Ўрта махсус, касб-хунар

Сузувчи бурғилаш қурилмалари. 
Сузувчи бурғилаш қурилмалари махсус сузувчи платформаларга
ўрнатилган бўлиб, бунда платфомаларни бир нуқтада қимирламай туришини 
таъминловчи қозиқ оёқлар билан жихозланган бўлади. Сузиш пайтида, яъни 
бир нуқтадан бошка нуқтага ўтиш вақтида қозиқ оёқлар йиғиштириб 
олинади. Сузувчи бурғилаш қурилмасини бир нуқтада қимирлатмасдан 
ушлаб туриш учун қозиқ оёқлар махсус кўтаргич орқали денгиз тубигача 
туширилади, сўнг у денгиз тубига маълум бир чуқурликкача қоқилади ва 
шундан кейин мустахкам қотирилади. Қозиқ оёқлар мустахкам 
қотирилгандан кейин кўтаргич ёрдамида бурғилаш қурилма платформаси 
сув сатхидан маълум бир баландликка кўтариб қўйилади. 
Қудуқни бурғилаб бўлгандан сўнг, яна кўтаргич ёрдамида платформа 
секин-аста сув устигача туширилади, қозиқ оёқлар кўтарилади, таянч блок
платформа устига олинади ва янги нуқтага кўчириш мумкин бўлади. 
Сўнги 10-15 йилда денгиз конларини ўзлаштириш кенг кўламда олиб 
борилиши натижасида очиқ денгиз ҳолатида, сув сатхи 600 метрдан ортиқ 
бўлган шароитларда қудуқларни бурғилашга тўғри келди. Бундай 
шароитларда сузувчи платформалар орқали бурғилашни имконияти 
чекланганлиги учун бурғилаш қурилмалари махсус кемаларга ўрнатилди. 
Денгиз кемаларига ўрнатилган бурғилаш қурилмалари хар қандай
шароитларда ҳам қудуқни бурғилаш имкониятини яратиб берди. Одатда 
бундай кемалар денгизда қудуқни бурғилаш учун керак бўладиган қувурлар, 
кимёвий реагентлар ва бошқа керакли асбоб-ускуналарни тўлалигича ўзи 
билан олиб юради. 
Бундай кемада бурғилаш ишлари олиб борилганда фақат бурғилаш 
бригадаси алмашиниб туради. Бурғилаш бригадасини алмаштириш учун 
асосан вертолётлардан фойдаланилади. Кема эса вертолёт қўниши учун 
махсус майдонча билан жихозланган бўлади. 
МДХ худудида денгизда бурғилаш ишлари Каспий денгизи, Баренц 
денгизи, Сахалин бўғози, Охота денгизида олиб борилади. Бу ишларни
бажаришда махсус қурилган катта кемалардан фойдаланилади. 
Хозирги вақтда денгизда бурғилаш ишлари бутун дунё миқёсида кенг 
кўламда амалга оширилмоқда. Айниқса Шимолий денгизда Буюк Британия, 
Голландия, Норвегия фирмаларининг бурғилаш ишлари кескин ортиб кетди. 
Денгизда бурғилаш ишларини АҚШ нинг бир неча фирмалари (Юникал, 
Мобил, Эксон ва бошқалар) жанубий-шарқий Осиёда жуда кенг кўламда 
олиб бормоқда.