U. ǴAfurov, Q. Sharipov

BILIMIŃIZDI SÍNAP KÓRIŃ!
1. Isbilermen ushın basqarıw qábiletine iye bolıwdıń áhmiyeti qanday?
2. Menedjment degen ne? Menedjmenttiń tiykarǵı maqseti neden ibarat?
3. Menedjmenttiń qanday wazıypaları bar?
4. Menedjment subyekti hám obyekti degen ne? Olar bir-birinen nesi 
menen ajıraladı?
5. Basqarıw funkciyasınıń hárbirine sıpatlama beriń.
6. Kárxananı basqarıwdıń qanday quramlıq bólimlerin bilesiz?

---

115
25-TEMA
ÓNIMDI EKSPORTQA SHÍǴARÍW
Eksporttı jáne de qollap-quwatlaw maqsetinde texnikalıq tárepten 
tártipke salıw sistemasın xalıq aralıq standartlarǵa sáykeslestiriw 
kerek. Tiykarǵı maqsetlerimizden biri — sırtqı bazarǵa sıpatlı 
hám sertifikatlanǵan ónimlerdi «ózbek brendi» atı menen alıp 
shıǵıwdan ibarat.
Ózbekstan Respublikası Prezidenti Sh. Mirziyoev
KÁRXANANÍŃ SÍRTQÍ EKONOMIKALÍQ XÍZMETI
Ayırım isbilermenler óziniń ónimlerin sırtqı bazarda satıwdı 
maqset etip qoyadı. 
Sırtqı bazar — belgili mámleket ushın shet eldegi mámleketler 
bazarı bolıp, ol xalıq aralıq kelisimler arqalı tártipke salınadı.
Sebebi, sırtqı bazardaǵı qatnasıq isbilermenlik xızmetiniń joqarı 
dárejede rawajlanǵanlıǵı, onıń shet ellik isbilermenler menen 
básekilesiwge tayarlıǵın ańlatadı. Milliy isbilermenlerdiń sırtqı 
bazarlarǵa shıǵıwı mámleket ushın da mápli bolıp, ol bunday 
isbilermenlerdi qollap-quwatlawǵa háreket etedi.
Bul boyınsha isbilermen óziniń xızmetin shólkemlestiriwde eki 
tárepke itibar qaratıwı maqsetke muwapıq. Birinshiden, ol mámleket 
ishinde óziniń xızmetin turaqlı hám nátiyjeli dárejede jolǵa qoyıp 
alǵannan keyin sırtqı bazarǵa shıǵıwdı rejelestiriwi kerek.
Ekinshiden, ol óz jumısın tuwrıdan-tuwrı sırtqı bazarǵa ónim 
shıǵarıwdan baslaw múmkin. Hár eki jaǵdayda da kárxananıń sırtqı 
ekonomikalıq xızmetin tereń biliw talap etiledi.