Masharipova barno erkin qizi

2.3-§. Kásiplik motivaciyanı qáliplestiriw modeli
Joqarı tálim sistemasında bolajaq tárbiyashı-pedagoglarda kásiplik motivaciyanı qáliplestiriwde oqıw processinde ǵárezsizlik, rawajlandırıwshı, sheriklik, rol atqarıw, jámáátlik, psixologiyalıq qollap-quwatlaw principlerine baslı ámel etiw maqsetke muwapıq. Oqıw iskerligin basqarıw processinde student oqıtıwshınıń óz-ara sheriklik múnásibetleri ornatıldı.
Izertlewdiń ilimiy-teoriyalıq juwmaqlarına tayanılǵan halda bolajaq tárbiyashı-pedagoglarda kásiplik motivaciyanı qáliplestiriw modeli ámeliyatqa engizildi. Bul modeldiń strukturalıq komponentleri pedagogika tarawına tiyisli teoriyalıq táliymatlar hám ámeliyatta quram tapqan tájiriybelerdi ulıwmalastıratuǵın ólshemlerden dúzildi. Tájiriybe-sınawda qatnasqan respondentlerge bul modeldiń mazmunı bólek túsindirip berildi. Onıń ushın seminar-trening hám uqıp sabaǵı dúzildi. Nátiyjede, modeldiń jaqsı nátiyjelerdi gózlegenligi hám olarǵa erisiw imkaniyatın beretuǵın process hám de modelde sawlelengen wazıypalardıń reallıǵı ámeliyatshılar tárepinen tán alındı. Bolajaq tárbiyashı-pedagoglarda kásiplik motivaciyanı qáliplestiriwge jóneltirilgen pedagogikalıq modelde zárúrli jantasıwlardıń ornı bólek sáwlelengen. Atap aytqanda, motivaciya kategoriyaları hám basqıshları, didaktikalıq sisteması, olarǵa erisiw faktorları hám de tarawdıń rawajlanıwına úles qosqan ilimpazlardıń táliymatlarına tiykarlanıwdıń zárúrligi inabatqa alınǵan hám kásiplik motivaciyanı rawajlandırıw tiykarǵı maqset etip belgilengen.
Modelde bolajaq tárbiyashı-pedagoglarda jeke sapalardı qáliplestiriwge qaratılǵan tańlaǵan kásibin súyiw, ózbetinshe islew, tolerantlıq, miyirbanlıq sıyaqlı motivaciya kategoriyalarına orın berildi. Sonıń menen birge, iskerlik túrleri anıqlandı, maqsetli hám dóretiwshilik iskerlik arqalı studentlerge pedagogikalıq proceste maqsetti tuwrı belgilew sıyaqlı máselelerge itibar qaratıldı.
Dóretiwshilik iskerlik arqalı pedagogikalıq uqıptıń qáliplesiwine múmkinshilik jaratıladı. “BSDIÚ” modulın oqıtıw processinde ámeliy shınıǵıwlarda studentlerge dóretiwshilik tapsırmalar beriw maqsetke muwapıq ekenligi tiykarlandı.
1-basqısh studentleri menen “Mektepke shekemgi tálim shólkemleri túrli jas toparlarında saxnalastırıw iskerliginiń tiykarǵı wazıypaları” ámeliy shınıǵıw teması boyınsha dóretiwshilik tapsırmalar islep shıǵıldı.
Maqset: Studentlerdi dóretiwshilik iskerlikke jóneltiriw, rol atqarıw arqalı kásiplik motivaciyanı asırıw.