Педагогик атамалар луғати

Ўқув табели – (лот. tabella – кичкина, юпқа тахта) – ўқувчиларнинг билимлари, хулқ-атворларини ҳисобга олиш учун қўлланиладиган варақа.
Ўқув таътили – ўқув машғулотлари орасида таълим олувчиларнинг дам олиши учун белгиланган муддат.
Ўқув тезауруси (юнон. тhesaurus – хазина, бойлик) – 1) муайян тилдаги барча сўзларни қамраб оладиган, уларнинг матнда қўлланиш ҳолатларини тўла-тўкис акс эттирадиган ўқув луғати; 2) педагогика соҳасига оид луғавий бирликлар мавзу тартибида жойлаштирилган ва ана шу бирликлар ўртасидаги семантик(тур-жинс, синонимик ва бошқа) муносабатлар акс эттирилган педагогик ўқув-идеографик луғат. Бунда сўзлар алифбо тартибида эмас, балки бир мавзу, бир тушунчага боғлаган ҳолда барчаси бир жойда берилади, керакли сўзлар тушунчага қараб қидирилади.
Ўқув устахонаси жиҳозлари – ўқувчиларнинг ўқув, ишлаб чиқариш фаолияти учун зарур бўлган ўқув-кўрсатма материаллар, ишчи ва хўжалик инвентарлари, двигател, станок ва бошқалар.
Ўқув фани – ўқув юртларида ўрганиш учун фан, техника, санъат, и.ч. фаолияти ва б. муайян соҳалардан танлаб олинган билим, кўникма ва малакалар тизими.
Ўқув фаолияти – ўқувчиларнинг атроф оламни билиш, билим ва тушунчаларни ўзлаштиришга йўналтирилган ўқув ҳаракати.
Ўқув фильмлари – таълим жараёнида қўлланиладиган, муайян мавзу бўйича ўқувчиларга билим берадиган фильмлар.
Ўқув чораги – ўқув дастурига мувофиқ тегишли билим, кўникма ва малакалар ўзлаштирилиб, ўқувчиларнинг эгаллаган билимлари натижалари белгиланадиган ўқув йилининг бир қисми.
Ўқув юрти педагогик маслаҳати – ўқув юртлари бошқарувининг юқори органи.
Ўқув ҳафтаси – таълим олувчилар ўқув муасасаларида таълим оладиган кунлар йиғиндиси.
Ўқув қўлланма – дарсликни қисман тўлдирувчи, муайян фан дастури бўйича тузилган ва фан асосларини чуқур ўзлаштирилишини таъминловчи, айрим боб ва бўлимларини кенг ёритишга ёки амалий машқ ва машғулотлар ечимига мўлжалланган педагогик ўқув нашри.