Ўзбекистон республикаси фанлар академияси т арих институти ҳузуридаги илмий даражалар берувчи dsc

Тадқиқотнинг республика фан ва технологиялари ривожланишининг устувор йўналишларига боғлиқлиги. Тадқиқот республика фан ва технологияларни ривожлантиришнинг I. «Демократик ва ҳуқуқий жамият маънавий-маърифий, маданий ривожланиш, инновацион иқтисодиётнинг шаклланиши» дастури устувор йўналиши доирасида бажарилган.
Диссертация мавзуси бўйича хорижий илмий тадқиқотлар шарҳи³. Ҳунармандчилик тарихига бағишланган илмий тадқиқотлар дунёнинг етакчи илмий-тадқиқот марказлари ва олий ўқув юртларида бажарилиб келинаётган тадқиқотлар доирасида, жумладан: Германия Замонавий шарқ маркази (Zentrum Moderner Orient, Germany), Япониянинг Хокайдо университети Славян ва Евроосиё илмий тадқиқот маркази (Slavic-Eurasian Research Center), Англиянинг Кембриж университети (University of Cambridge), Франциянинг «Замонавий жамиятлар антропологияси маркази» (Centre d'anthropologie des mondes contemporains), Россия Фанлар академияси Этнология ва антропология институти (Россия), Калгари университети (Канада), Шарқ давлат музейи (Россия), Шарқ гиламлари жамияти ва Пауэрхаус музейи (Австралия), Канада тўқимачилик музейи (Торонто, КТМ)⁴, Миннеаполис санъат институти (АҚШ)⁵, Виржиния университети (University of Virginia, АҚШ), Ўзбекистон ФА Тарих институти (Ўзбекистон) томонидан амалга оширилмоқда.
Халқ анъанавий ҳунармандчилиги мавзуси бўйича тадқиқотларда қатор аҳамиятга молик илмий натижалар олинган: ҳунармандчиликнинг ўзига хос локал турлари, улар билан боғлиқ маросим ва урф-одатлар, ҳунармандчилик рисолаларида уста‑шогирд анъаналари (Германия Замонавий шарқ маркази), Қашқадарё воҳаси гиламдўзлиги ривожланиши хусусиятлари (Slavic-Eurasian Research Center, Япония), ҳунармандчилик семантикасида рамзлар, элементлар семиотикаси аниқланган (Кембриж университети, Англия); ўзбек анъанавий ҳунармандчилигининг Россия мустамлакаси ва совет даври тарихини тадқиқ қилишда услубий ёндашувлар моҳияти ёритилган (Россия Фанлар академияси Этнология ва антропология институти); Ўзбекистоннинг жанубий ҳудудларининг каштачилик ва гиламчилигига оид маълумотлар тўпланган ва экспозициялар йиғилган (Канада тўқимачилик музейи, Торонто); амалий санъатнинг антропологик ёндашуви асосида тадқиқ қилишни илмий асослари ўрганилган (Миннеаполис санъат институти ва Виржиния Университети, АҚШ).
Жаҳонда ҳунармандчилик соҳасини ривожлантириш, амалий санъат анъаналарини сақлаб қолиш бўйича қуйидаги йўналишларда тадқиқотлар олиб борилмоқда: амалий санъатни антропологик ёндашув асосида ўрганиш, ҳунармандчилик назарияси, иқтисодиётда ҳунармандчилик секторини яратиш, ҳунармандчилик иқтисодиётини модернизациялашуви, институционал асосларни шакллантириш, қўлда ҳунармандчилик маҳсулотларини ишлаб чиқишда инновацияларни қўллаш, ишсизлик даражасини пасайтириш, маҳсулотлар экспортини кўпайтириш, бозор туризми ва музейлардаги ўрнини аниқлаш.