9.3. Finanslıq nátiyje, payda hám rentabellik kórsetkishlerin bahalaw hám analizlew jolları
Analiz finanslıq nátiyjeler haqqındaǵı esabattı oqıw, vertikal, gorizontal, trendli analizi, finanslıq koefficientler hám salıstırmalı analiz, faktorlı analiz usıllarınan paydalanǵan halda alıp barıladı.
Finanslıq nátiyjeler haqqındaǵı esabattı oqıwda onıń qatarlar boyınsha kórsetkishlerdiń bóliniwine, finanslıq nátiyjelilikti xarakterlewshi ulıwma qatarlardıń baha ańlatpasına, esabat dáwiri hám ótken jıldıń usı dáwiri boyınsha maǵlıwmatlarǵa ulıwma túsinik beriledi.
Vertikal analizde finanslıq nátiyjelerdiń qáliplesiwin bir qatarlı hám kóp qatarlı usıllarında óz-ara ózgesheliklerge hám salıstırmalı ózgerislerine baha beriledi. Bunda tiykarǵı tárep juwmaqlawshı yaǵnıy jámlengen finanslıq nátiyjeler qatarında quram boyınsha payda hám zıyanlardıń salmaǵına baha beriledi.
Gorizontal analizde bolsa finanslıq nátiyjelerdiń qáliplesiw qatarları, kórsetkishleri boyınsha dáwirli ózgerislerine tolıq hám salıstırmalı ańlatpalarda baha beriledi.
Tiykarlı yaki trend analizinde finanslıq nátiyjeler hám olar quramınıń jıllar boyınsha ózgerislerine hám dinamikalıq ózgerislerine baha beriledi. Eń áhmiyetli tárep tiykar jılına salıstırǵanda ózgerislerine baha beriwge qaratıladı.
Finanslıq nátiyjeler analiz sırtqı hám ishki subyektler tárepinen alıp barıladı. Ishki subyektler tárepinen alıp barılatuǵın analiz ishki finanslıq analiz qatarına kiritilip, tek usı kárxananıń xızmetkerleri tárepinen alıp barıladı.
Do'stlaringiz bilan baham: | 
