Қуёш тизимининг митти жисмлари

Aim.Uz

Қуёш тизимининг митти жисмлари


Астероидлар. Улар тошсимон қаттиқ жисмлар бўлиб, сайёралар сингари эллиптик орбиталари бўйлаб ҳаракатланади. Аммо бу жисмларнинг ўлчами оддий сайёраларнинг ўлчамидан жуда кичик, шунинг учун ҳам уларни митти сайёралар дейилади. «Астероид» атамаси (ёки «юлдузсимон») XVIII асрнинг таниқли астрономи Уильям Гершел томонидан бу объектларни телескоп ёрдамида кузатишда тавсифлаш учун киритилган.
Ҳозиргача маълум бўлган астероидларнинг асосий қисми Қуёшдан 2,2-3,2 астрономик бирлик (а. б.) масофасида Марс ва Юпитер орбиталари орасида ҳаракатланади. Ҳозиргача 20 мингдан ортиқ астероидлар кашф этилган.
Бу жисмлар эгаллаган фазонинг ҳалқали қисми Астероидларнинг бош қамбари дейилади. Ўртача 20 км/с чизиқли орбитал тезликда бош қамбарнинг астероидлари Қуёшдан узоқлигига қараб унинг атрофида 3 дан 9 йилгача бўлган вақтда бир марта айланиб чиқади. Орбиталари текисликларининг эклиптика текислигига қиялиги 70° гача боради, асосан 5 - 10° оралиғида.
Энг йирик астероид - Цереранинг ўлчами тахминан 1003 км га тенг, иккинчи ўринда - Паллада бўлиб, унинг радиуси 500 км га яқин, аммо уларнинг кўпчилиги анча кичик. Маълум бўлган астероидларнинг энг кичиги кўндалангига 1 км.
Кометалар. Номи юнонча «узун сочли» маъносини англатади.
Комета тўғрисидаги биринчи ёзма маълумот эрамиздан олдинги 2296 йилга тўғри келади. Кометаларнинг осмону-фалакдаги ҳаракатини хитойлик астрономлар диққат билан кузатган.
Қуёш тизимидаги бу жисмлар Қуёшдан анча узоқдаги кучли чўзилган орбиталари бўйлаб суст ёритувчи овал шаклидаги доғлар сифатида ҳаракатланади. Қуёшга яқинлашганида уларнинг боши ва думи кўринади, бошининг маркази ядро деб аталади (16-расм). Ядросининг диаметри 0,520 км.

16-расм. Кометанинг фотосурати.

Кометанинг жажжи ядроси унинг ягона қаттиқ қисми ҳисобланади, унда кометанинг деярли бутун массаси жам-ланган.
Фотометрик ядрони ўраб турувчи туманли атмосфера кома дейилади. Кома ядро билан бирга кометанинг бошини ташкил этади.
Кометанинг думи куёш нури таъсирида ядродан учиб чиқадиган газ молекулалари (ионлари) ва чанг зарраларидан таркиб топган бўлиб, узунлиги ўнлаб миллион километрларга етиши мумкин.
Кометалар қуёш шамоли мавжудлигидан дарак беради. Галлей кометаси - тарихий комета. Эрамиздан аввалга 240 йилдан бошлаб унинг 30 марта Қуёшга яқинлашганлиги кузатилган. Ҳар 75-76 йилда бир марта қайтиб кўринади. 1986 йили кометани бешта сайёралараро космик аппаратлар: «Вега-1», «Вега2» (СССР), «Джотто» (ЕИҲ), «Суисен» ва «Сакигаке» (Япония) кутиб олишган. Уларнинг баъзилари кометанинг боши орқали ўтишган. Галлей кометаси яна 2061 йилда кўринади.
Уэста кометаси - асримизнинг энг чиройли кометаси ҳисобланади. У Қуёш нурларида булутни эслатувчи узун кенг думга эга. Боши Венера сингари ёруғ бўлган. У бир неча қисмларга парчаланиб кетган.
Шумейкер-Леви кометаси. 1992 й. комета Юпитернинг булутли қопламасидан 15 минг км узоқдан ўтган. Натижада унинг ядроси 17 бўлакка парчаланиб, 200 минг км га тарқалиб кетган. Шу тариқа комета Маунт Паломар обсерваториясида Южин Шумейкер ва Дэвид Леви томонидан кашф этилган.