Prokuratura organları iskerliginiń tiykarǵı baǵdarları hám olar iskerliginiń tiykarǵı principleri Rejesi: Prokuratura organları haqqında ulıwma túsinik

Qaraqalpaqstan Respublikası, wálayat, qala hám rayon prokuraturaları. Áskeriy prokuraturalar. Qaraqalpaqstan Respublikası prokuraturasına Qaraqalpaqstan Respublikası prokurori basshılıq etedi, ol Ózbekstan Respublikası Bas prokurori menen kelisilgen halda Qaraqalpaqstan Respublikası Joqarı Keńesi tárepinen lawazımına tayınlanadı hám de azat etiledi. Qaraqalpaqstan Respublikası prokurorı Qaraqalpaqstan Respublikası Joqarı Keńesi hám Ózbekstan Respublikası Bas prokurorı aldında juwapker bolıp tabıladı.
Qaraqalpaqstan Respublikası prokurori tiyisli rayon, qala prokuraturalarınıń hám olarǵa teńlestirilgen prokuraturalardıń iskerligine basshılıq etedi, nızamlar, Ózbekstan Respublikası Bas prokurorining buyrıqları tiykarında hám olardı atqarıw ushın ózine boysınıwshı xızmetkerlerdiń hámmesi ushın májburiy bolǵan buyrıqlar shıǵaradı. Qaraqalpaqstan Respublikası prokurorınıń Ózbekstan Respublikası Bas prokurorı tárepinen lawazımǵa tayınlanatuǵın hám lawazımınan azat etiletuǵın birinshi orınbasarı hám orınbasarları boladı.
Qaraqalpaqstan Respublikası prokuraturasında basqarmalar hám bólimler shólkemlestiriledi. Basqarmalar hám bólimlerdiń basshıları hám de olardıń orınbasarları, prokurordıń úlken járdemshileri, prokurordıń ishki qawipsizlikti támiyinlew boyınsha járdemshisi, úlken prokuror kriminalist Ózbekstan Respublikası Bas prokurorınıń razılıǵı menen Qaraqalpaqstan Respublikası prokurorı tárepinen lawazımǵa tayınlanadı hám lawazımnan azat etiledi. (Ózbekstan Respublikasınıń "Prokuratura haqqında"ǵı nızamınıń 15-statyası).
Wálayatlar, Tashkent qala prokuraturaları hám olarǵa teńlestirilgen prokuraturalarǵa tiyisli prokurorlar basshılıq etedi, olar Ózbekstan Respublikası Bas prokurorı tárepinen 5 jıl múddetke lawazımǵa tayınlanadı hám de lawazımnan azat etiledi. Bul prokurorlar Ózbekstan Respublikası Bas prokurorına boysınadı jáne onıń aldında juwapker bolıp tabıladı.
Wálayatlar, Tashkent qala prokurorları hám olarǵa teńlestirilgen prokurorlar tiyisli rayon, qala prokuraturaları hám olarǵa teńlestirilgen prokuraturalardıń iskerligine basshılıq etedi, nızamlar, Ózbekstan Respublikası Bas prokurorınıń buyrıqları tiykarında hám olardı atqarıw ushın ózine boysınıwshı xızmetkerlerdiń hámmesi ushın májburiy bolǵan buyrıqlar shıǵaradı.
Qaraqalpaqstan Respublikası prokuraturasında, wálayatlar, Tashkent qala prokuraturalarında hám olarǵa teńlestirilgen prokuraturalarda prokuror (baslıq), onıń birinshi orınbasarı, orınbasarları hám prokuratura shólkemleriniń basqa xızmetkerlerinen ibarat quramda komissiya dúziledi. Komissiyanıń quramı tiyisli prokurordıń usınısnamasına kóre Ózbekstan Respublikası Bas prokurorı tárepinen tastıyıqlanadı.
Bas prokuratura, Qaraqalpaqstan Respublikası hám wálayatlar prokuraturaları strukturalarında awıl xojalıǵı salasında nızamlılıqtı támiyinlew hám xojalıq júrgiziwshi subyektlerdiń huqıqların qorǵaw bólimleri shólkemlestirilgen.
Rayon, qala prokurorları hám olarǵa teńlestirilgen prokurorlardıń Ózbekstan Respublikası Bas prokurorı menen kelisilgen halda tiyisli Qaraqalpaqstan Respublikası prokurori, wálayatlar hám Tashkent qala prokurorları hám de olarǵa teńlestirilgen prokurorlar tárepinen lawazımǵa tayınlanatuǵın hám lawazımnan azat etiletuǵın orınbasarları bolıwı múmkin.
Ózbekstan Respublikasınıń birden-bir sistemasına áskeriy prokuratura da kiredi. Áskeriy prokuraturanıń tiykarǵı wazıypalarına: Ózbekstan Respublikasında nızam ústinligin támiyinlew, mámleket qawipsizligi, aymaqlıq qol qatılmaslıq hám áskerlerdegi áskeriy tayarlıq boyınsha nızam ústinligin támiyinlew, áskerlerdiń hám de olar shańaraqlarınıń huqıq hám erkinliklerin qorǵaw, Qurallı Kúshlerdiń nızamlı máplerin kásiplik huqıqbuzarlıqlardan qorǵaw hám bunday huqıqbuzarlıqlardıń aldın alıw kiredi.