Pedagogik kuzatish qanday maqsadda tashkil etiladi?
Pedagogik kuzatish metodi ta’lim muassasalarining o‘quv-tarbiya ishlari jarayonini o‘rganish asosida tadqiq etilayotgan muammoning mavjud holatini aniqlash maqsadida tashkil etiladi. Kuzatish natijalariga ko‘ra tajriba avvali va yakunida qo‘lga kiritilgan ko‘rsatkichlar o‘rtasidagi farq tahlil qilinadi.
Pedagogik kuzatishning samarasi qanday shartlarga muvofiq ta’minlanadi?
Pedagogik kuzatishning samarasi quyidagi shartlarga muvofiq ta’minlanadi:
- kuzatuv jarayonida aniq maqsadga egalik;
- kuzatishni tizimli ravishda yo‘lga qo‘yish;
- kuzatishning har bir bosqichida muayyan vazifalarni hal etish;
- har bir holatning mohiyatini sinchiklab o‘rganish;
- xulosa chiqarishga shoshilmaslik.
Hujjatlarni tahlil qilish (ta’lim muassasasi hujjatlarini o‘rganish) qanday maqsadga yo‘naltiriladi?
Hujjatlarni tahlil qilish (ta’lim muassasasi hujjatlarini o‘rganish) metodi pedagogik hodisa va dalillarni har tomonlama tekshirish, ta’lim muassasasi tomonidan me’yoriy talablarning bajarilishi holatini o‘rganish, erishilgan yutuq, yo‘l qo‘yilgan kamchiliklarni aniqlash, ilg‘or ilmiy-pedagogik, shuningdek, ta’lim muassasasi tomonidan to‘plangan amaliy-pedagogik tajribalarni ommalashtirish maqsadida qo‘llaniladi.
Qanday hujjatlar ta’lim muassasasi faoliyatini yorituvchi hujjatlar sanaladi?
O‘quv mashg‘ulotlarining jadvali; o‘quv dasturi; guruh jurnallari; o‘quvchilarning shaxsiy varaqalari; buyruqlar; Pedagogik kengash yig‘ilishi bayonnomalari va qarorlari; ta’lim muassasasi smetasi va pasporti; tarbiyaviy ishlar rejasi; o‘quv-tarbiya ishlarini tashkil etishga oid hisobotlar; ta’lim muassasasi jihozlari (o‘quv partalari, stol stullar, h.o.) qayd etilgan daftar kabilar ta’lim muassasasi faoliyatini yorituvchi hujjatlar sanaladi.
Bolalar ijodini o‘rganish metodi qanday maqsadda qo‘llaniladi?
Bolalar ijodini o‘rganish metodi o‘quvchilarning muayyan yo‘nalishlardagi layoqati, qobiliyati, ma’lum fan sohalari bo‘yicha bilim, ko‘nikma va malakalari darajasini aniqlash maqsadida qo‘llaniladi; uni qo‘llashda o‘quvchilarning ijodiy ishlari – kundalik, insho, yozma ish, referat va hisobotlari muhim vosita bo‘lib xizmat qiladi.
Do'stlaringiz bilan baham: |
