Qаrаqаlpаqstаn respublikаsi ministrler ken’esi jаnindаg’i ortа arnаwli bilimlendiriw bаsqаrmаsi

27-shınıg’ıw. Ga’plerdi ko’shirip jazın’. So’z tu’rlewshi qosımtalardın’ astın sızın’.
Qıran tawının’ tik jag’ısınan o’tkennen keyin tag’ı qamıslıq, toran’g’ıl o’sken tog’aylar birine-biri ushlasıp ketti. Da’rya ken’, qubla jag’ıstag’ı pishenler, qamıslar tek qarawıtıp ko’rinedi. Sog’an deyin qulashın ayqara ashıp da’ryanın’ shuwlag’an tolqınları u’stinde ay nurı jıltıraydı. A’sirese ortadag’ı tolqınlar a’ste-aqırın jıynalıp o’rlep barıp, shaw etip tarqap ketedi. Bul ko’rinis qızıqlı ha’m qorqınıshlı. Eger sonday tolqınlar shette bolg’anda Muratlar minip kiyatırg’an qayıqlardı awdarıp taslar edi. Taza, salqın hawa. Dem alıwg’a ju’da’ ra’ha’t (A.A’.).
28-shınıg’ıw. Berilgen ga’plerdi ko’shirip jazın’. So’z jasawshı qosımtalı so’zlerdin’ astın sızıp, sol so’zdin’ qaysı so’z shaqabı ekenin aytıp berin’.
Basshı xalqın su’yiwi, xalqı ushın o’limnen de tayınbawı kerek. Genjemurat Ernazardın’ ko’p jıllardan beri sırlas joralarının’ biri. Onı Qumar analıq ta unatadı. Sol ushın olardın’ u’yine jiyi-jiyi kelip turatug’ın edi.
Ernazar og’an ko’p isenedi. O’tken saparda Genjemuratqa usı bu’gingi ziyapatqa axbaratshı bolıw tapsırılg’an edi. Og’an «ag’a biy» du’zilgeli bul birinshi tapsırma edi. Ol qoynınan quran shıg’arıp dizesinin’ u’stine qoydı. Usılay etiw barlıq axbaratshılar ushın a’det, sonda ol o’tirik so’ylemeydi. Bir awız o’tirik so’z ba’rsheni tuwrı joldan adastıratug’ını da ag’a biydin’ sha’rtnamasında jazılg’an (T.Q.).
29-shınıg’ıw. Berilgen ga’plerdi ko’shirip jazın’. Tu’bir ha’m qosımtag’a ajıratın’.
1. Ernazar diyqanshılıqtan ha’m gu’resten sawa gezlerinde awıllasları menen ten’izden balıq uslaytug’ın edi, usı ha’wız onın’ jewden awısqan balıqların tiri saqlaytug’ın a’jayıp bir ıdısına aylandı. 2. Anası qansha ashıwlı ha’m jumbaqlı so’ylese, Ernazar sonsha teren’ oyg’a shu’mer edi, bul saparı onsha bas qatırmadı.
Xiywada tap usı aqshamg’ıday bolıp «qaraqalpaq», «Ernazar» so’zleri tillerde u’zliksiz ko’p jan’g’ırg’an emes. U’lkennin’ de, kishinin’ de, xiywalının’ da, qaraqalpaqtın’ da pu’tkil Xorezm shuqırınan jıynalg’an barlıq tamashago’ylerdin’ tilegi Ernazardın’ jen’isi.
Sa’skede gu’res qaytadan dawam ettirildi. Palwanlardın’ sharshag’anı ma’lim bolıp tursa da, ha’reketleri jedelli. Iranlıkeshe o’zine isenimli edi, bu’gin a’dewir-aq basılg’an, ha’tte qorqın’qırap ha’reket etip ju’ripti. Ernazar bu’gin biraz o’zgergen, keshegidey ku’yinip shırpa-shırp asıla bermeydi, ju’da’ g’aybar salmaq penen umtılıp, geyde alıstan-aq ın’ırsıp janbas uradı (T.Q.).