Низом 1-боб. Умумий қоидалар

Ўзбекистон халқаро ислом академияси спорт иншоотларида пуллик хизмат кўрсатувчи спорт тўгаракларини ташкил этиш тартиби тўғрисида
НИЗОМ
1-боб. Умумий қоидалар
1. Мазкур Низом давлат таълим муассасаларининг (кейинги ўринларда таълим муассасалари деб аталади) спорт иншоотларида тренерлар томонидан жисмоний тарбия ва спорт соатларидан бўш вақтларда аҳолига, шу жумладан талабаларга (кейинги ўринларда шуғулланувчилар деб аталади) пуллик хизмат кўрсатувчи спорт тўгаракларини ташкил этиш тартибини белгилайди.
2. Пуллик хизмат таълим муассасаси спорт иншоотларидан (кейинги ўринларда спорт иншоотлари деб аталади) фойдаланиш орқали аҳолининг жисмоний тарбия ва спорт соҳасига бўлган эҳтиёжини қондириш, ушбу соҳада хизмат кўрсатиш сифатини яхшилаш, спорт иншоотларининг моддий-техника базасини ривожлантириш ҳамда пуллик хизмат кўрсатувчи тренерлар (кейинги ўринларда тренерлар деб аталади) меҳнатини рағбатлантириш учун қўшимча маблағлар жалб қилиш мақсадида ташкил этилади.
3. Академиянинг спорт иншоотларида пуллик хизмат кўрсатувчи спорт тўгаракларини ташкил этиш мазкур Низомнинг бандларига мувофиқ амалга оширилади.
2-боб. Спорт иншоотида пуллик хизмат кўрсатувчи спорт тўгаракларини ташкил этиш
4. Спорт иншоотида ташкил этиладиган пуллик хизмат кўрсатувчи спорт тўгараклари тўғрисида академия томонидан аҳоли, шу жумладан, талабалар ўртасида оммавий ахборот воситалари, Интернет жаҳон ахборот тармоғи орқали ва бошқа шаклда тарғибот ишлари олиб борилади.
Тарғибот ишлари натижалари бўйича спорт тўгаракларида шуғулланиш истагида бўлганлар тўғрисида таълим муассасасида доимий янгилаб бориладиган маълумотлар базаси шакллантирилади.
Спорт тўгараклари шуғулланувчиларнинг эҳтиёжларидан келиб чиқиб академия томонидан шакллантирилган маълумотлар базаси асосида ва тренерларнинг ихтисослигини инобатга олган ҳолда ташкил этилади.
5. Шуғулланувчилар томонидан спорт тўгаракларига қатнашиш учун академия раҳбариятига қуйидаги ҳужжатлар тақдим этилади:
академия раҳбарияти номига спорт тўгарагига қатнашиш тўғрисида ариза;
фуқаролик паспорти нусхаси, вояга етмаган шуғулланувчиларнинг туғилганлик ҳақидаги гувоҳномаси нусхаси (ҳужжатни топшириш вақтида ҳужжатнинг асл нусхаси кўрсатилади);
086-У-шакл бўйича тиббий маълумотнома;
шуғулланувчиларнинг 3,5 x 4,5 см ўлчамдаги 4 та рангли фотосурати;
оиланинг кам таъминланганлиги тўғрисида фуқароларнинг ўзини ўзи бошқариш органлари томонидан бериладиган маълумотнома (зарурат бўлганда).
Академия раҳбарияти томонидан мазкур бандда кўрсатилмаган ҳужжатларни талаб қилишга йўл қўйилмайди.
6. Таълим муассасасида таълим муассасаси раҳбари, малакали тренерлар ва тиббиёт ходимидан иборат бўлган аризаларни кўриб чиқиш бўйича ишчи гуруҳ (кейинги ўринларда Ишчи гуруҳ деб аталади) тузилади.
7. Ишчи гуруҳ томонидан аризалар улар келиб тушгандан бошлаб 5 кун ичида кўриб чиқилади ва шуғулланувчиларнинг спортнинг муайян тури билан шуғулланишга лойиқлиги аниқланади.
Кўриб чиқиш натижалари бўйича Ишчи гуруҳнинг баённомаси расмийлаштирилади.
8. Ишчи гуруҳ баённомаси асосида академия раҳбарияти ва шуғулланувчилар ўртасида спорт тўгарагига қатнашиш бўйича белгиланган тартибда шартнома тузилади. Шартномада пуллик хизмат кўрсатувчи спорт тўгаракларининг тури, ўқув-машқ жараёнининг давомийлиги, тарафларнинг ҳуқуқ ва мажбуриятлари каби асосий қоидалар белгиланади.
Пуллик хизмат кўрсатганлик учун тўлов миқдори тренер томонидан академия раҳбарияти билан келишилган ҳолда белгиланади.
Академия раҳбарияти режалаштирилаётган пуллик хизмат тури, ҳажми ва уни бажариш харажатлари, тасдиқланган нархлар ва тарифлардан келиб чиқиб, спорт иншоотларида кўрсатиладиган пуллик хизматнинг даромадлар ҳамда харажатлар сметасини тузади ва белгиланган тартибда тасдиқлайди.
Агар молия йили мобайнида пуллик хизматдан олинадиган даромадлар прогнозига нисбатдан камайса ёки кўпайса, спорт иншоотлари раҳбарияти харажатларни тегишли миқдорда мустақил равишда камайтиради ёки кўпайтиради.