Tema. Mu’lk,tovar ha’m pul

Mu’lkke iyelik etiw – bul menshiklik huqi’qi’ni’n’ menshik iyesinin’ qoli’nda saqlani’p turi’w ha`m jarati’lg`an materialli’q bayli’qlardi’ o’zlestiriwdin’ ekonomikali’q formasi’. İyelik etiw sharayati’nda mu’lk esaplang`an bayli’q bir ta`repleme o’zlestiriledi. Mu’lkke iyelik etiw saqlang`an halda, oni’ a`melde isletiw o’zgenin’ qoli’nda boladi’. Buni’n’ aqi’betinde mu’lkten kelgen payda eki bo’limge aji’raladi’: bir bo’legin mu’lk iyesi, ekinshisin mu’lkti a`melde isletiwshi o’zlestiredi.

Mu’lkten paydalani’w (oni’ a`melde isletiw) - mu’lk esaplang`an bayli’qti’ ekonomikali’q xi’zmette qollani’p, oni’ xojali’q processine tu’sirip, onnan na`tiyje ali’wdi’ an’latadi’. Paydalani’w ju’z bergende bayli’q da`ramat tabi’w yamasa jeke mu’ta`jlikti qanaatlandi’ri’w ushi’n isletiledi. Mu’lk iyesi o’z mu’lkin o’zi isletkende iyelik etiw ha`m paydalani’w bir qolda saqlanadi’. Ali’ng`an na`tiyjeni mu’lk iyesinin’ o’zi o’zlestiredi. Al olar bir-birinen aji’ralg`anda mu’lk keltirgen payda da bo’listirilgen halda o’zlestiriledi.