularning bir-biridan farqi quyidagicha:
Texass (Ttip) tipidagi pushtsizlikka ega o’simlik erkak gullaridagi chang donachalarining pushtsizligi juda kuchli bo’lib, qobiliyatli changlar umuman yo’q. Ularning changdonlari yaxshi rivojlanmagan, gul boshoqchasidan chiqmaydi, chiqsa ham ular ochilmaydi.
Moldavan (Mtip) tipdagi pushtsizlikka ega bo’lgan o’simliklarning ruvagida ko’pmi, kammi changdonlar hosil bo’lib, gul boshoqchasidan chiqsa ham, ochilmaydi. (yorilmaydi). Uning ichida rivojlanmagan, puch chang donachalari shakllanadi. Lekin ayrim vaqtlarda tashqi sharoit ta’siri ostida bunday tipli o’simliklar changdonlarida rivojlangan, hayotchan chang donachalari shakllanishi mumkin.
Bu ikkala pushtsizlik ona o’simligi orqali qat’iy ravishda bo’g’indan bo’g’inga o’tadi – ya’ni irsiydir.
Duragaylarning urug’ligi sitoplazmatik erkak pushtsizligi asosida tashkil etilgan bo’lsa, liniya, duragay yoki navlar nomining oxirida pushtsizlik tiplarining bosh harfi qo’shib yoziladi. Masalan, Maldavan pushtsizlikka ega bo’lgan liniya nomiga «M» Texas pushtsizlikka «T» harfi yoziladi; Gibrid Krasnodarskiy-436 M, gibrid Kishinyovskiy-109 M, gibrid Uspex-T, gibrid Groza-T va boshqalar.
Makkajo’xorining duragay urug’larini sitoplazmatik erkak pushtsizlik asosida yetishtirish uchun quyidagilarga ega bo’lishi kerak:

1. O’zidan changlatilgan liniyalarning pushtsizlik (sterillik) analoglari (o’xshashlari);

   
   

2. Pushtsizlikni mustahkamlovchi qobiliyatga ega bo’lgan liniyalar;

   
   

3. Fertillikni tiklovchi qobiliyatga ega liniyalar.

   
   

Fertil liniya va navlar pushtsiz (steril) o’simlik bilan chatishtirganda hosil bo’lgan naslida pushtsizlikni saqlab qolish qobiliyatiga ega bo’lsalar, ular pushtsizlikni (sterillikni) mustahkamlovchi liniya yoki navlar deb ataladi.

Sitoplazmatik pushtsizlik (SMS) o’simliklar naslining, naslli, normal hosil qiluvchi (fertil) holatni tiklovchi liniya va navlar – fertillikni tiklovchi deb ataladi.
Bu xususiyat va qobiliyatlar insuxt-liniyalarga maxsus to’yintiruvchi chatishtirishlar orqali kiritiladi. Buning uchun kerakli xususiyat yoki qobiliyatga ega o’simlik tanlab olinib, insuxt-liniya bilan 5-7 yil davomida chatishtiriladi. Masalan, fertil liniyaga erkak pushtsizlik xususiyatini o’tkazish uchun quyidagicha chatishtirish o’tkaziladi:

1 yil Ms x L Ms Ms – erkak pushtsizli o’simlik

2 yil Ms x L Ms L - fertil liniya
3 yil Ms x L Ms
4 yil Ms x L Ms
5 yil Ms x L Ms Fertil liniyaning pushtsiz onaligi.

Makkajo’xorining qo’sh liniyalararo duragaylarini pushtsizlik asosida yaratish quyidagicha bo’ladi: maxsus to’yintirish chatishtirish orqali ona shakli sifatida olinayotgan liniyalarga (A va V) sitoplazmatik erkak pushtsizlik qobiliyati, birinchi marta ota shakli sifatida olinayotgan (B) liniyaga esa pushtsizlikni mustahkamlovchi qobiliyat kiritilib, pushtsiz oddiy liniyalararo duragay hosil qilinadi.

♀ A x ♂B (AxB) pushtsiz oddiy liniyalararo duragay (pushtsizlik mustahkamlangan).

Ikkinchi marta ota shakli sifatida olinayotgan (G) liniyaga fertillikni tiklovchi qobiliyat kiritilib, fertil holatdagi ikkinchi oddiy liniyalararo duragay hosil qilinadi.

♀ V x ♂G (VxG) fertil oddiy liniyalararo duragay (fertillikni tiklovchi qobiliyatli).

Bu oddiy duragay urug’lari dalaga aniq nisbatda 4 qator ona sifatida olinadigan oddiy duragay, 2 qator ota sifatida olinadigan oddiy duragay (4:2 yoki 6:4) ekilib, ularda erkin changlanish natijasida ona sifatida ekilgan oddiy duragay o’simlik so’talarida qo’sh liniyalararo geterozisli duragay urug’lari hosil bo’ladi.

♀ A x ♂B (AxB) pushtsiz oddiy duragay.

♀ V x ♂G (VxG) fertil oddiy duragay.

A,V liniyalar bilan sitoplazmatik erkak pushtsizlik qobiliyatli o’simlik chatishtirib, dastlab fertil liniyalarning pushtsiz analoglari hosil qilinadi.

B – liniyaga pushtsizlikni mustahkamlovchi qobiliyat kiritiladi.
G – liniyaga fertillikni tiklovchi qobiliyat kiritiladi.

♀(A x B) x ♂(V x G) yonma-yon aniq nisbatda 4 qator ona

sifatida 2 qator ota sifatida oddiy
duragay urug’lari ekilib o’stiriladi.

Qo’sh liniyalararo

geterozisli duragay
urug’lari hosil qilinadi.

Shu tartibda hosil qilingan geterozisli duragaylarni – VIR-338TV, Dneprovskiy-70TV, BS-6166 TV misolida keltirish mumkin.

Bunda «T» degani – Texas pushtsizlikdan foydalanilgan, «V» degani (vosstanovitel) – fertillikni tiklovchi xususiyatdan foydalanilgan.
Hozirgi kunda deyarli aksariyat mamlakatlarda katta maydonlarda, ayniqsa makkajo’xori, jo’xori, tamaki, sabzavot ekinlarining geterozisli duragay urug’lari ekilmoqda.
G’o’zaning o’rta tolali Gossipium xirzutum bilan uzun tolali Gossipium barbadenzeni turlararo chatishtirganda geterozis hodisasi juda yaqqol samarali bo’lsa, bug’doyda esa aksincha tur- lararo duragaylash natijasida geterozis hodisasi vujudga kelmaydi, tur ichida o’tkaziladigan duragaylashda juda kuchli geterozis hosil qilinishi aniqlangan.
M.F.Ternovskiy uzoq shakllarni duragaylashni qo’llab tamakida geterozis hosil qilgan.
Tamakining Trapezond tipiga kiruvchi navlar asosida hosil qilingan geterozis duragaylardan boshlang’ich ota-ona navlariga nisbatan 30-32 foiz ko’p hosil olingan. Bu duragaylarda barglar soni ko’proq, barg sathi kattaroq, balandroq bo’yli va ota-ona navlar o’simliklariga nisbatan fotosintez energiyasi kuchliroq bo’lganligi kuzatilgan.
Rudolfning aytishicha kungaboqar ekini o’simliklarida geterozis natijasida – urug’i yirik, moyi ko’proq va ertapisharlik xususiyatlari ro’y beradi.
Geterozisdan foydalanish duragay pomidor, qalampir, boyimjon o’stirishda Bolgariyada keng avj olgan. U yerda birinchi pomidor duragaylari 1934 yilda hosil qilinib, keng maydonlarda ekilgan. Boyimjon duragaylari 1963 yilda, qalampir duragaylari 1955 yildan ekila boshlangan.
Pomidordan geterozis duragayi hosil qilish bo’yicha birinchi tajribalar 1908 yilda o’tkazilgan. Bu ekinlarda geterozis hodisasi asosida mahsuldorlikni oshishi, ertapisharligi (10-12 kun oldin hosil tugishi), yuqori sifatli va ota-ona navlariga nisbatan 45-50 foiz ko’proq hosil berishi kuzatiladi.
Yaponiyada ekiladigan karamning 33 navidan 26 tasi, bodringning 33 navidan 32 tasi va piyozning hamma 12 tasi geterozisli duragaylardir.
Bolgariyada pomidorning umumiy maydonining 70 foizi va eksport uchun ekiladiganlarning 100 foizi geterozis duragayi.
Akademik P.M.Jukovskiyning aytishicha, AQShda pomidorning erkak sterilli shakllari topilgan, Argentinada kungaboqarning liniyalararo duragaylari ekilmoqda.
Geterozis hodisasidan foydalanib deyarli hamma mamlakatlarda qishloq xo’jalik ekinlarining duragaylari ekilib, yuqori va sifatli hosil olinmoqda.
O’zbekistonning suvli yerlarida makkajo’xori don uchun asosiy ekin sifatida va ko’k massa uchun ikkinchi ekin sifatida ekilib kelinadi. Bizning Respublikamizda makkajo’xorining 10 navi va 6 duragayi rayonlashtirilgan (Davlat reyestriga kiritilgan). Shulardan 11 nav va duragayi ham don ham silos uchun ekishga, 4 tasi faqat don uchun ekishga tavsiya etilgan. Bular: Qorasuv-350 AMB, Mondo, Tema, O’zbekiston-601 YeSV.
Geterozis hodisasi makkajo’xori seleksiyasida keng qo’llanilib, bu ekin seleksiyasining biologik va genetik asoslaridan hisoblanadi. Xorijiy adabiyotlarning ma’lumoti bo’yicha AQShda makkajo’xorining duragay urug’larini keng qo’llash natijasida bu ekin hosildorligi 30 foizdan ziyodga oshganligi samarasidan har yili 20 mln. tonnadan ko’proq qo’shimcha hosil olinishiga erishilgan.
O’zbekistonda teplisa (issiqxona) sharoitida ko’p miqyosda pomidor, bodring yetishtirilmoqda. Bunda ekib yuqori hosil yetishtirishning asosiy sababchisi – geterozisli duragay urug’larini ekishdir.
Geterozis hodisasi duragayning faqat birinchi (G’₁) bo’g’inida ro’y beradi, ikkinchi, uchinchi bo’g’inlarda hosildorligi, xayotchanligi keskin pasayadi. Hozirgi vaqtda seleksioner-olimlar tomonidan geterozisni ta’sirini bir necha yillarga saqlash muammosi o’rganilmoqda. Masalan, vegetativ yo’li bilan ko’payadigan o’simliklarda (kartoshkada) geterozis duragay (G’₁) hosil qilib, keyin tuganaklari bilan ko’paytirilsa - bir necha yil bu geterozis kuchi saqlanadi.