Toshkent davlat texnika universiteti boyitish fabrikalarini loyihalash fanidan kurs loyihasini bajarish uchun uslubiy qo’llanma

Kurs loyihasini bajarish tartibi.

Kurs loyihasini o’z vaqtida va muvaffaqiyatli bajarish uchun quyida berilayotgan tartibga to’liq rioya qilish kerak. Kurs loyihasini bajarish tartibi 1-jadvalda keltirilgan.
Kurs loyihasi 2 qismdan tashkil topadi: 25-30 varaqli tushuntirish matni va 1ta chizma 814x576mm li formatda bajariladi.
Tushuntirish matni standart varaqlarda tartib bilan chetidan xoshiya qoldirib yozilishi, varaqlar, chizmalar, jadvallar, sxemalar raqamlanishi kerak.
1-jadval.

N	Loyihaning qismlari	Bajarish kuni, oyi	Bo’limning hajmi,%	Bajarishning umumiy miqdori, %
1	2	3	4	5
1	Kirish. Qurilish maydonining tasnifi		5	5
2	Maydalash sxemasini tanlash va asoslash		5	10
3	Yanchish sxemasini tanlash va asoslash		5	15
4	Maydalash sxemasini hisoblash		15	30
1	2	3	4	5
5	Yanchish sxemasini hisoblash		15	45
6	Elash va klassifikatsiya dastgohlarini hisoblash va tanlash		10	55
7	Suv sarfi sxemasini hisoblash		25	80
8	CHizmalarni chizish		10	90
9	Tushuntirish matnini rasmiylashtirish		10	100

1.2. Tushuntirish matni
Kurs loyihasining tushuntirish matni 210x297mm li formatda qo’lyozma shaklida yozilib, quyidagi bo’limlarni o’z ichiga oladi.

1. 
   Titul varag’i
   
2. 
   Mundarija
   
3. 
   Kirish
   
4. 
   Qurilish maydonini tanlash va asoslash
   
5. 
   Maydalash va yanchish sxemalarini tanlash
   
6. 
   Maydalash va yanchish sxemalarini hisoblash
   
7. 
   Dastgohlarni hisoblash va tanlash
   
8. 
   Suv sarfi (shlam) sxemasini hisoblash
   
9. 
   Texnika xavfsizligi
   
10. 
    Adabiyotlar
    

1.3 Loyihaning chizmalarini rasmiylashtirish
Kurs loyihasining grafik qismida bosh binoning, yoki flotatsiya (gravitatsiya) bo’limining chizmasi beriladi.
Chizma chizmalarga qo’yiladigan talablarga javob beradigan holda bajarilishi kerak.


2. Kurs loyihasining alohida bo’limlarini bajarish
uchun uslubiy ko’rsatmalar
Kirish. Boyitish fabrikalarini loyihalashga qo’yiladigan asosiy talablar. Loyihalashning bosqichlari. Loyihalash uchun dastlabki ma’lumotlar.
2.1. Qurilish maydonining xarakteristikasi
Bu bo’limda boyitish fabrikasi qurilish maydoni asoslanadi, fabrikani suv, energiya, ish kuchi, mahsulotlar bilan tahminlash usullari va manbalari keltiriladi. Fabrika va uning alohida sexlarining ish tartibi belgilanadi.


2.2. Maydalash va yanchish sxemalarini tanlash va asoslash
Maydalash va yanchish sxemalari boyitiladigan rudaning qattiqligi, granulometrik tarkibi, namligi, maydalanuvchanligi, yanchiluvchanligi va h.klar kabi xususiyatlarini hisobga olgan holda tanlanadi. Sxemani tanlashga rayonning iqlimiy sharoiti, korxonaning ishlab chiqarish unumdorligi, konni qazib olish usuli kabi bir qator omillar ham tahsir etadi. Maydalash va yanchish sxemalarini tanlashda elash va klassifikatsiya operatsiyalarining qo’llanilishi asoslanadi.


2.3. Maydalash va yanchish sxemalarini hisoblash
Maydalash sxemasini hisoblash uchun avvalo yirik, o’rta va mayda maydalash bo’limlarining ishlab chiqarish unumdorligi aniqlanadi. Umumiy maydalash darajasi topilib, u alohida maydalash bosqichlari orasida taqsimlanadi. Har qaysi bosqichdagi maydalagich uchun elak ko’zlarining o’lchami, bo’shatish tuynugining kengligi aniqlanadi va har qaysi maydalagichga tushadigan mahsulotning og’irligi topiladi va olingan natijalar asosida katalogdan har qaysi maydalash bosqichi uchun maydalagich tanlanadi.
Yanchish mahsulotlarining yirikligi mahsulotlarni elash orqali taxlil natijalari bilan baholanadi. Yanchish sxemasini hisoblashda hisoblanuvchi sinf sifatida –0,074 mm li sinf qabul qilinadi. Mahsulotni juda mayin tuyushda hisoblanuvchi sinf –0,040 mm, dag’al yanchishda esa –0,150 mm.
Tegirmon, mexanik klassifikatorlar va gidrotsiklonlar quyulmasidagi –0,074 mm li sinf va bu mahsulotlardagi –0,2 –0,04 va 0,02 mm li sinflarning miqdori orasidagi bog’liqlik o’rtacha qattiqlikdagi rudalar uchun 14–jadvalda [1] keltirilgan.