Masharipova barno erkin qizi

Konus yamasa cilindrdan jasalǵan oyınshıqlar. Cirkul yamasa trafaret járdeminde túrli diametrli dóńgelekler qırqıp alınadı, olar ekige búklenedi, búklengen sızıq boylap qırqıladı, yarım dóńgeleklerden jelimlep konus jasaladı, oǵan ertek qaharmanlarınıń súwretleri jabıstırıladı.
Magnitlı teatrı. Balalar tárepinen qaǵazlı konuslar, cilindrler, parolondan jasalǵan oyınshıqlardı magnitlı teatrǵa da maslastırıw múmkin. Onıń astına magnit háreketleniwi ushın juqa fanerge material bólegi jabıstırıladı. Material qasında qoyılǵan eki stoldıń shetlerine ornatıladı.
Barmaq teatrı. Personajlar barmaqlar ushın tesikler payda etilgen qaǵaz yamasa materialdan jasalıp, barmaqlarǵa kiyiledi. Formalar yamasa tek basları sızıladı, kartonlı sheńberlerge jabıstırıladı hám barmaqlarǵa kiyiledi.
Marionetka teatrı qaharmanları da túrli materiallardan jasaladı. Detallardı jumsaq oyınshıq tayarlaw qaǵıydası boyınsha úlgige qaray tigiw múmkin. Bunday quwırshaqlar bir-birine kese etip kesilisken eki sabaqlar járdeminde háreketke keltiriledi.
3-jónelis. “Quwırshaq oynatıw qaǵıydaları”. “Tárbiyashılar” toparı tárepinen tusintiriledi.
Quwırshaq oynatıw qaǵıydaları tómendegilerden ibarat:

1. 
   Quwırshaqtı shirma (perde) ge salıstırǵanda málim dárejede uslaw talap etiledi. Perdeniń shetine qadap qoyılǵan quwırshaq óz biyikliginiń ¾ bólegine shekem kóterilip turıwı kerek.
   
2. 
   Quwırshaq háreketlerdi ámelge asırıp atırǵan waqıtta onıń qolı gewdesine bekkem turıwı kerek. Quwırshaqtı tuwrı (tik) uslaw kerek. Onıń iymeyiwi qol pánjesiniń iymeyiwi menen ámelge asırıladı.
   
3. 
   Quwırshaqtı ótkeriw ushın áwele bilekti búgip quwırshaqtı iyiw kerek, keyin ol otıratuǵın jerine bilekti súyew kerek. Qol quwırshaq kiyimi menen jasırınadı.
   
4. 
   Quwırshaqlardıń háreketi hám sózleri málim bir dıqqat obyektine qaratılǵan bolıwı kerek. Sóylep atırǵan quwırshaq bas yamasa qol háreketleri járdeminde, eń zárúrli sózlerge otırǵanlardıń itibarın qaratıwı kerek.
   
5. 
   Bir quwırshaq sóylep atırǵanda qalǵanları sóylemewi kerek: keri jaǵdayda jaǵdayda sózler kimge tiyisli ekenligi túsiniksiz bolıp qaladı. Aktyordıń bar uqıbı quwırshaqqa beriliwi kerek.
   

Shınıǵıw sońında hár bir jónelis qatnasıwshıları esitken maǵlıwmatları boyınsha soraw-juwap ótkeredi. Oqıtıwshı juwaplardı tıńlaydı hám ulıwmalastıradı. Aktiv studentler xoshametlenedi.
Tájiriybe-sınaw dáwirinde “Story telling” (gúrriń dúziw) texnologiyasınan paydalanıldı. 1-basqısh studentleri menen “Quwırshaq oynatıwdıń ayrıqsha tárepleri” teması “Story telling” (gúrriń dúziw) texnologiyası tiykarında ótkerildi. Bul texnologiya studentlerde motivaciyanı rawajlandıradı. Oqıw maǵlıwmatların uzatıwshı texnika desekte boladı. Ol tómendegi wazıypalardı atqaradı: tárbiyashılıq, tárbiyalıq, motivaciya beriwshi, bilimlendiriwge tiyisli hám rawajlandırıwshı. Shınıǵıw processinde studentler oqıtıwshı tárepinen berilgen tapsırma hám usınıslardı atqaradı. Túrli jaǵdaylardı modellestiredi hám sheshimin tabadı. Bul texnologiya studentlerge ámeliy kónlikpelerdi payda etiwine járdem beredi. Yaǵnıy logikalıq jaqtan hám verbal tárizde bildirilmeydi, bálkim bilim, kónlikpe hám ilimiy tájiriybeler ámeliy iskerlikte payda etiledi.
“Cifrlı Story telling” texnologiyası tiykarında 2-basqısh studentlerine “Dóretiwshilik iskerlikke úyretiwdiń maqset hám wazıypaları” teması túsindiriledi. Bunda oqıw maǵlıwmatları vizual, yaǵnıy video, skraybing, maynd-mep, infografika formasında kórsetiledi.
Maqset: Studentlerdi dóretiwshilik iskerlikke úyretiwge tiyisli maǵlıwmatlardı vizual formada ózlestiriwge baǵdarlaw. Informaciya kommunikacion texnologiyalarınan paydalanıw kónlikpelerin bekkemlew.
Shınıǵıwdıń barısı. Oqıtıwshı tárepinen aldınan studentlerge tapsırma beriledi. Studentler 3 kishi toparǵa ajratıladı, olar dóretiwshilik iskerlikke tiyisli videolar, skraybing, maynd-mep, infografika formasında maǵlıwmatlardı tayarlaydı.