Microsoft Word kr dunyoning ishlari ziyouz com doc

www.ziyouz.com кутубхонаси 
16
ажратиб қўйишади. Тўй тарқаши олдидан, хизматини қилиб бўлгандан кейин Шайх шишани 
оғзига қўйиб пиво ичиб олади-да, бирдан ўйинга тушади. Ёқавайрон бўлиб, оғзидан кўпик 
сачратиб хўп ўйнайди. 
Одамлар қарсак чалган сайин баландроқ сакрайди: 
— Бўш келма, Шайх! 
— Маладес, Шайх! Орангутан бўп кет-е! 
Бундай «мақтовлар» Шайхни баттар жазавага солади. Ҳар тепинганда ер зириллаб кетади. 
Баъзан ҳангоматалаб йигитлар Шайхни ўртага олиб қолишади. 
— Бу... тўйни қачон бошлаймиз, Шайх? 
Шайх тилини чиқариб илжайиб қўяди. 
— Сенга ҳам хотин олиб берайлик бундоқ. 
— Хотинмас, қидз... 
— А?.. Вой кўнглингнинг кўчасидан ўргилдим! Сени кўрган қиз инфаркт бўлиб «Грудной хирур-
гия»га тушадику! 
Шайх хафа бўлмайди. Умуман, хафа бўлишни билмайди. Илжаяди. 
Онамнинг йигирмаси бўлаётган эди. Ғира-шира тонг отаётганда эшикдан кўйлакчан Шайх 
лапанглаб кириб келди. 
— Ия, ана, Шайх келиб қолди! — деди аллаким тантана билан. — Қани, самоварга ўзинг қарай 
қол. 
Аммо Шайх ҳовли бурчагида турган самоварлар томонга юрмади. Ҳеч кимга қарамай бир 
ҳатлаб айвон зинасидан чиқди-ю, ойимнинг хонасига йўналди. 
— Ҳой, Шайх ўлгур, қаёққа? — аёллардан бири унинг йўлини тўсди. — У ерда қариялар 
ўтиради. 
— Қоч! — деди Шайх кўзини олайтириб. Кейин онамнинг хонасига кирди-ю, тўсатдан ўзини 
ерга отди. 
— Ойи! — деди хириллаб. — Ойи-и-и! 
Ёқасига чанг солиб бир тортган эди, кир кўйлаги шир этиб йиртилди-да, қоп-қора, бақувват 
елкалари титраганча оғзидан кўпик сачратиб ҳайқирди: 
— Ойи! Ойи! 
У ҳар «ойи» деганда бошини ерга урар, ерни муштлар эди. 
Бирпасда пешонаси моматалоқ бўлиб кетди. 
— Ойи! Қаёққа кетдидз, ойи! 
Умрида йиғламаган Шайхнинг ноласи ҳаммани карахт қилиб қўйган эди. Кимдир кўтармоқчи 
бўлган эди, Шайх силтаб юборди. 
— Тегманглар! — деди аллаким пичирлаб. — Майли, йиғлаб олсин. 
Анчадан кейин у гандираклаб ўрнидан турди. Ҳеч кимга қарамай ҳовлига тушди-ю, индамай 
чиқиб кетди. 
«ТОЙ» 
Бултур баҳорда эшигимиз олдидаги гулларни суғораётган эдим, яп-янги «Москвич» келиб 
тўхтади. Машина эшиги очилиб, забардаст гавдали йигит тушиб келди. Таний олмадим. 
— Ҳорманг, деҳқончилик катта-ку! — деди нотаниш йигит дўриллаган овоз билан. 
Шунда ҳайратдан бақириб юбордим: 
— Ия, Тоймисан? 
Ҳа, худди ўша Тойнинг ўзи. Фақат шунча бўй, бунақа узун қўл-оёқларни қаёқдан олди экан! 
Яқиндагина булоқдек оқиб турадиган бурнини эплолмай машаққат чекадиган бола эди. 
— Пошша ойимларни кўргани келдим! — деди баҳайбат қоматига унча мос келмайдиган 
алпозда мулойим жилмайиб. Узун оёқларини катта-катта босиб ҳовлига кирди-ю, онамга дуч 
келди. 

---

Дунёнинг ишлари (қисса). Ўткир Ҳошимов