Omirtqa bag’anasi yarim shig’iwi ha’m shig’iwi sebepleri, klinik ko’rnisi?

OMIRTQALARDÍŃ KÓLDENEŃ ÓSIKLERINIŃ SÍNÍWÍ

Omırtqalardıń kóldeneń ósikleriniń sınıwı, ádette, bel átirapında ushıraydı. Kóbinese, sınıw mexanizmi tuwrı emes bolıp, kóldeneń ósiklerge birigiwshi kvadrat hám domalaq úlken bel bulshıq etleriniń kúshli qısqarıwınan kelip shıǵadı.
Tuwrı kúsh tásirinde sınıw kemirek ushıraydı. Sınǵan ósikler bulshıq etler tartılısıwı esabınan tómenge hám sırtqa jıljıydı.
Diagnozı. Kóldeneń ósikler sınǵanda, ádette, kúshli awırıw baqlanadı. Awırıw shalqasına jatıp jazılǵan ayaqlardı kótergende kúsheyedi. «Tabannıń jabısıp qalıwı» belgisi oń bolıwı múmkin, bunda nawqas tuwrılanǵan ayaqtı poldan úze almaydı. Omırtqa baǵanasınıń háreketleri awırıw sebepli sheklengen. Palpaciyalanǵanda paravertebral átirapta sınǵan jerde awırıw seziledi. Aktiv halda kesel tárepke, passivte saw tárepke iyilgende awırıw kúsheyedi.
Rentgenologiyalıq diagnozlaw, ádette, ápiwayı: fas rentgen súwretinde sınıw baqlanadı. Sınıw sızıǵı tegis emes hám kóldeneń, qıysıq hám de gorizontal jóneliste (kemnen-kem) ótedi.
Emlew 0.5% 10 ml novokain menen awırıwsızlandırılǵannan soń, nawqas taxta ústine jatqarıladı. Bel bulshıq etlerin bosastırıw ushın nawqasqa «qurbaqa» halatı beriledi: sanlar uzaqlastırılǵan, dize buwını astına dastıqsha qoyıp, tabanlar jaqınlastırıladı. Emlewshi dene tárbiya, massaj, fizioterapiyalıq proceduralar ótkeriledi. Orında jatıw rejimi múddeti 2—3 hápte. Jumısqa jaramlılıq 4—6 hápteden soń tiklenedi.

OMÍRTQALAR ÓTKIR ÓSIKLERINIŃ SÍNÍWÍ

Ótkir ósikler hám tuwrı emes, hám tuwrı jaraqatlanıwdan sınıwı múmkin. Birneshe ótkir ósiklerdiń birge sınıwı da baqlanadı.