Oʻzbekiston respublikasining soliq kodeksi (Yangi tahriri) Oʻzbekiston Respublikasining

338-modda. Soliq davri. Hisobot davri 
(1-q.)
Kalendar yil soliq davridir. 
(2-q.)
Yilning choragi hisobot davridir. 
339-modda. Soliqni hisoblab chiqarish va 
soliq hisobotini taqdim etish tartibi 
(1-q.)
Hisobot (soliq) davrining yakunlari boʻyicha soliq summasi soliq toʻlovchi tomonidan 
mustaqil ravishda aniqlanadi. 
(2-q.)
Hisobot davri yakunlari boʻyicha soliq summasi soliq davrining boshidan oshib 
boruvchi yakun bilan, agar ushbu moddada boshqacha qoida belgilanmagan boʻlsa, soliq 
bazasining soliq stavkasiga muvofiq boʻlgan foizlardagi ulushi sifatida hisoblab chiqariladi. 
(3-q.)
Soliq toʻlovchi ushbu Kodeksning 342-moddasida belgilangan hollarda va tartibda 
foyda soligʻini yoki chet davlatda toʻlangan daromadlardan olinadigan xuddi shunday turdagi 
toʻlangan soliqni hisobga oʻtkazish yoʻli bilan soliq summasini kamaytirishga haqli. 
(4-q.)
Agar ushbu moddada boshqacha qoida belgilanmagan boʻlsa, soliq hisoboti barcha 
soliq toʻlovchilar tomonidan har bir hisobot va soliq davri oʻtganidan keyin soliq boʻyicha hisobda 
turgan joyidagi soliq organiga taqdim etiladi. 
(5-q.)
Agar ushbu moddada boshqacha qoida belgilanmagan boʻlsa, soliq hisoboti quyidagi 
muddatlarda taqdim etiladi: 
1) hisobot davri yakunlari boʻyicha - hisobot davridan keyingi oyning yigirmanchi kunidan 
kechiktirmay; 

---

2) soliq davri yakunlari boʻyicha - soliq davri oʻtgandan keyingi yilning 1-martidan 
kechiktirmay. 
(6-q.)
Budjet tashkilotlari va nodavlat notijorat tashkilotlari tomonidan soliq boʻyicha soliq 
hisoboti soliq davri yakunlariga koʻra taqdim etiladi, bundan matlubot kooperativlari mustasno. 
Bunda oʻtgan soliq davri yakunlari boʻyicha jami daromad mavjud boʻlmagan taqdirda soliq 
hisobotini taqdim etish talab qilinmaydi.