Microsoft Word abu bakr siddiq ziyouz com doc

www.ziyouz.com kutubxonasi 
116
Сайфуллоҳнинг таъриф этиб бўлмайдиган даражадаги жасоратининг ёнида, уни бунчалик 
жасур қилган бир ишонч ва бу ишончнинг таянчи бўлган бир қувватли дин бўлиши керак эди. 
Унда ўлимдан қўрқиш ҳисси кўринмасди. Эртанги ҳаёти бугунгидан ҳам яхши бўлишига юз 
фоиз ишонган, ўзининг Аллоҳ йўлида эканлигига ҳеч шубҳа қилмайдиган бир инсон билан 
юзма-юз турганлигини кўрарди. 
— Бугун динингизни қабул қилган кишининг сизнинг динингизда ўрни қандай бўлади? 
— Аллоҳ фарз қилган амалларни бажаришда ҳолатимиз бир хил. Айни ҳақларга эга бўлади, 
айни вазифаларни бажаришга мажбурдир. 
— Ажр ва савоб жиҳатига нима дейсан? Бугун мусулмон бўлган бир киши, сиз олган савобни 
оладими? 
— Ҳа, ҳатто янада кўпроқ олади. 
— Бу қандай бўлади? Сиз аввалдан динни қабул қилгансиз-ку? 
— Биз Пайғамбаримиз орамизда эканлигида унга ишондик. Унга келган ваҳийни тингладик. 
Турли мўъжизаларга гувоҳ бўлдик. Бизнинг кўрганимизни кўрган, эшитганларимизни эшитган 
бир инсон учун имон келтириш жуда табиий бир ҳол. Сиз эса биз кўрган нарсаларни кўрмаган, 
биз эшитган нарсаларни эшитмагансиз. Шундай бўлгач, бугун самимият билан иймон 
келтирганлар биздан кўра фазилатли бўладилар. 
— Валлоҳи, тўғрисини айтдинг. Мени алдамадинг, эй, Холид. 
— Ҳа, тўғрисини сўзладим. Менда сени алдашга эҳтиёж йўқ. Аллоҳ бу сўзларимга гувоҳдир. 
Суҳбат шу ерда тугаши керак эди. Чунки Ёрув қалқонининг орқасини ўгирганди. Бу эса жанг 
қилишга чиққан кишининг таслим бўлишини билдирарди. Ёрув ҳазрат Холидга қараб: 
— Менга Исломни ўргат, эй, Холид. Сизнинг динингизни қабул қилмоқчиман, - деди. 
Бу гаплардан ҳазрат Сайфуллоҳнинг кўзлари яшнаб кетди. Икки юз қирқ минг кишининг 
қаршисида қўрқувдан ҳапқирмаган юраги энди севинчдан ҳаприқиб кетди. Эшитгани бу бир 
жумла гўё қалбини ёқиб қовурар, кўзларини ёшга тўлдирганди. Шу онда Расулуллоҳ 
(с.а.в.)нинг: 
«Сен орқали бир инсонга Аллоҳнинг ҳидоят бериши, дунёнинг энг қадрли 
неъматларидан ҳам хайрлидир» 
деганларини эшитаётгандек эди. 
— Ундай бўлса, менинг айтганларимни такрорла, эй, Ёрув! Ашҳаду анла илаҳа иллаллоҳу ва 
ашҳаду анна Муҳаммадан абдуҳу ва расулуҳ. 
Ёрув шаҳодат калималарини такрорлади. Кейин эса биргалиқда қўшинга қайтдилар. Ҳазрат 
Холиднинг чодирида бир сувдон сув билан ғусл қилди. Ўргатилган шаклда икки ракат намоз 
ўқиди.