Strategiyaliq basqariw. Boston modeli

5-TEMA. STRATEGIYALIQ BASQARIW. BOSTON MODELI.
5.1. Strategiya va strategiyalıq menejmenttiń mazmunı.
5.2. Strategiyalıq menejmenttiń bes wazıypası.
5.3. Strategiyalıq basqarıw protsessiniń táripi.
5.4. Strategiyalıq rejelestiriw hám onıń múmkinshilikleri.
Tayanısh sózler: strategiya, menejment, process, strategiyalıq menejment, firma, islep shıǵarıw, biznes, xızmetkerler, finans, marketing.
Strategiya - bul qandayda basqa túrde emes, tek belgilengen túrde háreket etiw májbúriyatı.
Sheron M. Oster
5.1. Strategiya va strategiyalıq menejmenttiń mazmunı
Strategiya ulıwma túrde firmanıń abıroyın bekkemlew, tutınıwshılardıń talapların qandırıw hám qoyılǵan maqsetlerge erisiwge qaratılǵan basqarıw rejesi. Anıq strategiyanı tańlaw – rawajlanıwdıń múmkin bolǵan túrli jolları hám usılları ishinen eń kereklisin tańlap alıwdan ibarat.
Firmanı basqarıw rejesi tómendegi tiykarǵı funktsiya hám bólimlerdi óz ishine aladı: támiynat, islep shıǵarıw, finans marketing, xızmetkerler, ilimiy izertlewler hám islenbeler. Strategiyalıq tańlaw - bul biznes sheshimler hám básekige shıdamlılıq háreketleriniń birden bir sistemasına baylanıslı.
Strategiyanı islep shıǵıw menejerlerdiń tiykarǵı funktsiyalarınan biri. Geyde menejerler kúshli strategiya islep shıǵadı, biraq onı turmısqa endire almaydı. Basqaları ortasha strategiya islep shıǵadı hám onı ámelge asıradı. Strategiya qanshelli jaqsı oylanǵan hám ámelge asırılǵan bolsa, kompaniyanıń ornı sonshelli kúsheyedi. Basqarıw jaqsı payda etilgen kompaniyalar da kútilmegen jaǵdaylarǵa duwshar keledi. Nátiyjede jaqsı strategiya bazarda kúshli orındı iyelew, kútilmegen jaǵdaylarǵa, kúshli básekige hám ishki mashqalalarǵa qaramay tabıslı islewge múmkinshilik jaratadı.
«Menejment tiykarları» kursınan bizge belgili, menejment tómendegilerdi anıqlawdan ibarat:
- biz qay jerdemiz?
- qayakqa ketip baratırmız?
- xızmetimizdiń maqsetleri qanday?
- maqsetke erisiw jolları qanday ?
- optimal joldı tańlaw kriteriyaları nelerden ibarat?
- nátiyje qanday bolıwı kerek?
Bul sorawlardıń juwapları kelesi basqarıw tsikllerinde paydalanıw ushın maqset hám nátiyjelerdi anıqlaw ushın júdá áhmiyetli.
Strategiyalıq menejment kompaniyanıń uzaq múddetli maqsetler hám xızmetine tiyisli. Aytıw múmkin, strategiyanı (háreketler túrin) hám onıń anıq quralların anıqlaw basqarıwdıń tiykarın payda etedi hám kompaniyada menejmenttiń jaqsı jolǵa qoyılǵanlıǵın kórsetiwshi eń tuwrı belgi bolıp xızmet qıladı.
Strategiyalıq menejmenttiń mazmunı tómendegilerden ibarat:
- firma biznesiniń baǵdar hám tiykarǵı maqsetlerdi belgilep alıw;
- firmanıń sırtqı ortalıǵın analizlew;
- ondaǵı ishki jaǵdaydı analizlew;
- firma yaki xojalıqtıń orta buwınlarında strategiyanı tańlaw hám islep shıǵıw;
- diversifikatsiyalanǵan firmanıń portfelin analizlew;
- onıń shólkemlesken strukturasın proektlew;
- integratsiya dárejesin hám basqarıw sistemasın tańlaw;
- «strategiya - struktura - qadaǵalaw» kompleksin basqarıw;
- firma xızmetiniń geypara tarawlardaǵı siyasatın hám onıń minez-qulqı normaların belgilew;
- kompaniya strategiya hám nátiyjeleriniń keri baylanısın támiynlew;
- strategiyanı, strukturanı hám basqarıwdı jetilistiriw.
Bulardıń barlıǵı 5.1-súwrette keltirilgen.
Strategiya - shólkemniń shólkemlesken wazıypa hám maqsetlerine erisiwde paydalanılatuǵın shólkemlesken háreketler hám basqarıwǵa jandasıwları sıyaqlılar.