Tog’ayli baliqlarning tashqi va ichki tuzilishi

Ovqat hazm qilish organi. Akulaning og’zida harakatchan tog’aydan iborat jag’lari bor. Uning hazm sistemasi og’iz bo’shlig’iga olib kiradigan og’iz teshigidan boshlanadi. Og’iz bo’shlig’ining chetlarida teri plakoid tangachalarining o’zgarishidan paydo bo’lgan konussimon o’tkir tishlar bir necha qator bo’lib joylashgan.

Og’iz bo’shlig’i sekin-asta jabra teshiklari ochiladigan keng va katta halqumga tutashadi. Halqumdan keyin qizilo’ngach (preparatda u jigar ostida joylashgan), qizilo’ngachdan keyin V harfiga o’xshab bukilgan oshqozon keladi. Oshqozonning oldingi qismi kardial, keyingi qismi esa-pilorik deb ataladi. Oshqozonning pilorik qismidan juda kalta ingichka ichak boshlanadi. Ingichka ichak bilan oshqozonning orasida oshqozon osti bezi yotadi. Uch palladan iborat bo’lgan katta jigarda o’t pufagi bor, unga jigarda ishlangan o’t suyuqligi yig’ilib, o’t yo’li orqali ingichka ichakka quyiladi. Ingichka ichakdan keyin yo’g’on ichak va kloakaga ochiladigan to’g’ri ichak keladi. Yo’g’on ichak juda keng bo’lib, ichida burmalar-spiral klapanlar bor, bu klapanlar ovqat qazm qilish yuzasini kengaytiradi. Uni ko’rish uchun yo’g’on ichakning bo’ylama kesimidan tayyorlangan preparatdan foydalanish lozim. To’g’ri ichakning o’rta qismidan barmoqsimon, ichi bo’sh o’simta-rektal bezi chiqadi. Oshqozonning keyingi bukilgan, ya’ni pilorik qismida konussimon taloq - qora jigar joylashgan.