U. ǴAfurov, Q. Sharipov

REKLAMANÍŃ WAZÍYPALARÍ
Reklama latınsha sóz bolıp, «reclamo» — baqıraman, jar salaman, 
degen mánilerdi ańlatadı. Keńirek mániste bolsa, hár túrli jollar 
menen ǵalaba daǵazalaw, bildiriw, hámmeniń dıqqatın tartıw ushın 
islengen is-háreketler.
Reklama marketing, xabar beriw, bilim beriw, ekonomikalıq hám 
sociallıq wazıypalardı orınlaydı.
BILIMIŃIZDI SÍNAP KÓRIŃ!
1. Ápiwayı tovarlardı satıw quramalı tovarlardı satıwdan nesi menen 
ajıraladı?
2. Tovardı satıwdıń qaysı túrleri sizge belgili edi? Endi jáne qanday 
túrlerin bilip aldıńız?
3. Tovardı satıwdıń hárbir túrine mısal keltiriń. Siz bilgen magazinlerde 
tovardı satıwdıń qaysı túrlerinen paydalanıladı?
4. Tovardı satıwdıń qanday basqıshları bar?
5. Sizińshe, átirapıńızdaǵı sawda shaqapshalarında tovardı satıwdıń 
qaysı basqıshlarına jeterli itibar qaratılmaydı? Pikirińizdi túsindiriń.
6. Reklama qanday wazıypalardı orınlaydı?
7. Házir Ózbekstanda reklamanıń qaysı wazıypası keńirek rawajlanǵan?
8. Mámleketimizdegi qaysı reklama kompaniyaların bilesiz?
9. Aytayıq, siz óz isbilermenlik xızmetińizdi reklama etpekshi boldıńız. 
Qanday usıllardan paydalanǵan bolar edińiz?

---

111
24-TEMA
KÁRXANANÍ BASQARÍW
Jedel isbilermenlik biznes xızmetin innovaciyalıq, yaǵnıy za-
managóy qatnas jasawlar, aldınǵı texnologiya hám basqarıw usılları 
tiykarında shólkemlestirilgen ekonomikalıq baǵdarlar.
Ózbekstan Respublikası Prezidenti Sh. Mirziyoev 
MENEDJMENTTIŃ MAQSETI HÁM WAZÍYPALARÍ
Siz isbilermen bolıwıńız ushın kóplegen ózgeshelikler menen bir 
qatarda basqarıw qábiletine de iye bolıwıńız kerek. Isbilermenlik 
xızmetin basqarıwdıń zamanagóy sisteması sıpatında menedjment 
úlken áhmiyetke iye.
Menedjment — kárxana xızmetin nátiyjeli júrgiziw maqsetinde 
onı basqarıwdıń usılları hám principleriniń jıynaǵı.
Menedjmenttiń tiykarǵı maqseti kárxana xızmeti rentabelligin 
hám onıń bazardaǵı turaqlı jaǵdayın támiyinlew bolıp esaplanadı. 
Sonlıqtan, menedjmenttiń tómendegi wazıypaların ajıratıp kórsetiwge 
boladı:
— kárxana imkaniyatlarınan kelip shıqqan jaǵdayda bazar 
talaplarına say ónim (xızmet)ler islep shıǵarıwdı shólkemlestiriw;
— óndiriske joqarı qánigeli xızmetkerlerdi tartıw;
— xızmetkerlerdiń jumıs sharayatı, miynetine haqı tólewdi jaqsılaw 
arqalı olardıń miynet ónimdarlıǵın arttırıw;
— kárxananı orta hám uzaq múddetli dáwirde rawajlandırıw 
jolların anıqlaw;
— kárxananıń hárbir bólimi xızmet nátiyjeliligin támiyinlew 
maqsetinde belgilengen wazıypalardıń orınlanıwın turaqlı qadaǵalaw.