Саудия арабистони подшоҳлиги

Ташқи иқтисодий алоқалари. Саудия Арабистони четга, асосан, нефть ва нефть маҳсулотлари, буғдой, хурмо чиқаради. Четдан машина жиҳозлари, автомобиль, истеъмол моллари, транспорт воситалари, металл, тўқимачилик буюмлари, қурол-яроғ олади. Асосан, Япония, АҚШ, Буюк Британия, Корея Республикаси, Сингапур, Франция, Германия билан савдо қилади.
Пул бирлиги — Саудия Арабистони риёли.
1 АҚШ доллари 3,75 риёлга тенг.
Тиббий хизмати. Мамлакатда касалликларни даволаш ва олдини олишга қаратилган инвестиция дастурларини амалга ошириш туфайли ижобий ўзгаришлар рўй берди. Илгари аҳоли орасида кўп учрайдиган сил, безгак, тери ва трахома касалликлари деярли барҳам топди. Мамлакатга ҳар йили келадиган зиёратчиларга лозим бўлган тиббий хизмат кўрсатилади. Бунинг учун Маккада, Минода, Арафотда, Муздалифада ва Мадинада касалхона ва тиббий марказлар мавжуд. Врачларнинг 17%и САП фуқаролари, қолганлари мисрлик, покистонлик, малайзиялик ва бошқа мутахассислардир.
Маорифи ва маданий-маърифий муассасалари. 1926 йил бошланғич мажбурий таълим ва дунёвий мактаблар очиш, 1960 йил қизларни мажбурий таълимга жалб этиш ҳақида қонунлар қабул қилинган. Таълим тизими давлат тасарруфида бўлиб, мамлакат фуқаролари ва чет элликлар учун ҳам бепул. Мактабга 6 ёшдан қабул қилинади. Бошланғич мактаб 6 йиллик, ўрта мактаб 2 босқичли бўлиб, тўлиқсиз ўрта (3 йил) ва тўлиқ ўрта (3 йил) мактабдан иборат. Бошланғич мактаб негизида ҳунар-техника мактаблари (4 йиллик), тўлиқсиз ўрта мактаб негизида ҳунар-тех-ника билим юртлари (2 йиллик) ишлайди. Бундан ташқари, мамлакатда хусусий таълим муассасалари ҳам мавжуд.
Мамлакатда бир қанча олий ўқув юртлари бор. Энг йириклари: Ар-Риёддаги подшоҳ Сауд университети (1957), Жиддадаги подшоҳ Абдул Азиз университети (1967), Мадинадаги Ислом тадқиқотлари университети (1961), Ар-Риёддаги Имом Муҳаммад ибн Сауд ислом университети (1974), Шарқий вилоятдаги подшоҳ Файсал университети (1974), Мак-кадаги Умм ал-Қура университети (1981), Даҳрондаги подшоҳ Фахд номидаги нефть ва минераллар университети (1963), Ар-Риёддаги Олий технология институти ва Техника институти.